រាជធានីភ្នំពេញ ៖ នៅទីបំផុត គម្រោងលេចឡើងនៃកីឡាកាសកម្ពុជា ដែលបានប្រកាសយ៉ាងក្តែងៗកាលពីឆ្នាំ២០១០ ត្រូវរលាយទាំងស្រុងហើយមកទល់ពេលនេះ ។ ក្រុមមន្ត្រីពាក់ព័ន្ធបានអះអាងថា កីឡាមួយនេះនឹងចេញមិនរួចឡើយ បើទោះសហព័ន្ធកីឡាកាសប្រចាំនៅប្រទេសជបុ៉នមានគម្រោងបញ្ជូនគ្រូមកបណ្តុះបណ្តាល និងផ្តល់ឱ្យនូវសម្ភារហ្វឹកហាត់ផ្សេងៗក្តី ។
រាជធានីភ្នំពេញ ៖ នៅទីបំផុត គម្រោងលេចឡើងនៃកីឡាកាសកម្ពុជា ដែលបានប្រកាសយ៉ាងក្តែងៗកាលពីឆ្នាំ២០១០ ត្រូវរលាយទាំងស្រុងហើយមកទល់ពេលនេះ ។ ក្រុមមន្ត្រីពាក់ព័ន្ធបានអះអាងថា កីឡាមួយនេះនឹងចេញមិនរួចឡើយ បើទោះសហព័ន្ធកីឡាកាសប្រចាំនៅប្រទេសជបុ៉នមានគម្រោងបញ្ជូនគ្រូមកបណ្តុះបណ្តាល និងផ្តល់ឱ្យនូវសម្ភារហ្វឹកហាត់ផ្សេងៗក្តី ។
នេះជាដំណឹងចុងក្រោយដែលអះអាងយ៉ាងច្បាស់ថា កីឡាកាសកម្ពុជាដែលកំពុងត្រូវអ្នកខ្លះគិតថា ស្ថិតក្នុងការរៀបចំយុទ្ធសាស្ត្រឱ្យបានស្រេចបាច់មុននឹងបើកឱ្យមានការប្រកួតនោះ ទំនងជាដល់ថ្ងៃអវសាន្តហើយ ។ នៅអំឡុងបុណ្យអុំទូកកាលពីឆ្នាំ២០១០ គ្មានអ្នកណាមិនដឹងនោះទេថា គណៈកម្មាធិការជាតិអូឡាំពិកកម្ពុជាបានប្រកាសបង្កើតកីឡាកាសកម្ពុជាទាំងផ្នែកបុរស និងនារីដូចនៅបណ្តាប្រទេសក្នុងតំបន់អាស៊ីមួយចំនួនដែលកីឡានេះកំពុងរីកចម្រើន ។ ការប្រកាសនេះបានទាំងរៀបចំឱ្យមានព្រឹត្តិការណ៍ប្រកួតរវាងកីឡាករកីឡាការិនីកម្ពុជា និងកីឡាករ កីឡាការិនីផ្នែកកីឡាកាសមកពីប្រទេសជបុ៉ន និងប្រទេសមួយចំនួននាពេលនោះទៀតផង ។ ក្នុងព្រឹត្តិការណ៍នោះ មន្ត្រីពាក់ព័ន្ធជាច្រើនបានអះអាងថា យ៉ាងយូរ៣ឆ្នាំក្រោយ កីឡាកាសកម្ពុជានឹងមានការរីកចម្រើន ហើយមានកម្រិតអាចស្មើមុខស្មើមាត់នឹងកីឡាកាសរបស់ប្រទេសក្បែរៗខាង ដោយសារកម្ពុជាមានទាំងធនធាន និងមានទាំងអ្នកផ្តល់ជំនួយបច្ចេកទេស ។
ស្រង់សម្តីនាពេលនោះ លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានថ្លែងថា គ្មានអ្វីដែលកីឡាកាសកម្ពុជាចេញរូបរាងមិនរួចនោះទេ ដោយសារតែកីឡាករនេះមានការពាក់ព័ន្ធទាំងស្រុងនឹងកីឡាបោកចំបាប់យូដូ និងកីឡាកាយវប្បកម្ម ដែលមានការរីកចម្រើនស្រាប់នៅក្នុងប្រទេស មានន័យថា កម្ពុជាមានធនធានកីឡាករ និងកីឡាការិនីរួចហើយ ដោយគ្រាន់តែប្រមែប្រមូលយកជើងខ្លាំងមកបណ្តុះបណ្តាលរួមគ្នាពីបច្ចេកទេសបន្ថែមគឺជាការស្រេច ។ គាប់ជួនជាពេលនោះ សហព័ន្ធកីឡាកាសរបស់ជបុ៉នបានប្រកាសជាសាធារណៈថា នឹងផ្តល់ធនធានគ្រូបង្វឹក និងជួយផ្នែកបច្ចេកទេសដើម្បីឱ្យប្រទេសកម្ពុជាមានកីឡានេះផង ទើបរឹតតែធ្វើឱ្យម្នាក់ៗរំពឹងយ៉ាងមុតមាំថា កីឡាកាសដែលរីកចម្រើននៅប្រទេសអាស៊ីពិតជាចេញរួចនៅកម្ពុជា ១០០% ។ នៅក្នុងវេទិកានោះ គេឃើញមានការប្រមូលផ្តុំគ្នាពីសំណាក់កីឡាករក្នុងប្រទេសមកពីផ្នែកយូដូ បោកចំបាប់ និងមកពីក្លិបកាយវប្បកម្មស្ទើរគ្រប់គ្នាដែលមានមាឌធំៗ និងកម្លាំងខ្លាំងបង្ហាញវត្តមាននៅលើរេញដើម្បីប្រកួតកីឡាកាសជាមួយវត្តមានរបស់កីឡាករមកពីខាងក្រៅផងដែរ។
បើទោះជាពេលនេះ គឺជាចំណុចចាប់ផ្តើម បុ៉ន្តែកីឡាករ និងកីឡាការិនីរបស់កម្ពុជាបានទទួលការចាប់អារម្មណ៍យ៉ាងខ្លាំងដោយសារតែមានកីឡាករភាគច្រើនអាចផ្តួលកីឡាករ និងកីឡាការិនីមកពីជបុ៉ន និងមកពីប្រទេសផ្សេងទៀតឱ្យបរាជ័យលើរេញ ។ លទ្ធផលនេះបានក្លាយជាមោទនភាពកាន់តែខ្ពស់ថែមទៀតរបស់លោកវ៉ាត់ ចំរើន ដែលអះអាងថា ក្នុងពេលយ៉ាងខ្លី កីឡាកាសនៅកម្ពុជានឹងក្លាយជាកីឡាថ្មីមួយប្រចាំនៅក្នុងស្ថាប័នគណៈកម្មាធិការជាតិអូឡាំពិកកម្ពុជា ។ មនុស្សមួយចំនួននឹកស្មានថា អំឡុងនៃការស្ងប់ស្ងាត់ទំនងជាការត្រៀមទុកប្រកបដោយសក្តានុពលមួយដែលកីឡាកាសរបស់កម្ពុជានឹងអាចចេញរួច ដោយយោងលើហេតុផលដែលបានប្រកាសក្នុងពេលប្រកួតកីឡាកាសនាពេលមុន ។ អុីចឹងហើយទើបមានការភ្ញាក់ផ្អើលយ៉ាងខ្លាំងបន្ទាប់ពីកោះសន្តិភាពបានទទួលដំណឹងចុងក្រោយថា គម្រោងនោះរំលាយចោលយូរហើយ ។
មន្ត្រីដែលធ្លាប់ផ្តល់ជំនឿចិត្តយ៉ាងមុតមាំទាំងបុ៉ន្មានបានបែរប្តូរប្រយោគថា ការប្រកាសនាគ្រានោះគ្រាន់តែការព្រាងទុក និងថាការប្រកួតកីឡាកាសរវាងខ្មែរ និងបរទេសនាពេលនោះគ្រាន់តែជាការបើកឱកាសឱ្យកីឡាកររបស់ជបុ៉ន និងបរទេសមកសិក្សាពីស្ថានភាពចង់បង្កើតកីឡាកាសនៅកម្ពុជាបុ៉ណ្ណោះ ។ លោកវ៉ាត់ ចំរើន មិនអាចទទួលការបកស្រាយបានទេ ខណៈដែលមន្ត្រីពាក់ព័ន្ធផ្សេងទៀតបានឆ្លើយថា គម្រោងនោះត្រូវរំលាយចោលបាត់យូរហើយ ។ មន្ត្រី២រូបដែលទាមទារមិនឱ្យបញ្ចេញឈ្មោះនិយាយថា កីឡាកាសកម្ពុជាចេញរូបរាងមិនកើតទេ ដោយសារតែលោកខ្លួនឯងមិនដែលឃើញវត្តមានខាងភាគីជបុ៉ន ដែលសន្យាថា មកជួយបណ្តុះបណ្តាលនោះបង្ហាញវត្តមានជាថ្មីទាល់តែសោះ ចាប់តាំងពីបានជជែកគ្នាម្តង ។ ទោះយ៉ាងណា នោះមិនមែនជាកំហុសរបស់ជបុ៉នឡើយ បុ៉ន្តែគឺមកពីគណៈកម្មាធិការជាតិអូឡាំពិកកម្ពុជាមិនមានឆន្ទៈក្នុងការបង្កើតឱ្យមានកីឡានេះច្រើនជាង ។ ហេតុផលនៃការរំសាយនោះគឺបណ្តាលមកពីការសិក្សាចុងក្រោយបង្ហាញថា កីឡាករ និងកីឡាការិនីកម្ពុជាមិនចូលចិត្តប្រឡូកនឹងកីឡាដែលប្រើកម្លាំងច្រើនមួយនេះទេ ។ ភាគច្រើនពួកគេនិយាយថា នោះជាកីឡាឈឺសាច់ខ្លាំង ហើយទទួលកម្រៃទាប គាប់ជួនជាធនធានរបស់កម្ពុជាមិនសូវមានអ្នកមានមាឌធំដែលចូលចិត្តវាយប្រយុទ្ធគ្នាបែបនេះផង ទើបរឹតតែចេញមិនរួច ។
មន្ត្រីម្នាក់ទៀតលើកឡើងដែរថា ការពិតបើសរុបរវាងកីឡាករ-កីឡាការិនីក្នុងប្រភេទកីឡាបោកចំបាប់ យូដូ និងកាយវប្បកម្មដែលមានមាឌធំៗ ហើយមានសមត្ថភាព កីឡាកាសកម្ពុជាអាចចេញរួច បុ៉ន្តែបញ្ហាចោទគឺកីឡាករ-កីឡាការិនីទាំងនោះផ្ទាល់អត់សូវមានអ្នកចង់ក្លាយខ្លួនជាកីឡាកាសតែម្តង ។ លោកនិយាយថា គ្រាន់តែតម្រូវឱ្យពួកគេមកធ្វើជាកីឡាកាសមួយពេល ដើម្បីឡើងប្រកួតកាលពីឆ្នាំ២០១០ ហ្នឹង គឺដូចអូសឫស្សីបញ្ច្រាសចុងទៅហើយ ចុះទម្រាំតម្រូវឱ្យពួកគេហ្វឹកហាត់រាល់ថ្ងៃ និងឡើងប្រកួតញឹកញាប់ តើនឹងក្លាយជារឿងយ៉ាងណា ។ កីឡានេះនឹងចេញមិនរួចទេ ព្រោះបរិបទរបស់កម្ពុជាមិនមានចំណូលចិត្តចំពោះកីឡាប្រភេទនេះ ម្យ៉ាងបើអាចបង្កើតឡើងមែនយ៉ាងច្រើនបានតែមួយខ្យល់បុ៉ណ្ណោះ គឺពិតជារលាយវិញហើយ ។ អុីចឹងហើយទើបគណៈកម្មាធិការជាតិអូឡាំពិកកម្ពុជាខ្ជិលខ្វល់ និងឈប់គិតចំពោះរឿងនោះ ។
ផ្ទុយគ្នាពីការបញ្ជាក់ កីឡាករ និងកីឡាការិនីដែលធ្លាប់បង្ហាញវត្តមានឡើងប្រកួតកីឡាកាសកាលពីឆ្នាំ២០១០ និយាយថា ពួកគេត្រៀមខ្លួនរួចហើយ បើកីឡានោះបង្កើតឡើងពិតប្រាកដមែន ។ បុ៉ន្តែលុះត្រាតែការប្រកួតនោះទទួលបានកម្រៃខ្លួនខ្ពស់ និងមានការលើកទឹកចិត្តសមនឹងការប្រឹងប្រែង ទើបពួកគេស្ម័គ្រចិត្តប្រឡូកដោយស៊ប់មិនដកដៃ ។ ស្ទើរតែដូចគ្នា ពួកគេនិយាយថា មិនខ្លាចទេ ដោយសារកីឡាកាសមានសភាពដូចគ្នានឹងការប្រកួតបោកចំបាប់ និងយូដូ ដែលធ្លាប់ប្រឡូកអស់ច្រើនឆ្នាំ ។ បុ៉ន្តែអ្វីដែលពួកគេស្ទាក់ស្ទើរ គឺបញ្ហាថវិកានិងការលើកទឹកចិត្តផ្សេងៗដែលគណៈកម្មការរៀបចំធ្លាប់ផ្តល់ឱ្យមិនឱ្យពួកគេចាប់អារម្មណ៍បុ៉ណ្ណោះ ៕
ចែករំលែកព័តមាននេះ