រាជធានីភ្នំពេញ ៖ សហព័ន្ធកីឡាវាយកូនបាល់កម្ពុជា សហការជាមួយក្លិប Aspeca នឹងបង្កើតឱ្យមានព្រឹត្តិការណ៍ប្រកួតកីឡាវាយកូនបាល់ដណ្តើមពានរង្វាន់ខេត្តកែប ប្រចាំឆ្នាំ២០១៤ នៅពាក់កណ្តាលខែមីនា ដើម្បីផ្តល់ឱកាសឱ្យកីឡាករ កីឡាការិនីដែលជាកុមារតូចៗទទួលការបណ្តុះបណ្តាលពីសហព័ន្ធកីឡាវាយកូនបាល់កម្ពុជា បានបញ្ចេញនូវសមត្ថភាពរបស់ខ្លួនតាមរយៈការប្រកួត ។
ប្រធានក្លិបកីឡាវាយកូនបាល់ Aspeca ដែលមានទីតាំងនៅខេត្តកែប លោកងោ ស៊ីសុវត្ថិផល បានថ្លែងឱ្យដឹងកាលពីពេលថ្មីៗកន្លងមកថា នៅពាក់កណ្តាលខែមីនា ឆ្នាំ២០១៤ ខាងមុខនេះ លោកនឹងរៀបចំព្រឹត្តិការណ៍ប្រចាំឆ្នាំដ៏អស្ចារ្យមួយក្នុងសាលាខេត្តកែបគឺ «ការប្រកួតកីឡាវាយកូនបាល់ដណ្តើមពានរង្វាន់ប្រចាំខេត្តកែប» ។ លោកបន្តថា នេះគឺជាលើកទី៣ ហើយដែលក្លិបកីឡាវាយកូនបាល់ Aspeca បានរៀបចំព្រឹត្តិការណ៍ប្រកួតកីឡាវាយកូនបាល់ដណ្តើមពានរង្វាន់ខេត្តកែបនេះឡើង ហើយគម្រោងក្នុងឆ្នាំទី៣ នេះដែរប្រើរយៈពេលជិត១សប្តាហ៍សម្រាប់ធ្វើការប្រកួត ដោយចាប់ផ្តើមពីថ្ងៃទី១៤ ដល់ថ្ងៃទី១៩ ខែមីនា ឆ្នាំ២០១៤ ទើបបញ្ចប់ ។ សម្រាប់វិញ្ញាសាមាន៣ប្រភេទដាក់ឱ្យកីឡាករ-កីឡាការិនីក្មេងៗមកពីបណ្តាខេត្តក្នុងប្រទេសកម្ពុជាធ្វើការប្រកួត ក្នុងនោះមានវិញ្ញាសាប្រភេទអាយុក្រោម១៨ឆ្នាំ, អាយុក្រោម១៤ឆ្នាំ និងអាយុក្រោម១២ឆ្នាំ ។
លោករំពឹងទុកថា ឆ្នាំនេះនឹងមានអ្នកចូលរួមច្រើនជាងឆ្នាំមុនមិនខានឡើយ ។ បុ៉ន្តែដើម្បីផ្សព្វផ្សាយព្រឹត្តិការណ៍នេះឱ្យកាន់តែល្បីល្បាញ និងទទួលបានការចាប់អារម្មណ៍លើឆាកអន្តរជាតិនោះ លោកក៏ត្រៀមរៀបចំវិញ្ញាសាប្រកួតកីឡាករធំៗជាលក្ខណៈអន្តរជាតិផងដែរ ដោយមានការចូលរួមពីកីឡាករបរទេសជាច្រើនដូចជា កីឡាករអាជីពមកពីបារាំង ជបុ៉ន និងកីឡាករមកពីថៃជាដើម ។
គួររំលឹកថា កាលពីឆ្នាំកន្លងទៅ ការប្រកួតកីឡាវាយកូនបាល់ដណ្តើមពានរង្វាន់ខេត្តកែបនេះ មានកីឡាករ-កីឡាការិនីក្មេងៗមកពីតាមបណ្តាក្លិប-សមាគមក្នុងស្រុកចំនួនជាង៨០នាក់ កីឡាករបរទេស និងកីឡាករខ្មែរធំៗចំនួន២៤នាក់ផ្សេងទៀតចូលរួមផងដែរ ៕
ចែករំលែកព័តមាននេះ