រាជធានីភ្នំពេញ ៖ មានការអះអាងជាច្រើនថា ហេតុផលដែលនាំឱ្យមានការផ្អាកប្រដាល់នៅបុ៉ស្តិ៍លេខ៥ ក្នុងរយៈពេលយូរនេះគឺដោយសារតែគ្មានស្ពុនស័រ និងប្រព័ន្ធផ្សាយរបស់បុ៉ស្តិ៍នេះនៅមិនទាន់រៀបរយ ។ បន្ថែមលើហេតុផលនេះ ក៏មានបញ្ហាចម្បងផ្សេងទៀតដែលនាំឱ្យការរៀបចំការប្រដាល់ទាំងមូលត្រូវរាំងស្ទះរហូតមកទល់នឹងពេលនេះផងដែរ ។
រាជធានីភ្នំពេញ ៖ មានការអះអាងជាច្រើនថា ហេតុផលដែលនាំឱ្យមានការផ្អាកប្រដាល់នៅបុ៉ស្តិ៍លេខ៥ ក្នុងរយៈពេលយូរនេះគឺដោយសារតែគ្មានស្ពុនស័រ និងប្រព័ន្ធផ្សាយរបស់បុ៉ស្តិ៍នេះនៅមិនទាន់រៀបរយ ។ បន្ថែមលើហេតុផលនេះ ក៏មានបញ្ហាចម្បងផ្សេងទៀតដែលនាំឱ្យការរៀបចំការប្រដាល់ទាំងមូលត្រូវរាំងស្ទះរហូតមកទល់នឹងពេលនេះផងដែរ ។
លោកសេង កដិកា អគ្គនាយករងទូរទស្សន៍បុ៉ស្តិ៍លេខ៥ និងជាអ្នករៀបចំព្រឹត្តិការណ៍ប្រដាល់ប្រចាំក្នុងស្ថាប័ននេះបានប្រាប់ភ្នាក់ងារកោះសន្តិភាពឱ្យដឹងថា មកទល់ពេលនេះសង្វៀនរបស់លោកនៅមិនទាន់កំណត់កាលបរិច្ឆេទជាថ្មីថា នៅថ្ងៃណាទើបចាប់ផ្តើមការប្រកួតឡើងវិញនៅឡើយទេ បើទោះជាលោកបានអះអាងថា គ្រោងចាប់ផ្តើមនៅអំឡុងខែមីនាខាងមុខនោះក៏ដោយ ។ គម្រោងជាក់ស្តែងរបស់បុ៉ស្តិ៍លេខ៥ នឹងកំណត់យកចុងសប្តាហ៍ទី១ នៅខែក្រោយបើកប្រកួតប្រដាល់ដើម្បីឱ្យបុ៉ស្តិ៍មាននិរន្តរភាពដូចដើមក្នុងការរៀបចំព្រឹត្តិការណ៍ប្រដាល់ឱ្យបានទៀងទាត់ ។ ទោះបីយ៉ាងណា លោកមិនទាន់សង្ឃឹមទាំងស្រុងថា ការកំណត់ដែលបានគ្រោងទុកនឹងអាចកើតឡើងនៅរាល់ចុងសប្តាហ៍នាខែមីនានោះបានទេ ដោយសារតែលោកនិងក្រុមការងារទាំងមូល មានបញ្ហាមួយចំនួនមិនទាន់ដោះស្រាយឱ្យជ្រះស្រឡះ ។ បញ្ហាពាក់ព័ន្ធការរាំងស្ទះនោះត្រូវលោកអះអាងថា មកពីរេញថ្មីដែលកំពុងដំឡើងនៅសាលប្រគំតន្ត្រីផ្សារបឹងត្របែកផ្លាហ្សាមិនទាន់រួចរាល់ និងបញ្ហាប្រព័ន្ធអង់តែនរបស់បុ៉ស្តិ៍នេះតែម្តង មិនទាន់រួចរាល់តាមការចង់បាន ។
ទោះយ៉ាងណា នោះមិនមែនជាហេតុផលតែម្ខាងដែលនាំឱ្យការផ្អាកប្រដាល់របស់បុ៉ស្តិ៍លេខ៥ បន្តអូសបន្លាយពេលមកទល់ពេលនេះនោះទេ ដ្បិតមានការទម្លាយបន្ថែមទៀតថា បញ្ហាខ្ចាត់ខ្ចាយនូវធនធានអ្នកដឹកនាំ និងក្រុមការងារជំនាញក្នុងអំឡុងពេលរុះរើអង់តែន ក៏ជារឿងសំខាន់ដោះស្រាយមិនទាន់ចេញដែរ ។ ប្រភពពីបុគ្គលិកនៅបុ៉ស្តិ៍លេខ៥ បានប្រាប់ឱ្យដឹងថា ការរាំងស្ទះមិនអាចរៀបចំការប្រដាល់បានរបស់បុ៉ស្តិ៍នេះ គឺបណ្តាលមកពីមន្ត្រីជំនាញម្នាក់ដែលជាអ្នកជ្រើសរើសកីឡាករនាពេលកន្លងមកបានលាឈប់ពីការងារ ហើយទៅបម្រើការនៅក្នុងស្ថានីយទូរទស្សន៍អាស៊ីអាគ្នេយ៍ជំនួសវិញ ។ ប្រភពដដែលបានឱ្យដឹងថា ការផ្អាកចោលកម្មវិធីបូករួមទាំងការប្រដាល់នាពេលមុនផង បានធ្វើឱ្យធនធានអ្នករៀបចំកីឡាប្រដាល់រត់ចោលបុ៉ស្តិ៍លេខ៥ អស់មួយចំនួនធំ ។ ត្រង់ចំណុចហ្នឹងហើយដែលធ្វើឱ្យការប្រដាល់របស់បុ៉ស្តិ៍នេះត្រូវព្យួរចោល ដោយចេះតែបន្តការពន្យារពេលពីមួយដំណាក់កាលទៅមួយដំណាក់កាលមិនទាន់ច្បាស់លាស់ថា អាចប្រព្រឹត្តឡើងវិញនៅពេលណា ? បើទោះជាបុ៉ស្តិ៍នេះត្រូវគេដឹងថា បានដំឡើងអង់តែនផ្សាយរបស់ខ្លួនបានច្បាស់ដូចដើម បុ៉ន្តែហេតុផលនេះនៅតែត្រូវគេលើកមកធ្វើជាលេសដើម្បីការពារការលើកឡើងដែលនៅតែងឿងឆ្ងល់ចំពោះការលុបចោលនូវកម្មវិធីផ្សេងៗដែលគ្រោងដំណើរការតាំងពីដើមខែមករាកន្លងទៅ ។
ប្រភពដដែលនិយាយថា បើនិយាយរឿងអង់តែនគេចាត់ទុកថា រួចរាល់អស់ហើយ បុ៉ន្តែហេតុផលដែលការប្រដាល់ចេញមិនទាន់រួច គឺដោយសារតែធនធានដែលជាអ្នករៀបចំនោះផ្ទាល់តែម្តង បែកខ្ញែកគ្នាអស់ ដែលនៅមិនទាន់រកបានអ្នកមានទេពកោសល្យមកទទួលខុសត្រូវការងារជំនួសបាននៅឡើយ ។ មន្ត្រីដែលបានដេើរចេញពីបុ៉ស្តិិ៍លេខ៥ នោះត្រូវគេស្គាល់ថា ជាអ្នកច្បាស់ការណ៍ជុំវិញការរៀបចំប្រដាល់ផង និងជាអ្នកជំនាញក្នុងការស្វែងរកស្ពុនស័រឱ្យចូលទ្រទ្រង់ក្នុងកម្មវិធីប្រដាល់ប្រចាំបុ៉ស្តិ៍ផង ។ អុីចឹងហើយ ទើបធ្វើឱ្យការប្រដាល់ដែលបានគ្រោងឡើងត្រូវអាក់ខាន ព្រោះទី១-អ្នកថ្មីមិនសូវពូកែរកស្ពុនស័រចូល និងទី២-ការបែងចែកការងារផ្សេងៗសម្រាប់អ្នកទទួលជំនួសនៅមិនទាន់រលូន ។ លោកសេង កដិកា បានទទួលស្គាល់ថា មន្ត្រីដែលជាជំនួយការទទួលបន្ទុកការរៀបចំកីឡាប្រដាល់ដ៏ជំនិតរបស់លោក ពិតជាបានចាកចេញពីបុ៉ស្តិ៍លេខ៥ អីុចឹងមែន ទើបធ្វើឱ្យការប្រដាល់ទាំងមូលត្រូវជួបប្រទះនឹងភាពរាំងស្ទះមួយចំនួន។ បុ៉ន្តែលោកអះអាងថា នោះមិនមែនជាហេតុផលដែលនាំឱ្យការប្រដាល់របស់បុ៉ស្តិ៍លោកចេញមិនរួចនោះឡើយ បុ៉ន្តែអ្វីដែលជួបបញ្ហានោះគឺដោយសារតែលោកខ្លួនឯងចង់ឱ្យការគ្រោងទុកទាំងបុ៉ន្មានមានភាពច្បាស់លាស់ជាងគេបន្តិចបុ៉ណ្ណោះ ។
លោកអះអាងតបនឹងការចោទឡើងថា ការប្រដាល់ដែលបានគ្រោងឡើង គឺនឹងធ្វើនៅអំឡុងខែមីនាខាងមុខ បុ៉ន្តែអ្វីៗចេញរួចឬមិនរួច មិនមែនដោយសារបាត់បង់ធនធានមនុស្សមួយចំនួននោះទេ បុ៉ន្តែហេតុផលសំខាន់គឺរង់ចាំម្ចាស់ស្ពុនស័រស៊ីញ៉េកុងត្រាដើម្បីចូលកម្មវិធីទៅវិញទេ ។ លោកអះអាងថា កម្មវិធីថ្មីទាំងអស់របស់បុ៉ស្តិ៍លេខ៥ ចាប់ពីឆ្នាំ២០១៤ តទៅ បើគ្មានអ្នកឧបត្ថម្ភ ឬចេញទៅមិនបានរួចខ្លួន នឹងត្រូវលើកពេលទាំងអស់ដោយសារបុ៉ស្តិ៍មិនមានយុទ្ធសាស្ត្រចំណាយប្រាក់ខាតទុកជាមុននៅក្រោយការដំឡើងអង់តែនដែលទើបរួចរាល់នេះទេ ។ ត្រង់ហ្នឹងហើយដែលចេះតែធ្វើឱ្យកម្មវិធីប្រដាល់បូករួមទាំងកម្មវិធីជាច្រើនផ្សេងទៀតរបស់បុ៉ស្តិ៍នេះបានត្រឹមតែដាក់គម្រោង ហើយត្រូវពន្យារពេលមួយខែហើយមួយខែទៀតមិនអាចលេចចេញរូបរាង ។ លោកនៅតែមានជំនឿថា សប្តាហ៍ទី១របស់ខែមីនា នឹងក្លាយជាការប្រកួតប្រដាល់បើកឆាករបស់បុ៉ស្តិ៍លេខ៥ ដោយគ្មានការកែប្រែ ប្រសិនបើក្រុមហ៊ុនស្ពុនស័រទាំងអស់ដែលបុ៉ស្តិ៍លេខ៥ បានទាក់ទងទាំងបុ៉ន្មានយល់ព្រមចុះកិច្ចសន្យានៅចុងខែកុម្ភៈនេះ ។ តាមរយៈការបញ្ជាក់នេះមានន័យថា ការប្រដាល់ដែលគ្រោងប្រព្រឹត្តឡើងនៅចុងសប្តាហ៍ទី១ នាខែមីនា នឹងចេញរួចឬមិនរួច អាស្រ័យទៅលើចំណុចមួយនេះ ចំណែកបញ្ហារេញនិងក្រុមបច្ចេកទេស ខាងបុ៉ស្តិ៍លេខ៥ របស់លោកបានចាត់ចែងអ្នកមានជំនាញឱ្យមកជំនួសមន្ត្រីចាស់ៗដែលបានលាឈប់អស់ទៅហើយ ។
ក្រោយពីដំណើរការប្រដាល់ប្រចាំសប្តាហ៍ដូចកាលស្ថាប័នមួយនេះមិនទាន់រើអង់តែន បុ៉ស្តិ៍លេខ៥ ក៏នឹងធ្វើការប្រដាល់ជាអន្តរជាតិនៅរៀងរាល់មួយខែម្តងដូចដែលធ្លាប់អនុវត្តកាលពីពេលកន្លងមកនោះទៀតផង ដើម្បីស្រូបទាញអ្នកនិយមការប្រដាល់របស់បុ៉ស្តិ៍នេះតាំងពីណាពីណីមកឱ្យទទួលស្គាល់ចំពោះការរៀបចំព្រឹត្តិការណ៍ប្រដាល់ដំបូងគេរបស់ស្ថាប័ននេះម្តងទៀត ។ ទន្ទឹមនឹងការប្តូរទីតាំងចំទីប្រជុំជននៅបឹងត្របែកដែលរំពឹងថា នឹងមានមនុស្សកកកុញជាងមុន លោកសេង កដិកា ក៏មានគម្រោងរៀបចំការប្រដាល់ដែលមានលក្ខណៈប្រកួតប្រជែងគ្នាតាមបណ្តាខេត្ត ឬប្រកួតប្រចាំត្រីមាសដែលមានទម្រង់ខុសប្លែកពីការប្រដាល់ដែលមានស្រាប់នៅបុ៉ស្តិ៍ផ្សេងនោះផងដែរ ៕
ចែករំលែកព័តមាននេះ