រាជ​ធានី​ភ្នំពេញ​ ៖ បន្ទាប់​ពីទទួល​បាន​ភាព​ជោគ​ជ័យ​លើ​ការ​រៀបចំ​ព្រឹត្តិ​ការណ៍​រត់​ប្រណាំង​ពាក់​កណ្តាល​ម៉ារ៉ាតុង​ជាច្រើន​លើក​ ពេល​នេះ​គណៈ​កម្មាធិការអូឡាំ​ពិក​កម្ពុជា​ (NOCC) នឹង​រៀបចំព្រឹត្តិ​ការណ៍​ប្រកួតរត់​ប្រណាំង​ម៉ារ៉ាតុង​អន្តរ​ជាតិ​លើក​ទី​១ (The 1st Angkor Empire Full & Half Marathon) នៅ​លើ​ទឹកដី​ខេត្ត​សៀម​រាប​អង្គរ​ នាថ្ងៃទី​១៧​ ខែ​សីហា​ ឆ្នាំ​២០១៤។​

ក្នុងសន្និសីទ​សារ​ព័ត៌​មាន​ស្តីពីការ​រៀបចំ​ទិវា​រត់​ប្រណាំង​ពាក់​កណ្តាល​ម៉ារ៉ាតុង​លើក​ទី​៣​ នៅ​ខេត្ត​ព្រះ​សីហនុ​ កាល​ពី​ថ្ងៃទី​១០ កុម្ភៈ​កន្លងទៅ​នេះ​​ អគ្គ​លេខាធិការ​ NOCC លោក​វ៉ាត់ ចំរើន​ បាន​ថ្លែងថា​ ឆ្នាំ​២០១៤​ នេះ​ កម្ពុជា​នឹង​រៀបចំ​ឱ្យ​មាន​ព្រឹត្តិ​ការណ៍​រត់​ប្រណាំង​ម៉ារ៉ាតុង​អន្តរ​ជាតិ (Full Marathon) លើក​ដំបូង​នៅ​អង្គរវត្ត​ខេត្ត​សៀម​រាប ដើម្បី​បង្ហាញ​អំពី​សក្តា​នុពល​នៃ​ប្រភេទ​កីឡាអត្ត​ពល​កម្ម​កម្ពុជា​ ក៏​ដូច​ជា​ទាក់​ទាញ​ភ្ញៀវ​ទេសចរ​ឱ្យ​មក​ទស្សនា​ប្រាង្គ​ប្រាសាទ​អង្គរ​វត្ត​ដ៏​អស្ចារ្យ​របស់​​យើង​ផង​ដែរ​ ។ សម្រាប់​ទឹក​ប្រាក់​ដែល​ទទួលបាន​ពី​ការរៀបចំ​ព្រឹត្តិ​ការណ៍​នេះ​ គឺ​យើង​យក​ទៅ​ប្រើ​ធ្វើ​ជា​ជំនួយ​សប្បុរស​ធម៌​ដល់​បណ្តា​មន្ទីរ​ពេទ្យ និង​ជន​ក្រី​ក្រ​ខ្វះ​លទ​្ធ​ភាព ។ លោក​បាន​ថ្លែង​បន្ត​ទៀត​ថា​ ការ​រៀបចំ​ព្រឹត្តិ​ការណ៍​រត់​ប្រណាំង​ម៉ារ៉ា​តុង​ចម្ងាយ​៤២​គីឡូ​ម៉ែត្រ​លើក​ទី១​នេះ​ដែរ​ គឺ​យើង​ធ្វើ​ឡើង​ក្រោយ​ពី​មាន​សំណូម​ពរ​ពី​កីឡាករ-​កីឡាការិនី​ជាតិ​ ​និង​បរ​ទេស​ដែល​ធ្លាប់​បាន​ចូលរួម​រត់​ពាក់​កណ្តាល​ម៉ារ៉ា​តុង​អន្តរ​ជាតិ​សៀម​រាប​អង្គរ​កន្លង​មក និង​ព្រឹត្តិ​ការណ៍​រត់​ពាក់​កណ្តាល​ម៉ារ៉ា​តុង​ផ្សេងៗ​ដោយ​ពួកគាត់​បាន​សំណូម​ពរ​ឱ្យ​គណៈ​កម្មាធិការ​រៀបចំ​ការប្រកួត​បង្កើត​ព្រឹត្តិ​ការណ៍​ Full Marathon នេះ​ឡើង ។​

លោក​វ៉ាត់ ចំរើន បាន​បញ្ជាក់​បន្ថែម​ទាំង​អារម្មណ៍​សប្បាយ​រីក​រាយ​ទៀត​ថា គ្រាន់​តែ​យើង​ចាប់​ផ្តើម​ផ្សព្វ​ផ្សាយ​អំពី​ការ​រៀបចំព្រឹត្តិ​ការណ៍​រត់​ម៉ារ៉ាតុង​អន្តរ​ជាតិ (Full Marathon) ចម្ងាយ​៤២​គីឡូ​ម៉ែត្រ​នេះ​ភ្លាម​ ឥឡូវ​នេះ​យើង​ទទួលបាន​អ្នក​ចុះឈ្មោះ​​ចូលរួម​រហូត​ដល់​ជាង​២០០​នាក់​ទៅ​ហើយ ។​ ដូច្នេះ​ទម្រាំ​ដល់​ថ្ងៃ​ចាប់​ផ្តើម​ (ថ្ងៃទី​១៧ សីហា)​ យើងរំពឹង​ថា​ នឹង​មាន​អ្នក​ចូលរួម​យ៉ាង​ច្រើន​កុះ​ករ​មិន​ខាន ។​ អគ្គ​លេខាធិការ​ NOCC រូប​នេះ​បាន​បន្ត​ទៀត​ថា​ ដើម្បី​ធ្វើ​ឱ្យ​វិស័យ​កីឡា​អត្ត​ពល​កម្ម​កម្ពុជា​កាន់​តែ​មាន​សក្តា​នុពល​នៅ​លើ​ឆាក​អន្តរ​ជាតិ​ យើង​នឹង​ខិត​ខំ​ប្រឹង​ប្រែង​រៀបចំ​ព្រឹត្តិ​ការណ៍​ Full Marathon ឱ្យ​មាន​កាន់តែច្រើន​ក្នុងប្រទេស​កម្ពុជា​ ជាពិសេស​គឺ​នៅ​រាជ​ធានី​ភ្នំពេញ​តែ​ម្តង ព្រោះ​ការរត់​ចម្ងាយ​៤២​គីឡូ​ម៉ែត្រ​នេះ​ក៏​មាន​រៀបចំ​វិញ្ញាសា​រត់​ចម្ងាយ​២១​គីឡូ​ម៉ែត្រ​ ១០​គីឡូ​ម៉ែត្រ និង​៥​គីឡូ​ម៉ែត្រ​ផងដែរ ។​

សូម​បញ្ជាក់​ថា​ ព្រឹត្តិ​ការណ៍​ Full Marathon ដែល​រត់​ចម្ងាយ​៤២​គីឡូ​ម៉ែត្រ​នេះ​នៅ​បណ្តា​ប្រទេស​មួយ​ចំនួន​លើ​ពិភព​លោក​ គេបាន​ធ្វើ​ជា​ច្រើន​លើក​រួច​មក​ហើយ​នៅ​ឡើយ​តែ​កម្ពុជា​ដែល​នេះ​ជា​លើក​ដំបូង ។​ ក្រៅ​ពី​ព្រឹត្តិ​ការណ៍​នេះ​ NOCC ក៏​មាន​គម្រោង​បង្កើត​ព្រឹត្តិ​ការណ៍​រត់​ប្រណាំង​ម៉ារ៉ា​តុង​ និង​ពាក់​កណ្តាល​ម៉ារ៉ា​តុង​នៅ​លើ​ទឹកដី​ដែល​ជា​តំបន់​ទេសចរណ៍​នៅ​ក្នុង​ប្រទេស​កម្ពុជា​ផងដែរ​ ដូចជា​នៅ​ខេត្ត​រតន​គិរី,​ បាត់​ដំបង​, កំពង់ចាម​ ។ល។​ ដែល​ពេល​នេះ​កិច្ច​ការ​ទាំង​នោះ​ត្រូវបាន​ថ្នាក់ដឹក​នាំ​នៃ​បណ្តា​ខេត្ត​ទាំង​នោះ​ ក៏​ដូចជា​គណៈ​កម្មាធិការជាតិ​អូឡាំ​ពិក​កម្ពុជា​កំពុង​ពិភាក្សា​គ្នា​ហើយ ៕