រាជធានីភ្នំពេញ ៖ ការប្រកួតប្រដាល់វគ្គជម្រុះដណ្តើមខ្សែក្រវាត់ស្រាបៀរភ្នំពេញក្នុងប្រភេទទម្ងន់៥៤គីឡូក្រាមជុំទី១ នឹងចាប់ផ្តើមនៅថ្ងៃព្រហស្បតិ៍ ទី១៣ កុម្ភៈនេះតទៅហើយ ។ បើកឆាកប្រកួតថ្ងៃដំបូង កីឡាករទឹម សុជាតិ មកពីក្លិបកងរាជអាវុធហត្ថរាជធានីភ្នំពេញ ត្រូវជួបជាមួយកីឡាករគឿម សុវណ្ណឌឿត មកពីក្លិបមោងឫស្សី ខេត្តបាត់ដំបង ចំណែក កែវ សុផានិត មកពីក្លិបសំរោងកោងកីឡា ខេត្តបាត់ដំបង ជួបជាមួយកីឡាករអាន មុន្នី មកពីសមាគមយុវជនកម្ពុជាខណ្ឌមានជ័យ ។
គួររំលឹកផងដែរថា នេះគឺជាលើកទី១ ហើយដែលក្រុមហ៊ុនស្រាបៀរភ្នំពេញបានរៀបចំឱ្យមានព្រឹត្តិការណ៍នៃការប្រកួតប្រដាល់នេះឡើង ។ សម្រាប់ការប៉ះគ្នាជាលើកដំបូងរវាងកីឡាករទាំង៤រូបខាងលើនេះគេមិនទាន់ដឹងថា អ្នកណាមានសំណាងរកបាន៣ពិន្ទុមុនទេ ។ ទឹម សុជាតិ និងគឿម សុវណ្ណឌឿត ពីមុនមកមិនធ្លាប់ជួបគ្នាម្តងណាឡើយ ទើបតែលើកនេះបុ៉ណ្ណោះដែលគេបានជួបគ្នានៅក្នុងព្រឹត្តិការណ៍ប្រកួតដណ្តើមខ្សែក្រវាត់ស្រាបៀរភ្នំពេញ។ ទឹម សុជាតិ គឺជាអ្នកប្រដាល់ជើងថ្មី និងមិនសូវឃើញលេចមុខនៅលើសង្វៀនញឹកញាប់ទេ ទើបគេពិបាកវាយតម្លៃពីសមត្ថភាពប្រកួតរបស់កីឡាកររូបនេះខ្លាំងណាស់ ។ តាមរយៈនៃការឡើងសង្វៀនម្តងម្កាលរបស់គេពីមុនមកនោះ បើពិនិត្យមើលទៅលើក្បាច់ប្រយុទ្ធរបស់គេ កីឡាកររូបនេះអត់ចេះស្នៀតអីក្រៅពីការប្រើជើងទាត់ និងកណ្តាប់ដៃម៉ាត់បុ៉ណ្ណោះ រីឯស្នៀតកែង និងជង្គង់វិញប្រើការមិនកើតឡើយ ។ ចំណែកឯ គឿម សុវណ្ណឌឿត វិញគេឧស្សាហ៍ឡើងសង្វៀនញឹកញាប់ណាស់ ទើបគេដឹងច្បាស់ពីសមត្ថភាពប្រកួតរបស់កីឡាកររូបនេះ ។ គឿម សុវណ្ណឌឿត មានស្នៀតប្រយុទ្ធល្អទាំងព្រម ជាពិសេសស្នៀតកែង និងជង្គង់របស់គេពេលវាយចេញម្តងៗបង្កគ្រោះថ្នាក់ខ្លាំងណាស់ រីឯចិត្តក៏សឿងគ្រាន់បើណាស់ដែរ ។ ទោះបីជាយ៉ាងណា គេមិនហ៊ានអួតទុកមុនថា នឹងអាចយកឈ្នះ ទឹម សុជាតិ បានដែរព្រោះអីរវាងពួកគេទាំងពីរទើបតែប៉ះគ្នាជាលើកទី១ មិនទាន់ដឹងពីល្បិចប្រយុទ្ធគ្នាទៅវិញទៅមក ។
រីឯការជួបគ្នារវាង កែវ សុផានិត និង អាន មុន្នី វិញនោះក៏ពិបាកធ្វើការទស្សន៍ទាយលទ្ធផលទុកមុនខ្លាំងណាស់ដែរ ដោយសារតែពួកគេទាំងពីរមិនធ្លាប់ជួបគ្នាពីមុនមក ។ កែវ សុផានិត គេមិនសូវឮឈ្មោះនៅក្នុងពិភពប្រដាល់ឡើយ ចំណែក អាន មុន្នី ល្បីឈ្មោះគួរសម តែគេមិនអាចវាយតម្លៃទុកមុនថា អ្នកណាខ្លាំងជាងអ្នកណាដែរ ដូច្នេះចាំមើលគូនេះអ្នកណារកបាន៣ពិន្ទុមុន ។ ចំណែកគូប្រកួតមិត្តភាពវិញ កីឡាករចៅ ផលឌឿ មកពីក្លិបសំរោងកោងកីឡា ខេត្តបាត់ដំបង ជួបជាមួយកីឡាករយឹម ឌៀប មកពីសមាគមកីឡាប្រដាល់ក្រសួងការពារជាតិ ។
កីឡាករផៃ គឹមហឿត មកពីក្លិបខេមរិន្ទមានឫទ្ធិ ជួបជាមួយកីឡាករថុល មករា មកពីក្លិបឃ្លាំងមឿងកីឡាខេត្តពោធិ៍សាត់ និងកីឡាករហង្ស រស្មី មកពីក្លិបក្រុងប៉ោយប៉ែត ជួបជាមួយកីឡាករសយ សី មកពីក្លិបពន្លឺវិបុលរិទ្ធី ៕
ចែករំលែកព័តមាននេះ