ជាធម្មតានៅក្នុងភោជនីយដ្ឋាននីមួយៗតែងតែមានអ្នកបម្រើប្រុស ឬស្រី ប៉ុន្តែបើតាមប្រភពបរទេសនាពេលថ្មីៗនេះបានបង្ហាញនូវរឿងរ៉ាវដ៏គួរឱ្យភ្ញាក់ផ្អើលមួយ ខណៈដែលនៅក្នុងប្រទេសជប៉ុន បានយកសត្វស្វាមកធ្វើជាអ្នកបម្រើនៅក្នុងភោជនីយដ្ឋានរបស់ខ្លួន។ នេះជាគឺសេវាកម្មបម្រើភ្ញៀវដ៏ចម្លែកបំផុតនៅក្នុងប្រទេសជប៉ុន ដែលនេះគឺជាវិធីសាស្ត្រប្រកួតប្រជែងទីផ្សារ និងទាក់ទាញភ្ញៀវឱ្យចូលទទួលទានអាហារនៅក្នុងភោជនីយដ្ឋានរបស់ខ្លួនតែប៉ុណ្ណោះ ។
ប្រភពដដែលបានឱ្យដឹងទៀតថា «ភោជនីយដ្ឋាននេះ មានទីតាំងស្ថិតនៅភាគខាងជើងនៃទីក្រុងតូក្យូ នៃប្រទេសជប៉ុន ហើយរៀបចំឡើងមានលក្ខណៈជារបៀបបុរាណបែបប្រពៃណីជប៉ុន ។ ម្ចាស់ភោជនីយដ្ឋានបានឱ្យសត្វស្វាដែលត្រូវជាអ្នកបម្រើទាំងអស់នោះ ស្លៀកពាក់របាំងមុខ និងសក់ ប្រៀបដូចជាមនុស្សស្រីម្នាក់អីុចឹង ។ ការបើកសម្ពោធភោជនីយដ្ឋានថ្មី គួបផ្សំនឹងមានការបម្រើសេវាកម្មពីសំណាក់សត្វស្វា គឺរឹតតែបានទាក់ទាញភ្ញៀវបានជាច្រើនចូលមកទទួលទានអាហារ ។ នេះគឺជាភាពជោគជ័យរបស់ម្ចាស់ភោជនីយដ្ឋាន ពីព្រោះភោជនីយដ្ឋានទើបបើកដំណើរការតែក្នុងរយៈពេលខ្លី ក៏ប៉ុន្តែមានភ្ញៀវចូលទៅទទួលទានអាហារមិនចាញ់ភោជនីយដ្ឋានដែលគេបើកយូរឆ្នាំនោះឡើយ ។
បើតាមពាក្យសម្តីរបស់លោក Yat Chan ដែលត្រូវជាម្ចាស់ភោជនីយដ្ឋានបាននិយាយថា «នៅក្នុងភោជនីយដ្ឋានរបស់គាត់មានទាំងអ្នកបម្រើជាមនុស្ស និងអ្នកបម្រើជាសត្វស្វា ពោលគឺពួកគេអាចបំពេញតួនាទីបានខុសៗពីគ្នា ។ សត្វស្វាទាំងនោះសុទ្ធតែបានបង្ហាត់បង្រៀនរួចជាស្រេច ទើបបានយកមកបម្រើភ្ញៀវ ។ ស្វាទាំងនោះអាចលើកម្ហូបអាហារ និងអង្គុយកំដរភ្ញៀវ ពួកវាធ្វើក្នុងមួយថ្ងៃតែ២ម៉ោងប៉ុណ្ណោះ ព្រោះបើឱ្យពួកវាធ្វើការលើសពីនេះ គឺប៉ះពាល់ទៅដល់សិទ្ធិដែលគេបានចែងនៅក្នុងច្បាប់របស់ប្រទេសជប៉ុន ។ ពេលដល់ម៉ោងកំណត់ គាត់ឱ្យសត្វស្វាមួយឈប់ បន្ទាប់មកគាត់បានយកសត្វស្វាមួយថ្មីទៀត ។ គាត់តែងតែផ្លាស់ប្តូរវេនធ្វើការរបស់វាជានិច្ច ដើម្បីចៀសវាងការរំលោភបំពានច្បាប់ និងសិទ្ធិរបស់សត្វ ។ លោក Yat Chan បាននិយាយបន្តទៀតថា គាត់ពិតជាសប្បាយចិត្តណាស់ ដោយសារតែមានភ្ញៀវជាច្រើនបានចូលមកទទួលទានអាហារនៅភោជនីយដ្ឋានរបស់គាត់ ។ ទោះបីជាយ៉ាងណាក៏ដោយ គាត់នឹងខិតខំបម្រើភ្ញៀវយ៉ាងណាមិនឱ្យទាស់ចិត្តទេ ហើយសង្ឃឹមថា ភ្ញៀវទាំងអស់នៅតែគាំទ្រ និងចូលមកទទួលទានអាហារនៅភោជនីយដ្ឋានរបស់គាត់ជាបន្តទៀត» ៕
ចែករំលែកព័តមាននេះ