រាជធានីភ្នំពេញ ៖ គណៈកម្មាធិការជាតិអូឡាំពិកកម្ពុជា សហការជាមួយគណៈកម្មការរៀបចំទិវារត់ប្រណាំងម៉ារ៉ាតុង ដោយមានការចូលរួមពីដៃគូឧបត្ថម្ភដ៏សំខាន់គឺស្រាបៀរអង្គរ នឹងរៀបចំកម្មវិធីទិវារត់ប្រណាំងពាក់កណ្តាលម៉ារ៉ាតុងអន្តរជាតិលើកទី៣ នៅខេត្តព្រះសីហនុ នាថ្ងៃទី៩ ខែមីនា ឆ្នាំ២០១៤ ខាងមុខនេះ ក្រោមបាវចនា «រត់ប្រណាំងម៉ារ៉ាតុងដើម្បីការពារធម្មជាតិ សង្គ្រោះផែនដី និងសុខុមាលភាពនៃមនុស្សលោក» ។
នៅក្នុងសន្និសីទសារព័ត៌មានកាលពីព្រឹកថ្ងៃទី១០ ខែកុម្ភៈ លោកវ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានមានប្រសាសន៍ថា ទិវារត់ប្រណាំងពាក់កណ្តាលម៉ារ៉ាតុងអន្តរជាតិលើកទី៣ ដែលនឹងរៀបចំធ្វើនៅខេត្តព្រះសីហនុ នាថ្ងៃទី៩ មីនាខាងមុខនោះ គឺជាផ្នែកមួយនៃសកម្មភាពមនុស្សធម៌ដើម្បីរកមូលនិធិជួយដល់មន្ទីរពេទ្យកុមារជាតិ និងជួយដល់កុមារកំព្រាដែលខ្វះលទ្ធភាពសិក្សា ព្រមទាំងយុវជនផងដែរ ។ ព្រឹត្តិការណ៍អន្តរជាតិខាងលើនេះរៀបចំឡើងដោយគណៈកម្មាធិការជាតិអូឡាំពិកកម្ពុជា និងគណៈកម្មការរៀបចំទិវារត់ប្រណាំងម៉ារ៉ាតុងខេត្តព្រះសីហនុ ដោយមានការចូលរួមសហការឧបត្ថម្ភពីក្រុមហ៊ុនឯកជនជាច្រើនទៀត ដើម្បីផ្សព្វផ្សាយកីឡាទេសចរណ៍នាឆ្នេរសមុទ្រស្អាតនៃប្រទេសកម្ពុជា រួមទាំងបណ្តុះគំនិតការពារថែរក្សាបរិស្ថានធម្មជាតិតាមរយៈព្រឹត្តិការណ៍នេះ ។ លោកវ៉ាត់ ចំរើន បានអំពាវនាវដល់ប្រជាពលរដ្ឋខ្មែរទាំងអស់ត្រូវរួសរាន់ចុះឈ្មោះចូលរួមរត់ក្នុងព្រឹត្តិការណ៍អន្តរជាតិមួយនេះឱ្យបានច្រើនកុះករ ដើម្បីកសាងប្រវត្តិសាស្ត្រ ថែរក្សាតំបន់ឆ្នេរដ៏ស្រស់ស្អាតរបស់ប្រទេសជាតិយើង ។
ចំណែកលោកសែម ផល្លា អ្នកចាត់ការទូទៅនៃព្រឹត្តិការណ៍រត់ពាក់កណ្តាលម៉ារ៉ាតុងខាងលើបានឱ្យដឹងដែរថា ទោះបីការប្រារព្ធទិវារត់ប្រណាំងពាក់កណ្តាលម៉ារ៉ាតុងនៅខេត្តព្រះសីហនុ ដែលជាកន្លែងល្អមានផ្លូវរត់ស្រួល និងមានលក្ខណសម្បត្តិធម្មជាតិល្អប្រសើរជាងប្រទេសផ្សេងៗក៏ពិតមែន តែក៏មានបញ្ហាប្រឈមមួយចំនួនដែលជាឧបសគ្គធ្វើឱ្យកំណើនអ្នកចូលរួមមានការកើនឡើងតិច ជាពិសេសភ្ញៀវបរទេសដែលពិបាកធ្វើដំណើរទៅប្រកួត ព្រោះមិនមានជើងយន្តហោះផ្ទាល់ទៅដល់ទីនោះ ។ បុ៉ន្តែទោះបីជាយ៉ាងណា សម្រាប់ឆ្នាំនេះលោកសង្ឃឹមថា នឹងមានកីឡាករ-កីឡាការិនីចូលរួមច្រើនជាងឆ្នាំមុនជាមិនខាន ដោយគិតត្រឹមថ្ងៃទី១០ ខែកុម្ភៈនេះមានអ្នកចុះឈ្មោះចូលរួមជាង១.០០០នាក់ ហើយដែលមកពី២១ប្រទេស ខណៈដែលកាលពីឆ្នាំ២០១៣ មានកីឡាករ-កីឡាការិនីចូលរួមប្រមាណជាង១.៤០០នាក់ ។
សូមបញ្ជាក់ថា ចំពោះមហាជន, កីឡាករ-កីឡាការិនី ដែលមានបំណងចូលរួមរត់ពាក់កណ្តាលម៉ារ៉ាតុងនៅខេត្តព្រះសីហនុ នៅដើមខែមីនាខាងមុខនេះអាចចុះឈ្មោះតាមរយៈគេហទំព័រ www.sihanokville-marathon.org ឬទំនាក់ទំនងតាមរយៈអាសយដ្ឋានផ្ទះលេខ៧៩C ផ្លូវលេខ១៥៥ សង្កាត់ទួលទំពូង ខណ្ឌចំការមន ទូរស័ព្ទលេខ ០២៣ ២១៣ ៥២៥, ០២៣ ២១៦ ២៩៦, ០១៦ ៦២៨ ៧៨៨, ០១៦ ៣៥៥ ០០៥ ខេត្តព្រះសីហនុ លេខទូរស័ព្ទ ០៣៤ ៩៣៣ ៦៥៦ ។ តម្លៃចុះឈ្មោះចូលរួមមាន រត់២១គីឡូម៉ែត្រ សម្រាប់ជនបរទេស៤៥ដុល្លារ ខ្មែរ១៥ដុល្លារ, រត់១០គីឡូម៉ែត្រកន្លះ ជនបរទេស៣៥ដុល្លារ ខ្មែរ១០ដុល្លារ, រត់កម្សាន្តលក្ខណៈគ្រួសារ៣គីឡូម៉ែត្រ ជនបរទេស២៥ដុល្លារ ខ្មែរ៥ដុល្លារ និងដើរកម្សាន្ត៣គីឡូម៉ែត្រ ជនបរទេស១៥ដុល្លារ ខ្មែរ៥ដុល្លារ ៕
ចែករំលែកព័តមាននេះ