រាជធានីភ្នំពេញ ៖ ជំនួបសងសឹករវាងកីឡាករវ៉ែន សាវ៉ាត មកពីក្លិបកងកេងខេត្តបាត់ដំបង ជាមួយកីឡាកររឿង សោភ័ណ្ឌ មកពីក្លិបមកុដរាជសីហ៍ នៅលើសង្វៀនបាយ័នបឹងស្នោកាលពីល្ងាចថ្ងៃអាទិត្យ ទី៩ ខែកុម្ភៈ មិនត្រឹមតែមិនបានចំណេញបុ៉ណ្ណោះទេ គឺថែមទាំងខាតដើមជាងមុនដោយសារលទ្ធផលចុងក្រោយបង្ហាញថា វ៉ែន សាវ៉ាត នៅតែសន្លប់ដូចដើមធ្វើឱ្យគេធ្លាក់ក្រេឌីតជាងមុនទៅទៀត ។
រាជធានីភ្នំពេញ ៖ ជំនួបសងសឹករវាងកីឡាករវ៉ែន សាវ៉ាត មកពីក្លិបកងកេងខេត្តបាត់ដំបង ជាមួយកីឡាកររឿង សោភ័ណ្ឌ មកពីក្លិបមកុដរាជសីហ៍ នៅលើសង្វៀនបាយ័នបឹងស្នោកាលពីល្ងាចថ្ងៃអាទិត្យ ទី៩ ខែកុម្ភៈ មិនត្រឹមតែមិនបានចំណេញបុ៉ណ្ណោះទេ គឺថែមទាំងខាតដើមជាងមុនដោយសារលទ្ធផលចុងក្រោយបង្ហាញថា វ៉ែន សាវ៉ាត នៅតែសន្លប់ដូចដើមធ្វើឱ្យគេធ្លាក់ក្រេឌីតជាងមុនទៅទៀត ។
មិនមែនជារឿងធម្មតានោះទេដែល វ៉ែន សាវ៉ាត ប្រកាសសងសឹក បុ៉ន្តែបែរជាត្រូវ រឿង សោភ័ណ្ឌ វាយឱ្យសន្លប់ធំក្នុងទឹកទី១ ដោយសារស្នៀតកែងសាជាថ្មី ដោយនឹកស្មានមិនដល់។ មុនប៉ះគ្នាលើរេញ កីឡាករបង្គោលខៀវរូបនេះរំពឹងថានឹងអាចទប់ជាប់កណ្តាប់ដៃ និងកែងដ៏មុតស្រួចរបស់កីឡាករបង្គោលក្រហម រឿង សោភ័ណ្ឌ ដោយមានជំនឿចិត្តយ៉ាងខ្លាំងថា នឹងអាចឆ្លងផុតទឹកទី៥ ។ បើទោះជាក្នុងពេលអះអាង វ៉ែន សាវ៉ាត បញ្ជាក់ថា សង្ឃឹមឈ្នះមានត្រឹមតែជាង៥០% បុ៉ន្តែក្តីសង្ឃឹមថាអាចទប់ដល់ទឹកចុងក្រោយ គឺមានកម្រិតជឿជាក់ខ្លាំង ។ ក្រុមអ្នកវិភាគនិយាយថា បើ វ៉ែន សាវ៉ាត ទប់ដល់ចុងទឹកទី៥ នោះមានន័យថា ស្នៀតនិងការវាយលុករបស់គេល្អប្រសើរជាងមុនហើយ ព្រោះកម្រិតនៃការឡើងកូដរបស់គេនៅមិនទាន់ស្មើនឹង រឿង សោភ័ណ្ឌ ទេ ដូច្នេះបើទោះជាមិនទាន់បានឈ្នះលើកទី២នេះ ក៏អាចមានន័យថា បន្ថយឥទ្ធិពលរបស់គូប្រកួតបន្តិចផងដែរ ។ បុ៉ន្តែមិនខុសពីការគ្រោងទុកមែន គ្រាន់តែចាប់ផ្តើមភ្លាម ក៏សន្លប់នៅពាក់កណ្តាលទឹកទី១ តែម្តង ខណៈដែលការប្រកួតលើកទី១ គឺរហូតដល់ចុងទឹកទី៣ ឯណោះទើប រឿង សោភ័ណ្ឌ មានឱកាសវាយកែងឱ្យ វ៉ែន សាវ៉ាត សន្លប់ស្តូកនៅលើរេញ ។
លទ្ធផលច្រំដែលតែខាតជាងមុននេះមានន័យថា បង្គោលខៀវ វ៉ែន សាវ៉ាត មិនមែនដឹងខ្យល់វាយចេញរបស់ រឿង សោភ័ណ្ឌ ដូចអ្វីដែលគេបានប្រកាសនោះទេ បុ៉ន្តែគឺ រឿង សោភ័ណ្ឌ ទៅវិញទេដែលដឹងខ្យល់របស់គូប្រកួតច្បាស់ ទើបគ្រាន់តែស្វាគមន៍គ្នាភ្លាម វ៉ែន សាវ៉ាត ទទួលមួយកែងឆ្វេងរបស់ រឿង សោភ័ណ្ឌ ពេញបន្ទុកតែម្តង ដោយក្រៅពីសន្លប់ក៏ធ្វើឱ្យគេបែកក្បាលផ្នែកខាងស្តាំហូរឈាមដូចបាក់ទំនប់ និងវង្វេងវង្វាន់ដួលផ្កាប់មុខទៀតផង ។ ទោះយ៉ាងណា វ៉ែន សាវ៉ាត ក៏បានវាយបោក រឿង សោភ័ណ្ឌ ឱ្យដួលពីរបីលើកធ្វើឱ្យអ្នកទស្សនាស្រែកហ៊ោកញ្ជ្រៀវ និងជក់ចិត្តដិតអារម្មណ៍ដូចគ្នា ។ ផ្អែកតាមស្ថានភាពក្រោយពី ត្រូវមួយកែងពេញទំហឹង និងដួលផ្កាប់មុខចេញក្បាលទៅក្រៅខ្សែរេញ វ៉ែន សាវ៉ាត នៅមិនទាន់ដួលទាំងស្រុងទេ គឺនៅអាចងើបបម្រុងមកតតាំងសាជាថ្មី បុ៉ន្តែដោយសារសភាពបែកក្បាលមានកម្រិតខ្លាំងជាង និងទំនងជាមានសភាពវិលមុខភ្លាមៗទើបធ្វើឱ្យគេដួលនៅកណ្តាលរេញតែម្តង ។
បើទោះជាគូនេះវាយគ្នាបានតែមួយភ្លែត ក៏ដឹងចាញ់ឈ្នះ បុ៉ន្តែគេកត់សម្គាល់ថា អ្នកទស្សនាបានលើកមេដៃ និងកោតសរសើរថា គូនេះជក់ចិត្តល្អមើលខ្លាំងជាងគេ ។ អ្វីដែលអ្នកគាំទ្រផ្តល់តម្លៃនោះ គឺទាំងអ្នកសន្លប់ និងអ្នកឈ្នះ មុននឹងចាញ់ឈ្នះ បានប្រើអស់កណ្តាប់ដៃក្នុងការវាយចេញដោយមិនខ្លាចគ្រោះថ្នាក់ ដែលមានន័យថា បានធ្វើឱ្យអ្នកទស្សនាអស់ចិត្ត ។ អុីចឹងហើយទើបកីឡាករវ៉ែន សាវ៉ាត បានទទួលការចាប់អារម្មណ៍ក្រោយប៉ះគ្នាជាមួយ រឿង សោភ័ណ្ឌ តែមួយប៉ប្រិចភ្នែកដោយសារតែគេវាយស៊ូ ហើយហ៊ានស្ទុះវាយបក រឿង សោភ័ណ្ឌ បើទោះជាការស្ទុះចេញទាំងពីរលើកគឺត្រូវសន្លប់ក្រោមរន្ទះកែងរបស់គូប្រកួតទាំងពីរលើកក្តី ។ នៅក្នុងការប្រកួតនោះដែរ កីឡាករអាន សុផល មកពីក្លិបមិត្តប៉ូលិស ដែលឡើងប្រកួតសងសឹកជាមួយកីឡាករថឹក សុខឿន មកពីក្លិបកងទ័ពឆត្រយោង៩១១ ក៏មិនបានសម្រេចគោលបំណងដូចគ្នា ។ ថឹក សុខឿន បានវាយកែងត្រូវមុខ អាន សុផល ពេញទំហឹងបណ្តាលឱ្យដួលបែកច្រមុះឈាមភ្លាមៗរហូតឈានដល់ការបញ្ឈប់លែងឱ្យប្រកួតត្រឹមពាក់កណ្តាលទី ។ កីឡាករពេជ្រ សំរិទ្ធ មកពីក្លិបអារុណរះកីឡា បានប្រកួតឈ្នះពិន្ទុលើកីឡាករស្វាយ រដ្ឋា មកពីក្លិបកងរាជអាវុធហត្ថរាជធានីភ្នំពេញ បន្ទាប់ពីវាយគ្នា៦ទឹកពេញនោះ ។ គូនេះប្រកួតគ្នាបែបប្រដាល់សាកល ខណៈដែលមួយគូទៀតគឺកីឡាករជើងថ្មី ពេជ្រ ខ្មៅ មកពីក្លិបអេភូថងកីឡា ប្រកួតចាញ់កីឡាករឯម ម៉ូលី មកពីក្លិបឫទ្ធីពោធិសែនជ័យ ដោយពិន្ទុ ។
ចំណែកនៅសង្វៀនស្ទឹងមានជ័យក្នុងថ្ងៃដដែលនោះដែរ កីឡាករអ៊ុំ ចំរើន មកពីក្លិបតាឡីដំរីមានឫទ្ធិ ដែលគេដឹងថាជាសិស្សថ្នាក់ទី១២ កំពុងជាប់ប្រឡងឆមាស និងជាជាងកាត់ស្បែកជើងដែរនោះ បានដួលសន្លប់ក្នុងទឹកទី២ ក្រោមដៃកីឡាករឯម វិចិត្រ មកពីក្លិបឫទ្ធីពោធិសែនជ័យយ៉ាងអាម៉ាស់ ។ ការបរាជ័យរបស់ អ៊ុំ ចំរើន ត្រូវគេដឹងថា ព្រោះតែហេតុផលដែលគេគ្មានពេលហ្វឹកហាត់ ហើយបន្តទទូចឡើងរេញដើម្បីកុំឱ្យភ្លេចស្នៀត និងបាត់ឈ្មោះលឿនពេក និងកីឡាករស្រិល ទ្រី មកពីក្លិបគជសារកីឡា ចាញ់កីឡាករឈាន រស្មី មកពីក្លិបរាជសីហ៍ប្រឆាំងគ្រឿងញៀនខេត្តរតនគិរី ដោយពិន្ទុក្នុងការប្រកួតសងសឹក ៕
ចែករំលែកព័តមាននេះ