រាជធានីភ្នំពេញ ៖ ការប្រកួតបាល់ទាត់ Metfone Cambodian League 2014 កាលពីរសៀលថ្ងៃទី៩ កុម្ភៈ នៅពហុកីឡដ្ឋានជាតិអូឡាំពិក ដែលមានចំនួន២ប្រកួតនោះជាលទ្ធផល ក្រុមក្រសួងការពារជាតិលេងស្មើក្រុម Western Uni FC គឺគ្មានក្រុមណាទាត់ចូលទីក្រុមណាទេ ។
រាជធានីភ្នំពេញ ៖ ការប្រកួតបាល់ទាត់ Metfone Cambodian League 2014 កាលពីរសៀលថ្ងៃទី៩ កុម្ភៈ នៅពហុកីឡដ្ឋានជាតិអូឡាំពិក ដែលមានចំនួន២ប្រកួតនោះជាលទ្ធផល ក្រុមក្រសួងការពារជាតិលេងស្មើក្រុម Western Uni FC គឺគ្មានក្រុមណាទាត់ចូលទីក្រុមណាទេ ។
នៅតង់ទី១ ក្រុមក្រសួងការពារជាតិហាក់មានប្រៀបខ្លាំងទាំងការការពារ និងការវាយលុកចូលទៅកាន់តំបន់គ្រោះថ្នាក់របស់ក្រុម Western Uni FC ជាច្រើនលើកច្រើនសា បុ៉ន្តែគ្មានឱកាសទាត់បាល់បញ្ចូលទីឡើយ ដោយសារក្រុម Western Uni FC បានការពារយ៉ាងល្អបំផុត ។ ចូលដល់តង់ទី២ ក្រុម Western Uni FC ហាក់មានប្រៀបវិញធ្វើឱ្យអ្នកទស្សនាស្រែកហ៊ោកញ្ជ្រៀវពេលឃើញក្រុមនេះបណ្តើរបាល់ទៅដល់មុខទីគូប្រកួត និងទាត់បំប៉ោងសំណាញ់ តែបាល់រត់ខុសគោលដៅទៅប៉ះសំណាញ់ខាងក្រៅទៅវិញ ។ ការប្រកួតបានបន្តរហូតដល់ចប់៩០នាទីពេញ ក្រុមទាំងពីរនៅតែរក្សាលទ្ធផលរបស់ខ្លួនដដែលគឺ០ទល់០ ។ មកដល់ពេលនេះ ក្រុមក្រសួងការពារជាតិលេងបាន៣ប្រកួត ស្មើ២ប្រកួត និងចាញ់១ប្រកួត មាន២ពិន្ទុ ចំណែកក្រុម Western Uni FC លេងបាន២ប្រកួត ឈ្នះ១ប្រកួត ស្មើ១ប្រកួត មាន៤ពិន្ទុ ។
មួយប្រកួតទៀត ក្រុមភ្នំពេញក្រោន ប្រកួតឈ្នះក្រុមគិរីវង់សុខសែនជ័យ ក្នុងលទ្ធផល២ទល់០ ។
នៅតង់ទី១ ទោះបីក្រុមទាំង២លេងសម្រុកដាក់គ្នាយ៉ាងណាក៏ដោយ ក៏មិនអាចបំបែកលទ្ធផលពងមាន់បានដែរ ។ លុះចូលដល់តង់ទី២ ទើបតែចាប់ផ្តើមបាន២នាទី កីឡាករពាក់អាវលេខ៤០ របស់ក្រុមភ្នំពេញក្រោន Bisan George រកបាន១គ្រាប់ឱ្យក្រុមរបស់ខ្លួន ។ ការនាំមុខ១គ្រាប់នេះបានបន្តរហូតដល់៩០នាទី បុ៉ន្តែនៅម៉ោងបន្ថែម កីឡាករពាក់អាវលេខ១១ របស់ក្រុមភ្នំពេញក្រោន នៅ សុខសីលា រកបាន១គ្រាប់ចុងក្រោយមុនចប់ការប្រកួត ដូច្នេះក្រុមភ្នំពេញក្រោនឈ្នះក្រុមគិរីវង់សុខសែនជ័យ២ទល់០ ។ ក្រុមភ្នំពេញក្រោនលេងបាន៣ប្រកួត ឈ្នះ២ប្រកួត និងស្មើ១ប្រកួត មាន៧ពិន្ទុ ចំណែកក្រុមគិរីវង់សុខសែនជ័យលេងបាន៣ប្រកួត ស្មើ១ប្រកួត និងចាញ់២ប្រកួត មាន១ពិន្ទុ ។
ការប្រកួតនឹងបន្តធ្វើនៅថ្ងៃទី១៥ កុម្ភៈ ដោយមាន៤ប្រកួតលេងលើ២ទីលាន ក្នុងនោះនៅស្តាតចាស់ចាប់ពីម៉ោង១៣និង៣០នាទីក្រុមខេត្តស្វាយរៀង ប្រកួតជាមួយក្រុមត្រាយអាស៊ី និងក្រុមក្រសួងការពារជាតិ ប្រកួតជាមួយក្រុមសាកលវិទ្យាល័យអាស៊ីអឺរុ៉ប ។ ចំណែកនៅពហុកីឡដ្ឋានជាតិអូឡាំពិកចាប់ផ្តើមនៅម៉ោង១៥និង៣០នាទី ក្រុមចម្ការកៅស៊ូបឹងកេត ប្រកួតជាមួយក្រុមណាហ្គាខប និងមួយប្រកួតទៀតក្រុម Western Uni FC ប្រកួតជាមួយក្រុមគិរីវង់សុខសែនជ័យ ៕
ចែករំលែកព័តមាននេះ