រាជធានីភ្នំពេញ ៖ ការប្រកួតបាល់ទាត់ជាលក្ខណៈមិត្តភាពកម្ពុជា-កូរ៉េ ដែលធ្វើឡើងនៅពហុកីឡដ្ឋានជាតិអូឡាំពិក កាលពីរសៀលថ្ងៃទី៦ កុម្ភៈ រវាងក្រុមបាល់ទាត់ណាហ្គាខប របស់កម្ពុជា និងក្រុម Kimpo Club របស់សាធារណរដ្ឋកូរ៉េខាងត្បូង ជាលទ្ធផលក្រុមទាំង២ស្មើគ្នា ដោយគ្មានក្រុមណាទាត់បាល់ចូលទីក្រុមណាឡើយ ។ ព្រឹត្តិការណ៍ខាង
រាជធានីភ្នំពេញ ៖ ការប្រកួតបាល់ទាត់ជាលក្ខណៈមិត្តភាពកម្ពុជា-កូរ៉េ ដែលធ្វើឡើងនៅពហុកីឡដ្ឋានជាតិអូឡាំពិក កាលពីរសៀលថ្ងៃទី៦ កុម្ភៈ រវាងក្រុមបាល់ទាត់ណាហ្គាខប របស់កម្ពុជា និងក្រុម Kimpo Club របស់សាធារណរដ្ឋកូរ៉េខាងត្បូង ជាលទ្ធផលក្រុមទាំង២ស្មើគ្នា ដោយគ្មានក្រុមណាទាត់បាល់ចូលទីក្រុមណាឡើយ ។ ព្រឹត្តិការណ៍ខាងលើនេះ រៀបចំឡើងដើម្បីអបអរសាទរព្រឹត្តិការណ៍កីឡាអាស៊ីលើកទី១៧ នៅទីក្រុង Incheon ប្រទេសកូរ៉េ (17th Incheon Asian Games 2014) ដែលនឹងឈានចូលមកដល់ក្នុងពេលឆាប់ៗខាងមុខនេះ ។
អញ្ជើញចូលរួមជាគណៈអធិបតីក្នុងពិធីនេះមានលោករដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ថោង ខុន, លោកនាយឧត្តមសេនីយ៍ផ្កាយមាស៤ សៅ សុខា ប្រធានសហព័ន្ធកីឡាបាល់ទាត់កម្ពុជា លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ព្រមទាំងមន្ត្រីប្រតិភូសំខាន់ៗរបស់កម្ពុជា និងកូរ៉េជាច្រើននាក់ទៀតចូលរួមទស្សនាផងដែរ ។
ការប្រកួតដែលធ្វើឡើងរយៈពេល៩០នាទី រវាងក្រុមណាហ្គាខប របស់កម្ពុជា និងក្រុម Kimpo Club របស់កូរ៉េ ឃើញថា ក្រុមទាំង២មានកម្រិតបច្ចេកទេសលេងប្រហាក់ប្រហែលគ្នា ទើបគ្មានក្រុមណារកគ្រាប់បាល់បានសូម្បី១គ្រាប់ដូចគ្នា ដូច្នេះលទ្ធផលគឺស្មើគ្នា០ទល់នឹង០។
គ្រូបង្វឹកក្រុមណាហ្គាខប លោក ប្រាក់ សុវណ្ណារ៉ា បានថ្លែងក្រោយបញ្ចប់ការប្រកួតថា នេះជាលើកទី១ហើយ ដែលក្រុមរបស់លោកបានមកប្រកួតជាលក្ខណៈមិត្តភាពដកស្រង់បច្ចេកទេសជាមួយនឹងក្រុមលំដាប់លេខ៤របស់កូរ៉េ ដែលជាការលេងកម្តៅសាច់ដុំមួយ ដើម្បីត្រៀមប្រកួតជាមួយនឹងក្រុមផ្សេងទៀត ដែលត្រូវប្រកួតគ្នាដណ្តើមពានរង្វាន់ Hun Sen Cup និង Metfone Cambodian League ។
លោកបន្តថា ថ្ងៃនេះកីឡាកររបស់លោកពិតជាលេងបានល្អទាំងការចែកបាល់ឱ្យគ្នា ទាំងការការពារ ទាំងការប្រយុទ្ធ ហើយយើងមានឱកាសច្រើនដងណាស់ក្នុងការរកគ្រាប់បាល់ តែដោយសារសមត្ថភាពកីឡាកររបស់យើងនៅមានកម្រិត ហើយសមត្ថភាពកីឡាកររបស់ Kimpo Club ក៏មានសមត្ថភាពមិនលើសយើងប៉ុន្មានដែរ ទើបការប្រកួតមួយនេះយើងទទួលបានលទ្ធផលស្មើគ្នា ០-០ ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា ការប្រកួតបាល់ទាត់មិត្តភាពនេះ រៀបចំឡើងដោយគណៈកម្មាធិការជាតិអូឡាំពិកកម្ពុជា រួមសហការជាមួយនឹងសហព័ន្ធកីឡាបាល់ទាត់កម្ពុជា ។ លោកបន្តថា ព្រឹត្តិការណ៍មួយនេះធ្វើឡើងដើម្បីផ្សព្វផ្សាយយុទ្ធនាការ «17th Incheon Asian Games 2014» និងការផ្លាស់ប្តូរបទពិសោធន៍បច្ចេកទេស និងរឹតចំណងសាមគ្គីភាពរវាងកីឡាកម្ពុជា និងកីឡាកូរ៉េផងដែរ ៕
ចែករំលែកព័តមាននេះ