ក្រុងប៉ោយប៉ែត ៖ ស្រ្តីវ័យ ២៣ឆ្នាំ ឈ្មោះ ឈួន សុផា ជាកម្មការិនីបម្រើការងារជាស្រីមេផ្ទះធ្វើនៅប្រទេសម៉ាឡេស៊ី ដែលថៅកែចិត្តខ្មៅអប្រិយជនជាតិម៉ាឡេស៊ី ធ្វើបាបបង្ខាំងមិនឲ្យវិលត្រលប់មកស្រុកកំណើត ត្រូវសមាគមការពារសិទ្ឋិមនុស្ស អាដហុក ប្រចាំខេត្តបន្ទាយមានជ័យ ធ្វើអន្តរាគមន៍រំដោះចេញបានត្រលប់មកដល់មាតុប្រទេសវិញដោយសុវត្តិភាពហើយ បន្ទាប់ពីទទួលពាក្យបណ្តឹងពីម្តាយនារីរងគ្រោះ។
កញ្ញា ឈួន សុផា បានរៀបរាប់ថា នាងបានចេញទៅធ្វើការនៅប្រទេសម៉ាឡេស៊ី តាំងតែអាយុ ១៨ឆ្នាំ ពោលគឺនៅក្នុងអំឡុងឆ្នាំ២០០៨ តាមរយៈក្រុមហ៊ុន PNP ដែលមានទីស្នាក់ការនៅទីក្រុងភ្នំពេញ ដោយសន្យាថា ទទួលបានប្រាក់ឈ្នួលក្នុង ១ខែ ១៨០ដុល្លារអាមេរិក។ ប៉ុន្តែ នៅពេលទៅដល់ប្រទេសម៉ាឡេស៊ី នាងត្រូវភាគីក្រុមហ៊ុនកាត់ប្រាក់ខែអស់រយៈពេល ៦ខែ។ នាងបន្តថា ថៅកែរបស់នាងមានឈ្មោះ កាន់ មិចឆែល ជាជនជាតិម៉ាឡេ តែងតែធ្វើបាបដល់រូបនាងគ្រប់ពេល ហើយក្រោយពេលធ្វើការចប់អាណត្តិ គឺនៅថ្ងៃទី០២ មករា ២០១៤ នាងត្រូវវិលត្រលប់មកស្រុកកំណើតវិញ ប៉ុន្តែ ថៅកែមិនអនុញ្ញាតិឲ្យនាងមកវិញទេ និងគំរាមដល់រូបនាងទៀតផង ដោយមិនព្រមទិញសំបុត្រយន្តហោះឲ្យឡើយ។
ដោយស៊ូទ្រាំនឹងការបង្ខាំងគ្មានសេរីភាពមិនបាន នាងក៏លួចទាក់ទងតាមទូរស័ព្ទប្រាប់ដំណឹងដល់ម្តាយនៅស្រុកខ្មែរ ឲ្យជួយទាក់ទងប្តឹងសមត្ថកិច្ច ដើម្បីរំដោះរូបនាងឲ្យបានត្រលប់មកស្រុកវិញ។ អ្នកស្រី ញឹក សុភា អាយុ ៦០ឆ្នាំ ជាម្តាយនារីរងគ្រោះ បានរៀបរាប់ថា ក្រោយពីទទួលដំណឹងពីកូនស្រីភ្លាម គាត់មានចិត្តតក់ស្លុតឥតឧបមា គាត់ក៏បានរត់ទៅពឹងពាក់ដោយបានដាក់ពាក្យបណ្តឹងនៅសមាគមការពារសិទ្ឋិមនុស្ស អាដហុក ប្រចាំខេត្តបន្ទាយមានជ័យ នៅថ្ងៃទី១០ មករា ២០១៤ ។
លោក ស៊ុំ ចាន់គា អ្នកសម្របសម្រួលសមាគមការពារសិទ្ឋិមនុស្ស ប្រចាំខេត្តបន្ទាយមានជ័យ បានថ្លែងឲ្យដឹងនៅរសៀលថ្ងៃទី០៧ កុម្ភៈ ២០១៤ ថា បន្ទាប់ពីទទួលពាក្យបណ្តឹងពីម្តាយនារីរងគ្រោះភ្លាម អង្គការអាដហុក បានស្វះស្វែងអន្តរាគមន៍ភ្លាមៗ ដោយទាក់ទងខាងភាគីក្រុមហ៊ុន PNP នៅភ្នំពេញ ប៉ុន្តែ ខាងក្រុមហ៊ុនគ្មានចំណាត់ការ និងសហការជាមួយឡើយ។
លោក ស៊ុំ ចាន់គា បន្តថា សមាគមអាដហុក បានទាក់ទងដៃគូនៅក្រៅប្រទេស ព្រមទាំងថៅកែជនជាតិម៉ាឡេស៊ី ដែលជាប់ពាក់ព័ន្ឋ និងជនរងគ្រោះ រហូតទាល់តែបានសម្រេច ដោយរំដោះស្រ្តីរងគ្រោះចេញពីរណ្តៅមរណៈដ៏ខ្មៅងងឹត ហើយបានវិលត្រលប់មកស្រុកកំណើតវិញប្រកបដោយសុវត្ថិភាព។ នារីរងគ្រោះ បានថ្លែងអំណរគុណចំពោះអង្គការអាដហុក ដែលខំប្រឹងប្រែងជួយរំដោះរូបនាងមកជួបជុំសាច់ញាតិបងប្អូន។ប៉ុន្តែ នាងមិនបានដាក់ពាក្យបណ្តឹងប្តឹងខាងក្រុមហ៊ុន ឬថៅកែជនជាតិម៉ាឡេឡើយ។
ជាចុងក្រោយ នាងក៏បានផ្តាំផ្ញើដល់បងប្អូនប្រុសស្រីគ្រប់រូប មុននឹងចាកចេញ ឬចំណាកប្រទេស ទៅធ្វើការងារនៅស្រុកក្រៅ ត្រូវប្រយ័ត្នប្រយែងក្រែងចាញ់បោកជនខិលខូច ឬក្រុមហ៊ុនមិនល្អ នាំឲ្យខ្លួនយើងជួបគ្រោះថ្នាក់ផ្សេងៗ។ នាងបន្តថា ជាពិសេសត្រូវទាក់ទងអង្គការផ្សេងៗ ដែលការពារសិទ្ឋិមនុស្ស ដូចជា សមាគមការពារសិទ្ឋិមនុស្ស អាដហុក ជាដើម ដើម្បីងាយស្រួលផ្តល់ដំណឹងដល់ក្រុមគ្រួសារ និងជួយសង្គ្រោះយើងបានទាន់ពេលវេលា៕
ចែករំលែកព័តមាននេះ