ខេត្តឧត្តរមានជ័យ ៖ ឯកឧត្តម ញឹម វណ្ណដា សមាជិកគណៈកម្មាធិការកណ្តាលកាកបាទក្រហមកម្ពុជា និងជាប្រធានក្រុមការងារគ្រប់គ្រងគ្រោះមហន្តរាយ កាកបាទក្រហមកម្ពុជា និងជាតំណាងដ៏ខ្ពង់ខ្ពស់របស់ សម្តេចកិតិ្តព្រឹទ្ធបណ្ឌិត ប៊ុន រានី ហ៊ុន សែន ឯកឧត្តម អ៊ុយ សំអាត នាយក នៃនាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជា បានដឹកនាំក្រុមការងារពាំនាំអំណោយចែកជូនប្រជាពលរដ្ឋ ចំនួន ១៥០០គ្រួសារ នៅក្នុងបរិវេណសាលាស្រុកអន្លង់វែង នាព្រឹកថ្ងៃទី០៧ កុម្ភៈ ២០១៤។
នាឱកាសនោះដែរ គេបានកត់សម្គាល់ឃើញមានវត្តមាន ឯកឧត្តម ស ថាវី ប្រធានសាខាកាកបាទក្រហមកម្ពុជាខេត្ត និងជាអភិបាល នៃគណៈអភិបាលខេត្តឧត្តរមានជ័យ មន្រ្តីកាកបាទក្រហមខេត្ត អាជ្ញាធរមូលដ្ឋានស្រុក ព្រមទាំងមានការចូលរួមពីលោកមេបញ្ជាការ លោកមេបញ្ជាការងកងកម្លាំងប្រដាប់អាវុធ ៣ប្រភេទ ជាច្រើនរូបផងដែរ។
ឯកឧត្តម ស ថាវី បានមានប្រសាសន៍ជូនគណៈអធិបតីថា នៅក្នុងខេត្តឧត្តរមានជ័យ កន្លងមក ដែលបានទទួលរងគ្រោះដោយធម្មជាតិ និងទទួលរងគ្រោះដោយអគ្គីភ័យ ឬគ្រួសារក្រីក្រដាច់ស្បៀងអាហារជាច្រើនគ្រួសារនោះ គឺសាខាកាកបាទក្រហមកម្ពុជាខេត្ត រួមទាំងអាជ្ញាធរមូលដ្ឋានខេត្ត បានខិតខំយកចិត្តទុកដាក់ជួយឧបត្ថម្ភចែកជូនដល់ពួកគាត់ជាញឹកញាប់មកហើយ ដើម្បីឆ្លើយតបទៅនឹងអនុសាសន៍ សម្តេចអគ្គមហាសេនាបតីតេជោ ហ៊ុន សែន រាជរដ្ឋាភិបាល នៃព្រះរាជាណាចក្រកម្ពុជា មិនទុកឲ្យប្រជាពលរដ្ឋណាម្នាក់ដេកស្លាប់ដោយដាច់ស្បៀងអាហារឡើយ។
ឯកឧត្តម ញឹម វណ្ណដា បន្ទាប់ពីបានស្តាប់របាយការណ៍ និងបានសំណេះសំណាលជាមួយប្រជាពលរដ្ឋរួចមក លោកមានប្រសាសន៍ថា សម្តេចកិត្តិព្រឹទ្ធបណ្ឌិត ប៊ុន រានី ហ៊ុន សែន ប្រធានកាកបាទក្រហមកម្ពុជា តែងតែបានយកចិត្តទុកដាក់គិតគូរដល់សុខទុក្ខរបស់ប្រជាពលរដ្ឋនៅគ្រប់បណ្តាខេត្តក្រុង បញ្ហាទី១. អំពីសុខភាពប្រជាពលរដ្ឋ បញ្ហាទី២. គិតគូរដល់ប្រជាពលរដ្ឋក្រីក្រទៅលើស្បៀងអាហាររបស់ពួកគាត់ ទើបសម្តេចកិត្តិព្រឹទ្ធបណ្ឌិតបានជំរុញដល់ក្រុមការងារកាកបាទក្រហមកម្ពុជា ដែលស្ថិតនៅក្នុងជួររបស់រាជរដ្ឋាភិបាល ពាំនាំអំណោយចែកជូនដល់ដៃរបស់ពួកគាត់។
ជាក់ស្តែងនៅក្នុងស្រុកអន្លង់វែង ដែលមានប្រជាពលរដ្ឋចំនួន ១៥០០គ្រួសារ ត្រូវបានមកទទួលអំណោយរបស់ សម្តេចកិត្តិព្រឹទ្ធបណ្ឌិត ប៊ុន រានី ហ៊ុន សែន ក្នុង ១គ្រួសារ ទទួលបានអង្ករចំនួន ២៥គីឡូក្រាម មីចំនួន ១កេះ ត្រីខ ចំនួន ១០កំប៉ុង ភួយ១ ក្រមា១ សារុង១៕
ចែករំលែកព័តមាននេះ