រាជធានីភ្នំពេញ ៖ នៅល្ងាចថ្ងៃសៅរ៍ទី៨ កុម្ភៈ នេះ កីឡាករឈិត ង៉ុយ មកពីក្លិបអប្សរាគុនខ្មែរនឹងឡើងរេញទាមទារបំណុលពីកីឡាករចាន់ ស៊ីណាត មកពីក្លិបនិរោធមានជ័យ នៅលើសង្វៀនបាយ័នស្ទឹងមានជ័យ ។ ជាការឆ្លើយតប កីឡាករចាន់ ស៊ីណាត បានប្រកាសដោយមុតមាំថា នឹងបន្ដស្ពាយបំណុលមួយនេះដោយគេចមិនព្រមសងឱ្យវិញនោះទេ ។
រាជធានីភ្នំពេញ ៖ នៅល្ងាចថ្ងៃសៅរ៍ទី៨ កុម្ភៈ នេះ កីឡាករឈិត ង៉ុយ មកពីក្លិបអប្សរាគុនខ្មែរនឹងឡើងរេញទាមទារបំណុលពីកីឡាករចាន់ ស៊ីណាត មកពីក្លិបនិរោធមានជ័យ នៅលើសង្វៀនបាយ័នស្ទឹងមានជ័យ ។ ជាការឆ្លើយតប កីឡាករចាន់ ស៊ីណាត បានប្រកាសដោយមុតមាំថា នឹងបន្ដស្ពាយបំណុលមួយនេះដោយគេចមិនព្រមសងឱ្យវិញនោះទេ ។
រវាងកីឡាករទាំង២ធ្លាប់ជួបគ្នា២ដងហើយ លើកទី១ កាលពីឆ្នាំ២០១១ កីឡាករឈិត ង៉ុយ បានយកឈ្នះដោយប្រផិតប្រផើយ និងលើកទី២ ថ្ងៃទី១៦ កុម្ភៈ ឆ្នាំ២០១៣ កីឡាករចាន់ ស៊ីណាត បានយកឈ្នះដោយមោទនភាពវិញ ។ រំលឹកដល់លទ្ធផលនេះ មានន័យថា ពួកគេស្ថិតក្នុងភាពស៊ីសងគ្នាប៉ុណ្ណោះ ដោយសារតែអ្នកទាំងពីរសុទ្ធតែធ្លាប់ឈ្នះចាញ់គ្នាម្ដងម្នាក់ ។ លើកនេះ ឈិត ង៉ុយ បានប្រាប់ដោយចំហថា មិនអាចចាញ់ចាន់ ស៊ីណាត ជាលើកទី២បានទេ ព្រោះការប៉ះគ្នាលើកទី៣នេះសំខាន់ណាស់ចំពោះក្រេឌីតរបស់គេ ដោយគេបានទាំងអះអាងថា បើចាញ់ចាន់ ស៊ីណាត លើកនេះម្ដងទៀតនោះពិតជាធ្វើឱ្យគេត្រូវយកកន្សែងគ្របមុខនៅក្នុងពិភពប្រដាល់ហើយ ។ ឈិត ង៉ុយ អះអាងថា នឹងយកថ្ងៃនេះទារបំណុលត្រឡប់មកវិញឱ្យបាន ដោយបានទាំងប្រាប់យ៉ាងមុតមាំថា ត្រៀមខ្លួនរួចរាល់សង្កត់លើការតាំងចិត្ដនេះផង ។
ប៉ុន្ដែកីឡាករចាន់ ស៊ីណាត បែរជាប្រកាសថា មិនប្រគល់បំណុលមួយនេះឱ្យវិញជាដាច់ខាត។ ចាន់ ស៊ីណាត ប្រាប់ថា មិនអាចបណ្ដោយឱ្យចាញ់កីឡាករឈិត ង៉ុយ បានទេ បន្ទាប់ពីធ្លាប់ប៉ះគ្នា២លើកហើយ ធ្វើឱ្យគេដឹងពីតិចនិកស្នៀតខ្លាំងខ្សោយរបស់ឈិត ង៉ុយ អស់គ្មានសល់ ។ ចាន់ ស៊ីណាត ហាក់មានការតាំងចិត្ដដោយមុតមាំមិនជឿថា ខ្លួននឹងចាញ់ឈិត ង៉ុយ នោះទេ បើទោះជាធ្លាប់ចាញ់កាលពីបើកឆាកជួបគ្នារួចម្ដងហើយក្ដី ។
ទោះបីយ៉ាងណា គូនេះមិនអាចកំណត់លទ្ធផលដោយខ្លួនឯងបានទេ ក្នុងពេលដែលពួកគេសុទ្ធតែមានសមត្ថភាពល្អ ដោយឡែកពីគ្នាបែបនេះ ។ ឈិត ង៉ុយ មានរាងខ្ពស់ ដៃជើងវែងៗ ហើយស្នៀតជង្គង់ និងកែងរបស់គេក៏មុតស្រួចមិនធម្មតានោះដែរ ។ រីឯចាន់ ស៊ីណាត វិញជាកីឡាករវាយមួយៗតែចំគោលដៅ និងពូកែបំផុតក្នុងការបត់បែនស្នៀត ដោយមិនច្រឡោតខឹង ដូចកីឡាករឈិត ង៉ុយ ឡើយ ។ ចាំមើលរវាងគូនេះ តើចាន់ ស៊ីណាត នឹងអាចគេចរួចពីការសងបំណុល ឬត្រូវប្រគល់ជ័យជម្នះទៅឱ្យឈិត ង៉ុយ វិញ? នៅលើសង្វៀននោះ កីឡាករសោម តឿទី មកពីក្លិបខ្លារខិនមានឫទ្ធិ ប្រកួតជាមួយកីឡាករភុន សោភ័ណ្ឌ មកពីក្លិបយុវកីឡាខេត្ដកណ្ដាល។ កីឡាការជួប ជាង មកពីក្លិបនិរោធមានជ័យ ប្រកួតជាមួយកីឡាករអ៊ុន រតនា មកពីក្លិបតាឡីដំរីមានឫទ្ធិ និងកីឡាកររិទ្ធ កៅ មកពីមជ្ឈមណ្ឌលកីឡាខ.ភ.ម ប្រកួតជាមួយកីឡាករចៅ រស់ មកពីក្លិបចាក់អង្រែមានជ័យ ៕
ចែករំលែកព័តមាននេះ