សហរដ្ឋអាមេរិក-ចិន ៖ អ្នកចរចាចិន និងអាមេរិកបានជួបគ្នាជាថ្មីកាលពីថ្ងៃទី៣០ កក្កដា នៅទីក្រុងសៀងហៃ ដើម្បីជម្រុញការចរចាស្ដីពីសង្គ្រាមពាណិជ្ជកម្មរបស់ពួកគេ ប៉ុន្តែក្រុងប៉េកាំងក៏ដូចជាក្រុងវ៉ាស៊ីនតោនផងដែរ ហាក់ពុំទាន់សង្ឃឹមលើភ័ព្វវាសនាសម្រេចបានកិច្ចព្រមព្រៀងមួយឡើយ ។
ការចរចានៅក្រុងសៀងហៃនោះជាការជួបទល់មុខគ្នាលើកដំបូង ចាប់តាំងពីបរាជ័យនៃការចរចាកាលពីខែឧសភា ខណៈលោក ដូណាល់ ត្រាំ បានចោទប្រកាន់ក្រុងប៉េកាំងថា មិនគោរពតាមអ្វីដែលបានសន្យា ។
ចិន និងអាមេរិកបានប្រកាន់ជំហររឹងមាំដូចគ្នា ចាប់តាំងពីឆ្នាំមុនមក ក្នុងជម្លោះពាណិជ្ជកម្មដោយដាក់ពន្ធគយយ៉ាងខ្ពស់ទៅវិញទៅមកដែលមានទឹកប្រាក់សរុបជាង៣៦០ពាន់លានដុល្លារ ក្នុងការផ្លាស់ប្ដូរពាណិជ្ជកម្មប្រចាំឆ្នាំ ។
បើតាមទីភ្នាក់ងារសារព័ត៌មានចិនស៊ីនហួនាថ្ងៃទី៣០ កក្កដា ក្នុងបទអត្ថាធិប្បាយមួយនិយាយថា ទំនាក់ទំនងរវាងក្រុងប៉េកាំង និងក្រុងវ៉ាស៊ីនតោន មានភាពតានតឹងហើយអំពាវនាវដល់សហរដ្ឋអាមេរិកឲ្យមានការគោរពចំពោះចិនផង បើខ្លួនមានបំណងចង់បានកិច្ចព្រមព្រៀងមួយ ៕
កែសម្រួលដោយ ៖ សំណាង
ចែករំលែកព័តមាននេះ