ខេត្តតាកែវ ៖ ជាការពិតណាស់ដែលថាកុំឃើញទឹកស្ងប់ថាក្នុងទឹកគ្មានត្រីឱ្យសោះ យ៉ាងណាមិញ ការបាត់ព្រះសុវណ្ណកោដ្ឋតម្កល់ព្រះបរមសារីរិកធាតុ កាលពីវេលារំលងអធ្រាត្រថ្ងៃទី១០ ខែធ្នូ ឆ្នាំ២០១៣ កន្លងមកនេះ ត្រូវបានទទួលដំណឹងថា ព្រះសុវណ្ណកោដ្ឋតម្កល់ព្រះបរមសារីរិកធាតុ ត្រូវបានរកឃើញហើយ ដោយសមត្ថកិច្ចនគរបាលក្រសួងមហាផ្ទៃ និងសមត្ថកិច្ចនគរបាលខេត្តតាកែវ នារសៀលថ្ងៃទី៦ កុម្ភៈ ។
ក្រុមមន្ត្រីសមត្ថកិច្ចដែលកំពុងធ្វើកិច្ចការនេះមិនទាន់់បានផ្ដល់ព័ត៌មានភ្លាមៗជុំវិញការរកឃើញព្រះបរមសារីរិកធាតុនេះទេ ដោយគ្រាន់តែបង្ហើបឱ្យដឹងខ្លះថា ព្រះសុវណ្ណកោដ្ឋតម្កល់ព្រះបរមសារីរិកធាតុ បានរកឃើញក្នុងលំនៅឋានមួយក្នុងភូមិកកោះ ឃុំខ្វាវ ស្រុកទ្រាំង ខេត្តតាកែវ ដែលមានស្ត្រីឈ្មោះ សារ៉េត ជាម្ចាស់ផ្ទះ ។ ក្រុមមន្ត្រីដែលស្និទ្ធនឹងប្រតិបត្តិការនេះ បានឱ្យដឹងថា ប្រតិបត្តិការបានរកឃើញនៅវេលាម៉ោង២រសៀល ថ្ងៃទី៦ កុម្ភៈ ខណៈសមត្ថកិច្ចតាមជន២នាក់ ជិះម៉ូតូធំឌុបគ្នា ។ ជនសង្ស័យដែលទំនងជាបានដឹងខ្លួននោះ មានម្នាក់បានរត់ចូលទៅក្នុងរថយន្តម៉ាកហុីយ៉ាន់ដាយរបស់ខ្លួន ពណ៌ខ្មៅ មានតម្លៃប្រមាណ៣ម៉ឺនដុល្លារ ដោយបានឡុកសោទ្វារមិនឱ្យសមត្ថកិច្ចដែលប្រដេញតាមនោះចាប់ខ្លួនទេ រីឯជនម្នាក់ទៀត បានព្យាយាមជិះម៉ូតូធំនោះគេចខ្លួន ។ ទោះបីជាបែបនេះក្តី សមត្ថកិច្ចបានវាយបំបែកកញ្ចក់រថយន្តដែលជននេះនៅក្រាញក្នុងរថយន្ត ទើបចាប់ខ្លួនបាន ។
ដោយសារតែការចាប់ខ្លួននោះឯង ទើបឈានទៅរកឃើញព្រះសុវណ្ណកោដ្ឋ តម្កល់ព្រះបរមសារីរិកធាតុ ដែលបានលាក់ទុកក្នុងផ្ទះស្ត្រីឈ្មោះ សារ៉េត ក្នុងភូមិកកោះ ឃុំខ្វាវ ស្រុកទ្រាំង ។ តាមប្រភពដដែលថា ជនដែលបានលួចព្រះសុវណ្ណកោដ្ឋដែលតម្កល់ព្រះបរមសារីរិកធាតុដែលបានតម្កល់នៅក្នុងព្រះបរមសក្យមុនីចេតិយលើកំពូលភ្នំព្រះរាជទ្រព្យ ហៅភ្នំអដ្ឋរស្ស ឬភ្នំឧដុង្គនោះ គឺឈ្មោះ កែវ ពិសី អាយុជាង២០ឆ្នាំ ជាជនញៀនថ្នាំ និងជាមុខសញ្ញាចោរកម្មដ៏សកម្មដែលសមត្ថកិច្ចតាមប្រមាញ់ ។ ការរកឃើញព្រះសុវណ្ណកោដ្ឋដែលតម្កល់ព្រះបរមសារីរិកធាតុនាពេលនេះ ដឹកនាំដោយលោកឧត្តមសេនីយ៍ត្រី ឡឹក វណ្ណៈ អនុប្រធាននាយកដ្ឋានព្រហ្មទណ្ឌក្រសួងមហាផ្ទៃ ក្រោមបញ្ជារបស់លោកឧត្តមសេនីយ៍ឯក ម៉ក់ ជីតូ ដោយរួមជាមួយសមត្ថកិច្ចនគរបាលនៃស្នងការដ្ឋានខេត្តតាកែវ ផងដែរ ។ តាមប្រភពព័ត៌មានជំហានដំបូងថា ជនសង្ស័យឈ្មោះកែវ ពិសី ជាអ្នកយកទៅលក់ឱ្យស្ត្រីឈ្មោះ សារ៉េត ។ នៅវេលាល្ងាចថ្ងៃដដែល ក្រោយពីការដកហូតបានហើយ ក៏បានយកទៅតម្កល់នៅស្នងការដ្ឋាននគរបាលខេត្តតាកែវ ដើម្បីរង់ចាំសម្ដេចព្រះសង្ឃរាជយាងមកពិនិត្យ ។ បើគិតពីរយៈពេលនៃការបាត់ពីភ្នំព្រះរាជទ្រព្យមកដល់ថ្ងៃនេះ គឺមានរយៈពេលជិត២ខែមកហើយ ។
ទាក់ទិននឹងព័ត៌មានគួរឱ្យរន្ធត់សម្រាប់ប្រជាពលរដ្ឋដែលកាន់ព្រះពុទ្ធសាសនា ត្រូវបានប្រភពក្រៅផ្លូវការនានានិយាយថា ក្រុមចោរជាទមិឡឥតសាសនា បានធ្វើសកម្មភាពលួចនៅយប់ថ្ងៃទី៩ ធ្នូ ឈានចូលថ្ងៃទី១០ ធ្នូ កន្លងមកនេះ ។
គួរកត់សម្គាល់ថា ព័ត៌មានពីការបាត់នេះ មិនត្រូវបានសមត្ថកិច្ច និងអាជ្ញាធរទម្លាយឱ្យដឹងម្តងណាទេ ថាតើព្រះសុវណ្ណកោដ្ឋដែលធ្វើអំពីមាសនោះពិតជាត្រូវចោរលួចបាត់មែន ឬអត់ ? ដោយសារមិនមានការផ្តល់ព័ត៌មាន ទើបដំណឹងនេះបានក្លាយទៅជាដំណឹងបែបចចាមអារ៉ាម តរហូតមក ប៉ុន្តែពេលនេះ បានរកឃើញហើយ ព្រមទាំងធ្វើឱ្យចោរទមិឡអស់លក្ខណ៍ប្រាកដមែន ៕
ចែករំលែកព័តមាននេះ