រាជធានីភ្នំពេញ ៖ បន្ទាប់ពីធ្វើកូដកម្មតវា៉អស់រយៈពេល៤ថ្ងៃកន្លងមក និងបន្ទាប់ពីដោះស្រាយបញ្ហារួចរាល់ កម្មករប្រមូលសំរាមរបស់ក្រុមហ៊ុនសិុនទ្រី ដឹកនាំដោយលោក យស់ យុទ្ធី អភិបាលរងខណ្ឌដូនពេញ និងលោក គឹម វុត្ថា ប្រធានសណ្តាប់ធ្នាប់ខណ្ឌ បានចុះប្រមូលសំរាមនៅតាមមហាវិថីសំខាន់ៗមួយចំនួន កាលពីវេលារំលងអធ្រាត្រ ឈានចូលថ្ងៃទី៦ កុម្ភៈ ដោយប្រើប្រាស់រថយន្តដឹកសំរាមចំនួន១៨គ្រឿង និងគ្រឿងចក្រចូកសំរាមជាច្រើនគ្រឿងផងដែរ ។
លោក គឹម វុត្ថា ប្រធានសណ្តាប់ធ្នាប់ខណ្ឌដូនពេញបានឱ្យដឹងថា អស់រយៈពេលបីថ្ងៃកន្លងមកហើយដែលសំរាមត្រូវបានគរចោលនៅតាមដងវិថីនានាក្នុងខណ្ឌដូនពេញ ដែលធ្វើឱ្យប៉ះពាល់យា៉ងធ្ងន់ធ្ងរដល់សោភ័ណភាពទីក្រុងក៏ដូចជាប៉ះពាល់ដល់សុខភាពផងដែរ ខណៈពេលបងប្អូនប្រមូលសំរាមក្រុមហ៊ុនសិុនទ្រីនាំគ្នាធ្វើកូដកម្មទាមទារដំឡើងប្រាក់ខែ ។ បន្ទាប់ពីបងប្អូនកម្មករសិុនទ្រីយល់ព្រមចូលធ្វើការជាធម្មតាវិញ នៅវេលាម៉ោង៣រសៀល ថ្ងៃទី៥ កុម្ភៈ និងតាមការណែនាំពីលោកអភិបាលរាជធានីភ្នំពេញក៏ដូចជាលោកអភិបាលខណ្ឌដូនពេញ រូបលោកនិងលោក យស់ យុទ្ធី អភិបាលរងខណ្ឌដូនពេញ បានដឹកនាំកម្មករប្រមូលសំរាមក្រុមហ៊ុនសិុនទ្រី ចុះប្រមូលសំរាមនៅមុខព្រះបរមរាជវាំង មហាវិថីព្រះមុនីវង្ស មហាវិថីព្រះនរោត្តម ផ្លូវភ្លោះមុខមន្ទីរពេទ្យព្រះអង្គឌួង កំណាត់មហាវិថីសហព័ន្ធរុស្សុី វិថីសុរាម្រឹត វិថីសុធារស រហូតដល់ម៉ោងជាង១២រំលងអធ្រាត្រ ។ ការប្រមូលសំរាមនៅតាមមហាវិថីខាងលើ ក៏បានរំលស់ការកកស្ទះផងដែរ ។
ដោយឡែក នៅព្រឹកថ្ងៃទី៦ កុម្ភៈ កម្មករប្រមូលសំរាមបានបន្តយកសំរាមចេញនៅតាមផ្លូវនានាដូចជាផ្លូវលេខ១៣ លេខ១៩ លេខ១៤៤ លេខ១៣០ លេខ១៣៦ ជុំវិញផ្សារកណ្តាល ផ្សារចាស់ និងផ្សារធំថ្មី ។ល។ ការប្រមូលសំរាមនៅរសៀលថ្ងៃទី៥ កុម្ភៈ មកដល់ថ្ងៃទី៦ កុម្ភៈ ក៏បានប្រមូលដឹកចេញអស់ប្រហែលជា៤០ភាគរយហើយ ។
មន្ត្រីទទួលខុសត្រូវលើការប្រមូលសំរាមប្រចាំខណ្ឌដូនពេញបាននិយាយថា ក្នុងការប្រមូលនេះដោយសារតែសំរាមមានការថែមជារៀងរាល់ថ្ងៃ ប៉ុន្តែដែលខាងក្រុមហ៊ុនសិុនទ្រី ត្រូវដោះស្រាយឱ្យអស់នោះ គឺសំរាមនៅក្នុងខណ្ឌចំនួន៤ដូចជា ខណ្ឌដូនពេញ ខណ្ឌ៧មករា ខណ្ឌចំការមន និងខណ្ឌទួលគោក ព្រោះខណ្ឌទាំង៤នេះ ជាកន្លែងសំបូរអ្នកទេសចរណ៍ជាតិ និងអន្តរជាតិដើរកម្សាន្ត ព្រមទាំងជាខណ្ឌនៅកណ្តាលរាជធានី ។
លោកប្រធានសណ្តាប់ធ្នាប់ខណ្ឌដូនពេញបានបញ្ជាក់ថា សំរាមមាននៅសល់តាមដងផ្លូវខាងក្នុងប៉ុណ្ណោះ រីឯតាមមហាវិថីសំខាន់ៗត្រូវបានដឹកចេញអស់ហើយ និងកំពុងបន្តដឹកចេញជាបន្តបន្ទាប់ទៀតនៅថ្ងៃទី៦ កុម្ភៈ ។ លោកនិយាយថា ក្នុងរយៈពេលប្រហែលថ្ងៃទី៧ កុម្ភៈ នឹងអស់សំរាមទាំងស្រុង៕
ចែករំលែកព័តមាននេះ