រាជធានីភ្នំពេញ ៖ នៅលើសង្វៀនស្ថានីយទូរទស្សន៍រាជធានីភ្នំពេញ បុ៉ស្តិ៍លេខ៣ ថ្ងៃអាទិត្យ ទី៩ ខែកុម្ភៈ សប្តាហ៍នេះប្រជុំដោយកីឡាករជើងខ្លាំងចំនួន៥គូឡើងមកសម្តែងឫទ្ធិដាក់គ្នាជូនទស្សនិកជនបានទស្សនា ។ ក្នុងចំណោមកីឡាករជើងខ្លាំង៥គូនេះ គេចាប់អារម្មណ៍ខ្លាំងជាងគេលើជំនួបប្រកួតរវាងកីឡាករ ម៉ន សាម៉េត មកពីក្លិបវិស្វកម្មបច្ចេកទេសទ័ពជើងគោកព្រែកឯងកីឡា និងកីឡាករសារឹម ង៉ា មកពីសមាគមកីឡាប្រដាល់ក្រសួងការពារជាតិ និងជំនួបប្រកួតរវាងកីឡាករហ៊ុន ឈុនហេង មកពីក្លិបតាព្រហ្មមានជ័យបង្ក្រាបគ្រឿងញៀន និងកីឡាករម៉ន វីរៈ មកពីក្លិបវិស្វកម្មបច្ចេកទេសទ័ពជើងគោកព្រែកឯងកីឡា ។
រវាងម៉ន សាម៉េត និង សារឹម ង៉ា ធ្លាប់ជួបគ្នាច្រើនលើករួចមកហើយ ប៉ុន្តែ ម៉ន សាម៉េត មិនធ្លាប់ឈ្នះម្តងណាឡើយ តែគេមិនព្រមចុះញ៉មសោះ ទើបលើកនេះគេទទូចសុំជួប សារឹម ង៉ា ម្តងទៀតដើម្បីជម្រះបញ្ជីឱ្យដឹងស-ខ្មៅ ។ ទោះបីយ៉ាងណា អ្នកទស្សនាភាគច្រើននៅតែមិនទុកចិត្តសមត្ថភាពរបស់ ម៉ន សាម៉េត ថាអាចទៅរួចជាមួយ សារឹម ង៉ា ដដែល ។ ម៉ន សាម៉េត តាមការកត់សម្គាល់ គេជាកីឡាករដែលមានចិត្តច្រឡោតខ្លាំងណាស់ឱ្យតែគូប្រកួតវាយត្រូវរាងឈឺសាច់បន្តិច គេស្ទុះចូលវាយវិញទាំងកំរោលមិនខាន ។ ម្យ៉ាងទៀត គេមិនសូវសម្បូរស្នៀតវាយគូប្រកួតទេ ពោលគឺល្អបានតែស្នៀតកណ្តាប់ដៃម៉ាត់ និងស្នៀតជើងទាត់បុ៉ណ្ណោះ ឯស្នៀតកែង និងជង្គង់ពេលវាយចេញម្តងៗគ្មានប្រសិទ្ធភាពទាល់តែសោះ ។ ចំណែកឯ សារឹម ង៉ា មានចិត្តធ្ងន់មិនចេះឆេវឆាវផ្តាសឡើយ ជំហរវាយលុករបស់គេរឹងមាំល្អ ស្នៀតកែង និងជង្គង់អាចធ្វើការវាយចេញបានគ្រប់ស្ថានការណ៍ទាំងអស់ និងមិនចេះមើលស្រាលលើគូប្រកួតឡើយ ទោះបីអ្នកនោះធ្លាប់ចាញ់គេរាប់ភ្លេចដូច ម៉ន សាម៉េត នេះក្តី ។
ហ៊ុន ឈុនហេង និង ម៉ន វីរៈ វិញ មិនធ្លាប់ជួបគ្នាពីមុនមកទេ ទោះបីពួកគេទាំងពីរស្ថិតក្នុងចង្កោមកីឡាករជើងខ្លាំងដែលមានល្បិចប្រយុទ្ធនៅលើសង្វៀនក្រាស់ពេញខ្លួនដូចគ្នាក្តី ។ ហ៊ុន ឈុនហេង ស្នៀតកែងនិងជង្គង់របស់គេអាចប្រើការបានគ្រប់ស្ថានភាព ពោលគឺវាយជាប្រយោលក៏បាន ចូលកៀកក៏បាន បុ៉ន្តែល្វែងខាងក្រោមរបស់គេដូចជាទន់ជ្រាយបន្តិច ។ ជួប ម៉ន វីរៈ លើកនេះគេមិនហ៊ានអះអាងទុកមុនពីលទ្ធផលចាញ់-ឈ្នះឡើយ ។ ឯម៉ន វីរៈ មានស្នៀតប្រយុទ្ធល្អគួរសម ទាំងស្នៀតដៃ និងស្នៀតជើងអាចប្រើការបានល្អដូចគ្នា តែស្នៀតកែងនិងជង្គង់កម្រឃើញវាយចេញទៅមានប្រសិទ្ធភាពណាស់ ។ ជួប ហ៊ុន ឈុនហេង លើកនេះមិនដឹងថា គេអាចទៅរួចឬអត់ទេ ព្រោះសូម្បីតែអ្នកធ្លាប់តាមដានការប្រកួតភាគច្រើន ក៏មិនហ៊ានវាយតម្លៃពីលទ្ធផលទុកមុនបានដែរ ។
ក្រៅពីគូចាប់អារម្មណ៍នេះទៅ នៅមានការប្រកួតរវាងកីឡាករមួក សាវឌី មកពីសមាគមកីឡាប្រដាល់ក្រសួងការពារជាតិ ជួបជាមួយកីឡាករ សូត្រ ប៊ុនធី មកពីក្លិបបក្សីស្លាបដែក ។ កីឡាកររឿង សារ័ត្ន មកពីក្លិបកងពលតូចឆត្រយោងលេខ៩១១ ជួបជាមួយកីឡាករសៅ ប៊ុននឿន មកពីក្លិបតាព្រហ្មមានជ័យបង្ក្រាបគ្រឿងញៀន និងកីឡាករសោម វិឆ័យ មកពីក្លិបសាលវ័ន្តកីឡា ជួបជាមួយកីឡាករវី សាមិត្ត មកពីក្លិបបក្សីស្លាបដែក ៕
ចែករំលែកព័តមាននេះ