រាជធានីភ្នំពេញ ៖ ក្នុងជំនួបប៉ះគ្នាលើកដំបូងរវាងកីឡាករចៅ ផលឌឿ និងកីឡាករ ហេង វិឆ័យ ធ្វើឱ្យមានការចាប់អារម្មណ៍គួរសមក្នុងចំណោមអ្នកស្នេហាកីឡាប្រដាល់នៅលើសង្វៀនទូរទស្សន៍បាយ័នស្ទឹងមានជ័យ នាថ្ងៃសុក្រ ទី៧ ខែកុម្ភៈ ឆ្នាំ២០១៤ នេះ ។
រាជធានីភ្នំពេញ ៖ ក្នុងជំនួបប៉ះគ្នាលើកដំបូងរវាងកីឡាករចៅ ផលឌឿ និងកីឡាករ ហេង វិឆ័យ ធ្វើឱ្យមានការចាប់អារម្មណ៍គួរសមក្នុងចំណោមអ្នកស្នេហាកីឡាប្រដាល់នៅលើសង្វៀនទូរទស្សន៍បាយ័នស្ទឹងមានជ័យ នាថ្ងៃសុក្រ ទី៧ ខែកុម្ភៈ ឆ្នាំ២០១៤ នេះ ។ ការជួបគ្នានេះ កីឡាករចៅ ផលឌឿ ដែលជាសិស្សច្បងកម្លាំងខ្លាំងបានអះអាងថា មិនអាចឱ្យចាញ់ ហេង វិឆ័យ ទេ ដើម្បីកុំឱ្យបាត់បង់ក្រេឌីត។
នៅក្នុងពិភពប្រដាល់ កីឡាករចៅ ផលឌឿ មកពីក្លិបសំរោងកោង ត្រូវគេស្គាល់យ៉ាងច្បាស់ថា ជាកីឡាករចិត្តធំ និងមានកម្លាំងស៊ុហ្វរឹងមាំ។ បើទោះជាគេអន់កម្ពស់ និងមានដៃជើងមិនសូវវែងដែលជាលក្ខណៈអំណោយផលបន្តិចមែន បុ៉ន្តែកីឡាកររូបនេះកម្រចាញ់ច្រាបអ្នកណាណាស់ ដោយត្រូវគេឱ្យឈ្មោះថា ជាកីឡាករមោះមុតម្នាក់ដែលរមែងបញ្ចេញកម្លាំងវាយទៅលើដៃគូ ធ្វើឱ្យគូប្រកួតភាគច្រើនបាក់ស្បាតនៅលើសង្វៀនស្ទើរតែគ្រប់គ្នា ដោយមិនលំបាកទៀតផង ។ កីឡាករមាឌម៉ាន់ និងសម្បុរខ្មៅរូបនេះមានទម្លាប់វាយរុលមិនដកថយឡើយ ដោយភាគច្រើនគេមិនខ្លាចការសម្លុតរបស់គូប្រកួតទាល់តែសោះ បើទោះជាដៃគូរបស់គេគឺជាជើងចាស់ដែលមានសមត្ថភាពមិនធម្មតាក៏ដោយ ។ ការប្រកួតលើកចុងក្រោយរបស់គេ ដ្បិតថាចាញ់ពិន្ទុ ហុឹម សារ៉ាន់ មកពីក្លិបក្រសួងការពារជាតិក្នុងទឹកទី៥ បុ៉ន្តែការបរាជ័យនាពេលនោះគឺបណ្តាលមកពីគេជ្រុលដៃថែមខុសពីលក្ខន្តិកៈ ដែលនាំឱ្យមានការចាប់កំហុសបុ៉ណ្ណោះ ។ បើប្រៀបធៀបនឹងការប្រកួតជាមួយកីឡាករជើងចាស់ផ្សេងវិញ កីឡាកររូបនេះស្ទើរតែឈ្នះប្រៀប និងស្ថិតក្នុងភាពប្រកៀកប្រកិតមិនដែលដាច់ឆ្ងាយឡើយ ក្នុងការប្រកួតរយៈពេល៥ទឹកពេញ ។
ងាកមកកាន់កីឡាករហេង វិឆ័យ វិញ ថ្វីដ្បិតគេមានស្នៀតទាត់ខ្លាំង និងល្អ បុ៉ន្តែសន្ទុះនៃការវាយលុករបស់គេត្រូវបានកត់សម្គាល់ថា មានកម្រិតមោះមុតស្តួចស្តើងណាស់ ។ ពេលខ្លះកីឡាករមកពីក្លិបកងពលតូចលេខ៧០រូបនេះវាយមិនឈ្នះកីឡាករវ័យក្មេងស្រករក្រោយមួយចំនួនផង នៅពេលដែលគេប៉ះគូប្រកួតមានចិត្តស៊ូ ហើយហ៊ានវាយប្រយុទ្ធដោយមិនខ្លាចគ្រោះថ្នាក់។ បន្ថែមពីលើនោះ គេក៏ជាកីឡាករដែលឆាប់បាក់ស្បាត និងចុះញ៉មភាពស្ទុះស្ទារបស់ដៃគូផងដែរ ទើបលទ្ធផលនៃការប្រកួតកន្លងមកមានផ្លែផ្កាចាញ់ច្រើនជាងឈ្នះនៅលើសង្វៀនប្រដាល់។ គិតត្រឹម១០ប្រកួតចុងក្រោយ គឺមានរហូតដល់៧ប្រកួតទៅហើយដែលគេបរាជ័យ ព្រោះតែភាពញញើតញញើមចំពោះដៃគូបែបនេះ ។ ទោះបីជាយ៉ាងណា ប្រសិនបើគេបានដឹងពីចំណុចខ្សោយរបស់គូប្រកួត កីឡាកររូបនេះក៏ស្ទុះវាយសម្រុកបានចំគោលដៅ និងធ្វើឱ្យកីឡាករជាដៃគូបរាជ័យដោយការអស់ចិត្តដែរ ។ ជាមួយនឹងផ្លែផ្កានេះ ទើបមានការពិបាកប៉ាន់ស្មានថា តើជំនួបជាមួយកីឡាករចៅ ផលឌឿ គេនឹងខ្លាច ឬក៏ស្ទុះស្ទាវាយលុក ព្រោះតែចាប់បានចំណុចខ្សោយ ។ ក្រុមអ្នកវិភាគនិយាយថា រវាងចៅ ផលឌឿ និង ហេង វិឆ័យ ពួកគេមានចំណុចពិសេសម្យ៉ាងម្នាក់ បុ៉ន្តែអ្វីដែលគេសម្គាល់ គឺកីឡាករចៅ ផលឌឿ គេក្លាហានជាង មោះមុតជាង រីឯកីឡាករហេង វិឆ័យ ទាស់ត្រង់មានស្មារតីមិនសូវក្លាហាន និងមោះមុតនេះឯង។
ចៅ ផលឌឿ និយាយថា ការប្រកួតលើកនេះ គេមិនអាចបរាជ័យបានទេ ដោយសារតែគេទើបនឹងចាញ់កីឡាករខ្លាំងៗពីរបីរូបរួចទៅហើយ ធ្វើឱ្យបាត់បង់សន្ទុះគាំទ្រ ។ ការបរាជ័យជាមួយ ហេង វិឆ័យ នឹងក្លាយជារឿងអាម៉ាស់ ហើយធ្វើឱ្យគេធ្លាក់ចុះក្រេឌីតសម្បើមណាស់ ទើបគេមិនអាចចាញ់បាន ។ កីឡាកររូបនេះប្តេជ្ញាចិត្តប្រកបដោយភាពមោះមុតបំផុតថាមិនអាចចាញ់ឡើយ គឺត្រូវតែឈ្នះចំពោះជំនួបជាមួយ ហេង វិឆ័យ ។ ការអះអាងនេះ គឺបន្ទាប់ពីគេយល់ថា ហេង វិឆ័យ ដ្បិតថាមានស្នៀតល្អ បុ៉ន្តែគេនៅតែមានចំណុចខ្សោយមួយចំនួនដែលមិនពិបាកយកឈ្នះ ។ ចៅ ផលឌឿ ប្រាប់ថា គេជឿថា ខ្លួនគេមិនអាចចាញ់ ហេង វិឆ័យ បានទេ ទោះបីជា ហេង វិឆ័យ ធ្លាប់មានប្រវត្តិយកឈ្នះកីឡាករជើងខ្លាំងឯទៀតឱ្យបាក់មុខនៅលើសង្វៀននាពេលកន្លងមកក្តី ។ គេរំពឹងទុកយ៉ាងខ្លាំងថា អ្វីដែលបានអះអាងនឹងក្លាយជាការពិត ដោយបានទាំងប្រាប់ដោយភាពជឿជាក់ថា ហេង វិឆ័យ មិនអាចជាអ្នកមកទាញទម្លាក់រូបគេឱ្យដាំក្បាលចុះក្រេឌីតនៅក្នុងពិភពប្រដាល់ម្នាក់ទៀតឡើយ ។ ចៅ ផលឌឿ ប្រាប់ទៀតថា បើចាញ់ ហេង វិឆ័យ គឺស្មើនឹងធ្វើឱ្យអ្នកគាំទ្របាត់បង់ភាពជឿជាក់ដូចគ្នា អុីចឹងហើយទើបគេដាច់ខាតត្រូវតែឈ្នះ ហេង វិឆ័យ ឱ្យខាងតែបានដោយមិនអាចចាញ់បានទេ ។
ការប្រកួតលើកចុងក្រោយ កីឡាករហេង វិឆ័យ វាយចាញ់កីឡាការខុន ចាន់ថន មកពីក្លិបកងពលធំអន្តរាគមន៍លេខ៣ ព្រះវិហារដោយពិន្ទុ។ ចាំមើលៗ តើកីឡាករចៅ ផលឌឿ ពិតជាឈ្នះ ហេង វិឆ័យ ដូចការតាំងចិត្ត ឬបែរជាទទួលលទ្ធផលផ្សេង ?នៅលើសង្វៀននោះដែរ កីឡាករមាស សារិទ្ធ មកពីក្លិបរកាខ្នុរគុនខ្មែរបង្ក្រាបគ្រឿងញៀន ត្រូវឡើងប្រកួតជាមួយកីឡាករសុខ ចំរើនស្រ៊ុន មកពីមជ្ឈមណ្ឌលសកម្មភាពកម្ចាត់មីនកម្ពុជា ដើម្បីបង្កើតវេទិកាប៉ះគ្នាជាលើកដំបូង។ កីឡាករផាន់ ពិសិដ្ឋ មកពីក្លិបគជសារកីឡា ឡើងប្រកួតសងសឹកជាមួយកីឡាករសុឹម ប៊ុនឆៃ មកពីក្លិបព្រៃទទឹងខេត្តបាត់ដំបង និងកីឡាករអៀង ចាន់ល័ក្ខ មកពីក្លិបកងទ័ពជើងគោក ប្រកួតជាមួយកីឡាករសល់ អាម៉ា មកពីក្លិបកុសលកីឡា ៕
ចែករំលែកព័តមាននេះ