រាជធានីភ្នំពេញ ៖ ការប្រកួតបាល់ទាត់ដណ្តើមពានរង្វាន់សម្តេចតេជោ ហ៊ុន សែន ប្រចាំឆ្នាំ២០១៤ (Hun Sen Cup 2014) កាលពីល្ងាចថ្ងៃទី៥ កុម្ភៈ នៅ២ទីលានមានចំនួន៤ប្រកួតនោះ បានរកឃើញក្រុមឈ្នះឡើងទៅកាន់វគ្គ៨ក្រុមចុងក្រោយខ្លះហើយ ។
រាជធានីភ្នំពេញ ៖ ការប្រកួតបាល់ទាត់ដណ្តើមពានរង្វាន់សម្តេចតេជោ ហ៊ុន សែន ប្រចាំឆ្នាំ២០១៤ (Hun Sen Cup 2014) កាលពីល្ងាចថ្ងៃទី៥ កុម្ភៈ នៅ២ទីលានមានចំនួន៤ប្រកួតនោះ បានរកឃើញក្រុមឈ្នះឡើងទៅកាន់វគ្គ៨ក្រុមចុងក្រោយខ្លះហើយ ។ សម្រាប់ពូលB ដែលលេងនៅពហុកីឡដ្ឋានជាតិអូឡាំពិក ក្រុមគិរីវង់សុខសែនជ័យ ប្រកួតឈ្នះក្រុមខណ្ឌចំការមន ក្នុងលទ្ធផល៦ទល់នឹង២។
៦គ្រាប់របស់ក្រុមគិរីវង់សុខសែនជ័យ រកបានដោយកីឡាករអុិន វិច្ឆិកា ពាក់អាវលេខ១០ ចំនួន៣គ្រាប់ គឺនៅនាទីទី៣៣, ៣៧ និង៧៨ និង៣គ្រាប់ទៀតរកបានដោយកីឡាករសេង លីណា ពាក់អាវលេខ១២ នៅនាទីទី១៦, កីឡាករឯក វណ្ណៈ ពាក់អាវលេខ១១ នៅនាទីទី៦៨ និងកីឡាករញឹម សុវណ្ណារ៉ា ពាក់អាវលេខ២៦ នៅនាទីទី៧១ ។ ចំណែក២គ្រាប់របស់ក្រុមខណ្ឌចំការមន រកបានដោយកីឡាករប៊ុត សិទ្ធី ពាក់អាវលេខ១៨ នៅនាទីទី៧៣ និងកីឡាកររស់ រតនៈ ពាក់អាវលេខ១០ នៅនាទីទី៨៥ ។
គិតមកដល់ពេលនេះ ក្រុមគិរីវង់សុខសែនជ័យ លេងបាន២ប្រកួត ឈ្នះទាំង២ប្រកួត មាន៦ពិន្ទុ ឯក្រុមខណ្ឌចំការមន លេងបាន២ប្រកួត ចាញ់ទាំង២ប្រកួត មាន០ពិន្ទុ ។ តាមរយៈលទ្ធផលនេះធ្វើឱ្យគេដឹងថា ក្រុមគិរីវង់សុខសែនជ័យ អាចកក់កៅអីសម្រាប់វគ្គ៨ក្រុមចុងក្រោយបានហើយ ចំណែកក្រុមខណ្ឌចំការមនគេចមិនផុតពីការហាលអាវបានឡើយ ។
មួយប្រកួតទៀត ក្រុមខេត្តស្វាយរៀងលេងឈ្នះក្រុមសាកលវិទ្យាល័យអាស៊ីអឺរុ៉ប ក្នុងលទ្ធផល៣ទល់នឹង១ ។ ៣គ្រាប់របស់ក្រុមខេត្តស្វាយរៀង កីឡាករផាន់នី អុីរដ្ឋា ពាក់អាវលេខ២៧ រកបាន២គ្រាប់ម្នាក់ឯងនៅនាទីទី៥៦ និង៦៨ និង១គ្រាប់ទៀតរកបានដោយកីឡាករនេន សុធារ័ត្ន ពាក់អាវលេខ២៣ នៅនាទីទី៣៣។ ចំណែក១គ្រាប់របស់ក្រុមសាកលវិទ្យាល័យអាស៊ីអឺរុ៉បរកបានដោយកីឡាករសារី ម៉ាត់ណូរ៉ូទីន ពាក់អាវលេខ១១ នៅនាទីទី៣៥ ។ គិតមកដល់ពេលនេះ ក្រុមខេត្តស្វាយរៀងលេងបាន២ប្រកួត ឈ្នះទាំង២ប្រកួត មាន៦ពិន្ទុ បានឡើងទៅលេងនៅវគ្គ៨ក្រុមចុងក្រោយ ឯក្រុមសាកលវិទ្យាល័យអាស៊ីអឺរុ៉ប លេងបាន២ប្រកួតចាញ់ទាំង២ប្រកួត មាន០ពិន្ទុ គឺត្រូវហាលអាវដោយចៀសមិនរួច ។ សម្រាប់ពូលA ដែលលេងនៅស្តាតចាស់ឯណោះវិញ ក្រុម Naga Corp យកឈ្នះក្រុមខេត្តក្រចេះ ក្នុងលទ្ធផល៨ទល់នឹង០ ។
៨គ្រាប់របស់ក្រុម Naga Corp គឺ៣គ្រាប់រកបានដោយកីឡាករប្រាក់ ចាន់រតនា ពាក់អាវលេខ៩ នៅនាទីទី១៣, ១៧ និង៤៥ ។ ៣គ្រាប់ទៀតរកបានដោយកីឡាករមាស ឆាយតារាវុធ ពាក់អាវលេខ៣៦ នៅនាទីទី៧៦, ៧៩ និង៨៥ និង២គ្រាប់ទៀតរកបានដោយកីឡាករសាន ណារិទ្ធ ពាក់អាវលេខ៨ នៅនាទីទី៦៨ និងកីឡាករសាន់ សុវណ្ណរិទ្ធី ពាក់អាវលេខ១៨ នៅនាទីទី៣២ ។
មួយប្រកួតទៀត ក្រុមចម្ការកៅស៊ូបឹងកេត លេងឈ្នះក្រុមកងរាជអាវុធហត្ថខេត្តព្រះសីហនុ ក្នុងលទ្ធផល២ទល់នឹង០ ។ ២គ្រាប់របស់ក្រុមចម្ការកៅស៊ូបឹងកេតរកបានដោយកីឡាករឃួន ឡាបូរ៉ាវី ពាក់អាវលេខ៩ តែម្នាក់ឯងនៅនាទីទី២៣ និង២៧ ។ ក្រុម Naga Corp និងក្រុមចម្ការកៅសូ៊បឹងកេត លេងបាន២ប្រកួត ឈ្នះទាំង២ប្រកួត ចំណែកក្រុមខេត្តក្រចេះ និងក្រុមកងរាជអាវុធហត្ថខេត្តព្រះសីហនុ លេងបាន២ប្រកួតដូចគ្នា ចាញ់ទាំង២ប្រកួត ដូច្នេះក្រុមដែលលេងឈ្នះមានឱកាសបានឡើងទៅលេងនៅវគ្គ៨ក្រុមចុងក្រោយជាបន្តទៀត ឯក្រុមចាញ់ត្រូវហាលអាវត្រឹមនេះ ៕
ចែករំលែកព័តមាននេះ