រាជធានីភ្នំពេញ ៖ បុរសម្នាក់ត្រូវបានប៉ូលិសប៉ុស្តិ៍ចោមចៅឃាត់ខ្លួន បន្ទាប់ពីស្ត្រីម្នាក់ប្តឹងថា បានចាប់ច្របាច់គូទ និងវាយនាងដណ្តើមយកគ្រឿងអលង្ការ ខណៈនាងកំពុងដើរតាមផ្លូវដោយមិនដឹងខ្លួន។
រាជធានីភ្នំពេញ ៖ បុរសម្នាក់ត្រូវបានប៉ូលិសប៉ុស្តិ៍ចោមចៅឃាត់ខ្លួន បន្ទាប់ពីស្ត្រីម្នាក់ប្តឹងថា បានចាប់ច្របាច់គូទ និងវាយនាងដណ្តើមយកគ្រឿងអលង្ការ ខណៈនាងកំពុងដើរតាមផ្លូវដោយមិនដឹងខ្លួន។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៨ និង១៥នាទីព្រឹក ថ្ងៃទី៦ កុម្ភៈ ២០១៤ នៅតាមផ្លូវបេតុងស្ថិតក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។
បុរសសង្ស័យខាងលើឈ្មោះអោម សុឃឿន អាយុ២៦ឆ្នាំ ស្នាក់នៅក្នុងភូមិកើតហេតុខាងលើ ដោយឡែកស្ត្រីរងគ្រោះឈ្មោះធឹម យ៉ា អាយុ៣៣ឆ្នាំ ស្នាក់ក្នុងផ្ទះជួលភូមិកើតហេតុខាងលើដែរ។
ស្ត្រីរងគ្រោះបានឱ្យដឹងថា មុនពេលកើតហេតុ នាងបានដើរចេញពីផ្ទះទៅផ្សារព្រៃទា ខណៈនោះស្រាប់តែជនសង្ស័យជិះម៉ូតូ១គ្រឿងម៉ាកហុងដាឌ្រីមសេ១២៥ ស៊េរី២០១១ ពណ៌ខ្មៅ ពាក់ស្លាកលេខភ្នំពេញ១AZ៩៣៨៤មកដល់ជិតធ្វើសកម្មភាពចាប់ច្របាច់គូទ និងកាន់ស្មានាងជាប់ ព្រមទាំងវាយដណ្តើមយកគ្រឿងអលង្ការមានខ្សែ.កទម្ងន់១ជីកន្លះ និងកងដៃ១ឈុត ខណៈនោះនាងបានស្រែកឆោឡោ និងប្តឹងប៉ូលិសឱ្យឃាត់ខ្លួនជនសង្ស័យ ភ្លាមៗនោះជនសង្ស័យបានបណ្តោះគ្រឿងអលង្ការទៅឱ្យបក្សពួកផ្សេងទៀតដែលរត់គេចខ្លួន។
ក្រោយឃាត់ខ្លួននាំទៅដល់ប៉ុស្តិ៍ប៉ូលិសចោមចៅ ជនសង្ស័យបានបដិសេធថា ខ្លួនមិនបានវាយដណ្តើមយកគ្រឿងអលង្ការពីស្ត្រីរូបនោះទេ ខ្លួនគ្រាន់តែស្ទាបគូទនាងលេងតែប៉ុណ្ណោះ។ ទោះជាបែបណា ប៉ូលិសបានបញ្ជូនជនសង្ស័យទៅកាន់អធិការដ្ឋានខណ្ឌពោធិ៍សែនជ័យដើម្បីសាកសួរ និងកសាងសំណុំរឿងបន្តទៀត៕
ចែករំលែកព័តមាននេះ