រាជធានីភ្នំពេញ ៖ កម្លាំងអនុរក្សពន្ធនាគារព្រៃស បានធ្វើការឃាត់ខ្លួនស្រ្តីម្នាក់ បន្ទាប់ពីរកឃើញថ្នាំញៀននៅជាប់ខ្លួនរបស់គាត់ ខណៈពេលដែលគាត់ចូលសួរសុខទុក្ខប្អូនជីដូនមួយដែលកំពុងជាប់ឃុំនៅក្នុងនោះ។ ហេតុការណ៍នោះបានកើតឡើងកាលពីវេលាម៉ោង៣និង៥០នាទីរសៀលថ្ងៃទី៥ កុម្ភៈ ២០១៤ នៅក្នុងមណ្ឌលកែប្រែ (ម១)ពន្ធនាគារព្រៃស ស្ថិតក្នុងភូមិកំរៀង សង្កាត់ព្រៃស ខណ្ឌដង្កោ ។
ស្ត្រីជាប់ចោទត្រូវបានគេស្គាល់ឈ្មោះ ចាន់ ស៊ីធឿន អាយុ៤២ឆ្នាំ មុខរបរលក់កាហ្វេ មានទីលំនៅភូមិព្រែកតាប្រាក់ សង្កាត់តាលន់ ស្រុកស្អាង ខេត្តកណ្តាល ។
តាមប្រភពព័ត៌មានពីប៉ូលិសមូលដ្ឋានបានឲ្យដឹងថា មុនពេលកើតហេតុស្រ្តីរូបនោះបាន ទិញអីវ៉ាន់ មួយចំនួនដូចជាសាប៊ូខោអាវជាដើម នៅក្នុងផ្សារពោធិ៍ចិនតុង សង្កាត់កាកាប ខណ្ឌពោធិ៍សែនជ័យ រួចជិះម៉ូតូឌុបមួយគ្រឿងចេញឆ្ពោះទៅកាន់ពន្ធនាគារព្រៃស ដើម្បីទៅសួរសុខទុក្ខ ប្អូនជីដូនមួយរបស់ខ្លួនម្នាក់ឈ្មោះ មុយ ចំរ៉ុង អាយុ២៦ឆ្នាំ រស់នៅស្រុកសំរោង ខេត្តតាកែវ ជាប់ចោទពីបទលួចមានស្ថានទម្ងន់ទោស និងត្រូវបានជាប់ឃុំនៅទីនោះ តាំងពីថ្ងៃទី២០ ធ្នូ ឆ្នាំ២០១៣ មកម្ល៉េះ ។ លុះក្រោយពេលទៅដល់ត្រូវបានក្រុមអនុរក្សពន្ធនាគារ ធ្វើការត្រួតពិនិត្យអីវ៉ាន់ដែលគាត់យកចូលទៅនោះ ហើយរកឃើញថ្នាំញៀន លាក់នៅក្នុងសំបកស្ករគ្រាប់ចំនួន០៣កញ្ចប់តូច ទើបធ្វើ ការឃាត់ខ្លួនប្រគល់ទៅឲ្យប៉ូលិសភ្លាមៗតែម្ដង។
ក្រោយពីឃាត់ខ្លួនស្ត្រីខាងលើ ត្រូវបានឃុំខ្លួនបណ្តោះអាសន្ននៅអធិការដ្ឋានខណ្ឌដង្កោ ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី ៕
ចែករំលែកព័តមាននេះ