ខេត្តព្រៃវែង ៖ បន្ទាប់ពីធ្វើសកម្មភាពដើរលួចកាច់.កម៉ូតូរបស់អ្នកស្រុក យកបានសម្រេចជាច្រើនលើកជាច្រើនសារ រហូតធ្វើឱ្យអ្នកស្រុកមានការខ្លាចរអានោះ ទីបំផុតចោរ០២នាក់ប្តីប្រពន្ធ ត្រូវអស់លក្ខណ៍ រត់លែងរួច ដោយត្រូវកម្លាំងសម្ថកិច្ច សហការជាមួយប្រជាពលរដ្ឋធ្វើការចាប់ខ្លួនបាននៅខាងជើងភូមិតាណាល ឃុំជ្រៃឃ្មុំ ស្រុកស៊ីធរកណ្តាល កាលពីវេលាម៉ោង១និង៣០នាទីរសៀល ថ្ងៃទី០៤ កុម្ភៈ ២០១៤ ខណៈពេលដែលចោរ១គូនេះ ព្យាយាមរត់គេចខ្លួន ក្រោយពីធ្វើសកម្មភាព លួចកាច់.កម៉ូតូអ្នកស្រុកនៅភូមិឡាំឡូង ។
ប្រភពពីលោកអធិការស្រុកស៊ីធរកណ្តាល បានឱ្យដឹងថា ចោរកាច់.កម៉ូតូដែលត្រូវចាប់ខ្លួនទី១-ឈ្មោះ កែវ រស្មី អាយុ៣១ឆ្នាំ(ប្តី) និងទី២-ឈ្មោះ ឆន សុខនី អាយុ៣០ឆ្នាំ(ប្រពន្ធ) អ្នកទាំង២មានទីលំនៅក្នុងសង្កាត់ទួលសង្កែ រាជធានីភ្នំពេញ ។
ប្រភពឱ្យដឹងទៀតថា នៅក្នុងសកម្មភាពដើរលួចកាច់.កម៉ូតូអ្នកស្រុក ជនទាំង២នាក់នេះ ប្រើប្រាស់ម៉ូតូមួយគ្រឿង ម៉ាកវ៉េវអ៊ី ពណ៌ក្រហម ពាក់ស្លាកលេខស្ទឹងត្រែង 1A-0513 ជិះឌុបគ្នាចេញពីភ្នំពេញ ឆ្ពោះមកខេត្តព្រៃវែង ទៅដល់ត្រង់ណាគឺលួចត្រង់ហ្នឹង ឱ្យតែម្ចាស់ទុកប្រហែស ឫទុកចោលមិននៅក្បែរ ។ ពិសេសគឺប្រជាពលរដ្ឋដែលជិះម៉ូតូទៅមើលស្រែប្រាំង ហើយនាំគ្នាទុកម៉ូតូចោលនៅតាមដងផ្លូវ ឫនៅក្រោមដើមឈើ ពេលដែលចោរទាំង២នាក់នេះ ជិះម៉ូតូទៅឃើញ គឺធ្វើសកម្មភាពលួចយកតែម្តង ដោយចោរជាប្តីឈ្មោះ កែវ រស្មី ជាអ្នកចុះកាច់.កម៉ូតូ រីឯប្រពន្ធឈ្មោះ ឆន សុខនី អង្គុយចាំលើម៉ូតូ ពេលប្តីលួចកាច់.កម៉ូតូបានហើយ ទើបជិះចេញទៅជាមួយគ្នា ។
ក្រោយពីចាប់ខ្លួន២នាក់ប្តីប្រពន្ធ បានឆ្លើយសារភាពថា ពួកគេធ្លាប់លួចកាច់.កម៉ូតូ០៩លើក យកបានម៉ូតូ០៩គ្រឿងរួចមកហើយ គីលួចបាននៅស្រុកពារាំង០២គ្រឿង ,ស្រុកស្វាយតអន្ទរ០១គ្រឿង និងស្រុកស៊ីធរកណ្តាល០៦គ្រឿង ហើយម៉ូតូដែលលួចបានពួកគេយកទៅលក់នៅខេត្តកំពង់ចាម រួចនាំគ្នាត្រឡប់ទៅភ្នំពេញវិញ ៕
ចែករំលែកព័តមាននេះ