ខេត្តប៉ៃលិន ៖ មន្រ្តីសមត្ថកិច្ចនគរបាលច្រកព្រំដែនម្នាក់ឈ្មោះ តន់ សម្បត្តិ ភេទប្រុស អាយុ ៥១ឆ្នាំ ជាអនុប្រធានប៉ុស្តិ៍ច្រកទ្វារព្រំដែនកម្ពុជា-ថៃ បានដេកស្លាប់នៅក្នុងបន្ទប់ផ្ទះជួលម្នាក់ឯង ដោយសារកើតជំងឺលើសឈាមជាយូរថ្ងៃខែមកហើយ។ ជនរងគ្រោះរស់នៅផ្ទះលេខ៣១៨ ផ្លូវ២១K សង្កាត់កាកាប ខណ្ឌដង្កោ រាជធានីភ្នំពេញ បច្ចុប្បន្នរស់នៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ បានដេកស្លាប់នៅក្នុងផ្ទះជួលបន្ទប់លេខ៣ មានម្ចាស់ឈ្មោះ អន់ ផេង ភេទប្រុស អាយុជាង ៤០ឆ្នាំ។
ហេតុការណ៍នេះ បានធ្វើឲ្យមានការភ្ញាក់ផ្អើលកាលពីវេលាម៉ោង ៥ទៀបភ្លឺ ចូលថ្ងៃទី០៤ កម្ភៈ ២០១៤ ស្ថិតនៅក្នុងផ្ទះជួលភូមិកើតហេតុខាងលើ។ ប្រភពព័ត៌មានពីមន្រ្តីប៉ុស្តិ៍ច្រកព្រំដែនកម្ពុជា-ថៃ បានឲ្យដឹងថា ជនរងគ្រោះបានឲ្យលោកគ្រូពេទ្យពិនិត្យឃើញថា មានជំងឺលើសឈាមប្រចាំកាយ ដោយកើតឡើងជាយូរថ្ងៃខែកន្លងមកហើយ។
បន្ទាប់ពីជនរងគ្រោះដឹងថា ខ្លួនមានជំងឺលើសឈាមតែងតែធ្វើទុក្ខជាញឹកញាប់ ក៏ទិញប្រដាប់ស្ទង់ឈាមមកដាក់មើល ព្រមទាំងទិញថ្នាំពេទ្យមកលេប ដើម្បីកាត់បន្ថយឈាមឡើង។ លុះនៅយប់ថ្ងៃកើតហេតុប្រហែលជាម៉ោង ៣ ទៅ ម៉ោង ៥ទៀបភ្លឺ ចូលថ្ងៃទី០៤ កុម្ភៈ ជនរងគ្រោះអាចមានអាការៈមិនស្រួលបានជាយកប្រដាប់ស្ទង់ឈាមមកដាក់ក្បែរខ្លួន។ បន្ទាប់មកជនរងគ្រោះ ក៏បានដេកស្លាប់ម្នាក់ឯងនៅក្នុងផ្ទះជួលតែម្តង។
លោកវរសេនីយ៍ទោ ឆម វ៉ាន់ធី នាយការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្ត បានរៀបរាប់ឲ្យដឹងថា តាមការពិនិត្យ និងធ្វើកោសល្យវិច័យឃើញថា ជនរងគ្រោះបានស្លាប់ដោយសារជំងឺលើសឈាមប្រាកដមែន ដោយគ្មានការធ្វើអត្តឃាត ឬឃាតកម្មអ្វីនោះទេ គឺដោយឈាមធ្វើទុក្ខខ្លាំងពេកទើបបណ្តាលឲ្យដេកស្លាប់នៅក្នុងបន្ទប់តែម្នាក់ឯងបែបនេះ។
លោក ឆម វ៉ាន់ធី បានបញ្ជាក់ទៀតថា ក្រោយពីធ្វើកោសល្យវិច័យរួច ខាងសមត្ថកិច្ចនគរបាល ក៏បានប្រគល់សាកសពជនរងគ្រោះឲ្យក្រុមគ្រួសារ ដើម្បីដឹកយកទៅធ្វើបុណ្យតាមប្រពៃណីនៅស្រុកកំណើតនៅឯរាជធានីភ្នំពេញ នៅថ្ងៃដដែលនេះ៕
ចែករំលែកព័តមាននេះ