ខេត្តមណ្ឌលគិរី ៖ នៅសាលប្រជុំសាលាខេត្តមណ្ឌលគិរី កាលពីព្រឹកថ្ងៃទី០៤ កុម្ភៈ ២០១៤ លោក ប៊ិន ឈិន ឧបនាយករដ្ឋមន្ត្រី និងជាប្រធានអាជ្ញាធរជាតិដោះស្រាយទំនាស់ដីធ្លី បានអញ្ជើញជាអធិបតីក្នុងកិច្ចប្រជុំពិភាក្សា ដើម្បីស្វែងយល់អំពីការអនុវត្តកិច្ចការងាររបស់រដ្ឋបាលថ្នាក់ខេត្ត ពិសេសពាក់ព័ន្ធនឹងការអនុវត្តបទបញ្ជាលេខ០១បប របស់រាជរដ្ឋាភិបាល ស្ដីពីការទប់ស្កាត់ការកាប់រានដីព្រៃគ្រប់ប្រភេទរបស់រដ្ឋយកធ្វើជាកម្មសិទ្ធិ និងបទបញ្ជាលេខ០១បប ស្ដីពីវិធានការពង្រឹង និងបង្កើនប្រសិទ្ធភាព នៃការគ្រប់គ្រងដីសម្បទានសេដ្ឋកិច្ច ស្ថានភាពទំនាស់ដីធ្លីទូទៅ និងការដោះស្រាយទំនាស់ដីធ្លី។
កិច្ចប្រជុំពិភាក្សានោះ ប្រព្រឹត្តទៅដោយមានការអញ្ជើញចូលរួមពី លោក អេង ប៊ុនហ៊ាង អភិបាលនៃគណៈ អភិបាលខេត្ត និងថ្នាក់ដឹកនាំបណ្ដាមន្ទីរអង្គភាពពាក់ព័ន្ធនានា។ លោក អេង ប៊ុនហ៊ាង អភិបាលខេត្ត បានរាយការណ៍ជូន លោកឧបនាយករដ្ឋមន្រ្តី ស្ដីពីការខិតខំប្រឹងប្រែងក្នុងការទប់ស្កាត់ និងការដោះស្រាយទំនាស់ដីធ្លី។
កន្លងមក អាជ្ញាធរខេត្ត ក៏បានចាត់ក្រុមការងារឲ្យចុះដោះស្រាយវិវាទដីធ្លីរវាងប្រជាពលរដ្ឋ និងក្រុមហ៊ុនវិនិយោគសម្បទានសេដ្ឋកិច្ចមួយចំនួន ដែលមានដូចជា ក្រុមហ៊ុនផេស៊ីភិចឡូធើស (៩.០១៤ហិកតា) ក្រុមហ៊ុនផេស៊ីភិចភើល (៩.១១៤ហិកតា) ក្រុមហ៊ុនផេស៊ីភិចប្រាយដ៍ (៩.៧៧៣ហិកតា) ក្រុមហ៊ុនអ៊ិនវេសមែនអេនឌីវីឡបមែនដាយណាម (១.៤០៥ហិកតា) ក្រុមហ៊ុនអ៊ិនវេសមែនអេន ឌីវីឡបមែនដាយថាន (៥០២ហិកតា) និងក្រុមហ៊ុនប៊ិញហ្វឿក្រចេះ រ៉ាបឺកមួយ (១.២០៤ហិកតា)។
ចំពោះវិវាទទាំងនោះ គឺអាជ្ញាធរខេត្តបានសម្របសម្រួលដោះស្រាយរវាងក្រុមហ៊ុន និងប្រជាពលរដ្ឋបានចប់សព្វគ្រប់ហើយ ក្នុងនោះ ក្រុមហ៊ុនប៊ិញហ្វឿកក្រចេះ រ៉ាបឺមួយ គឺដោះស្រាយរួចរាល់បាន ៥០០ហិកតា នៅសល់ពីនោះ គឺអាជ្ញាធរកំពុងដោះស្រាយបន្ត។ លោកក៏បានលើកឡើងពីបញ្ហាប្រឈមមួយចំនួន ដែលធ្វើឲ្យមានការកាប់រានដីព្រៃ គឺផ្ដើមចេញពីប្រជាពលរដ្ឋ ជាពិសេសជនជាតិដើមភាគតិច ដោយពួកគាត់បានធ្វើចម្ការវិលជុំ បន្ទាប់មកពួកគាត់បានលក់ដីចម្ការទៅឲ្យឈ្មួញ។
កត្តាមួយទៀត គឺដីនៅខេត្តមណ្ឌលគិរី មានជីជាតិល្អធ្វើឲ្យជនចំណាកស្រុកបានមកតាំងទីលំនៅ ដើម្បីកាប់រានយកដីព្រៃធ្វើចម្ការ បញ្ហាមួយទៀត គឺអ្នកមានអំណាច និងអ្នកមានប្រាក់ បានជួលឲ្យប្រជាពលរដ្ឋកាប់រានដីព្រៃយកឲ្យពួកគាត់។
ក្នុងឱកាសនោះ លោក ប៊ិន ឈិន បានថ្លែងការកោតសរសើរដល់អាជ្ញាធរគ្រប់លំដាប់ថ្នាក់ មន្ត្រីរាជការ កងកម្លាំងប្រដាប់អាវុធ ដែលបានយកចិត្តទុកដាក់បំពេញភារកិច្ចបានល្អ។ លោកបានផ្ដាំផ្ញើដល់អាជ្ញាធរ មន្ត្រីរាជការ កងកម្លាំងប្រដាប់ទាំង ៣ប្រភេទ សូមបន្តយកចិត្តទុកដាក់រួមសហការគ្នាអនុវត្តគោលនយោបាយចាស់ សកម្មភាពថ្មី របស់រាជរដ្ឋាភិបាលឲ្យមានប្រសិទ្ធភាពខ្ពស់។ ទន្ទឹមនឹងនោះ ត្រូវបន្តយកចិត្តទុកដាក់ទប់ស្កាត់ការកាប់បំផ្លាញព្រៃឈើរបស់រដ្ឋធ្វើជាកម្មសិទ្ធិឯកជន ដែលជាមូលហេតុនាំឲ្យហិនហោចព្រៃឈើ និងធ្វើឲ្យខូចបរិស្ថានធម្មជាតិ។
ចំពោះមន្ទីរដែនដី នគររូបនីយកម្ម សំណង់ និងសុរិយោដី ដែលជាអ្នកចុះវាស់វែងដីធ្លីផ្ទាល់ជូនប្រជាពលរដ្ឋធ្វើយ៉ាងណាឲ្យការងារនេះ មានភាពរលូន ជៀសវាងមានការថ្នាំងថ្នាក់ជាមួយប្រជាពលរដ្ឋ និងធ្វើឲ្យប្រជាពលរដ្ឋមានភាពជឿជាក់លើគោលយោបាយចាស់ សកម្មភាពថ្មី របស់រាជរដ្ឋាភិបាល៕
ចែករំលែកព័តមាននេះ