រាជធានីភ្នំពេញ ៖ សហព័ន្ធកីឡាប្រដាល់កម្ពុជា កាលពីពេលថ្មីៗកន្លងមកនេះបានបង្កើតច្បាប់ថ្មីមួយទៀតសម្រាប់កីឡាករទាំងអស់នៅពេលឡើងសង្វៀនប្រកួត មិនឱ្យប្រើស្នៀតកែង និងជង្គង់ហួសពីដែនកំណត់ឡើយ ដើម្បីកុំឱ្យមានគ្រោះថ្នាក់នៅពេលប្រកួត បុ៉ន្តែមិនមែនមានន័យថា ហាមមិនឱ្យប្រើស្នៀតទាំងនោះឡើយ ។
រាជធានីភ្នំពេញ ៖ សហព័ន្ធកីឡាប្រដាល់កម្ពុជា កាលពីពេលថ្មីៗកន្លងមកនេះបានបង្កើតច្បាប់ថ្មីមួយទៀតសម្រាប់កីឡាករទាំងអស់នៅពេលឡើងសង្វៀនប្រកួត មិនឱ្យប្រើស្នៀតកែង និងជង្គង់ហួសពីដែនកំណត់ឡើយ ដើម្បីកុំឱ្យមានគ្រោះថ្នាក់នៅពេលប្រកួត បុ៉ន្តែមិនមែនមានន័យថា ហាមមិនឱ្យប្រើស្នៀតទាំងនោះឡើយ ។ ការដាក់បម្រាមដល់កីឡាករមិនឱ្យប្រើស្នៀតកែង និងជង្គង់ហួសពីដែនកំណត់នោះ គឺបានន័យថា ការប្រើស្នៀតកែងត្រូវបានហាមដាច់ខាតមិនឱ្យវាយពុះពីលើក្បាល និងវាយពីខាងក្រោយ ក្រៅពីកន្លែងសំខាន់ទាំងពីរនេះ គឺអាចវាយបានទាំងអស់ ។
មុននឹងឈានទៅដល់ការដាក់បម្រាមនេះ គឺសហព័ន្ធកីឡាប្រដាល់កម្ពុជាបានធ្វើការស្រាវជ្រាវយ៉ាងល្អិតល្អន់អស់រយៈពេលជាច្រើនឆ្នាំរួចមកហើយថា ការវាយកែងសំដៅទៅលើកន្លែងទាំងពីរនេះ វាអាចបង្កគ្រោះថ្នាក់ខ្លាំងណាស់អាចឈានទៅដល់បាត់បង់អាយុជីវិតទៀតផង ដែលកន្លងមកយើងមិនសូវដែលបានគិតគូរដល់ចំណុចនេះឡើយ ។ ចំពោះការប្រើស្នៀតជង្គង់ ក៏ត្រូវបានហាមដាច់ខាតដូចគ្នា ចំពោះការវាយចូលចំប្រឡោះភ្លៅ បើទោះជាកន្លែងមួយនេះមានពាក់ប្រដាប់ការពារមែន តែវាមិនប្រាកដថាអាចចៀសផុតពីគ្រោះថ្នាក់បានមួយរយភាគរយនោះទេ ។ ការប្រើស្នៀតជង្គង់គឺអនុញ្ញាតឱ្យវាយបានចាប់ពីគល់ចង្កេះឡើងទៅលើ ហើយបើចុះមកក្រោមគឺហាមមិនឱ្យវាយឡើយ ។ ថ្មីៗនេះលោកឧត្តមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់កម្ពុជា ធ្លាប់បានមានប្រសាសន៍រួចមកហើយថា ពេលប្រកួតហាមមិនឱ្យកីឡាករប្រើស្នៀតជង្គង់វាយនៅផ្នែកខាងក្រោមចង្កេះឡើយ អ្នកដែលប្រព្រឹត្តខុសទៅនឹងច្បាប់ប្រកួតនេះបើទោះជាមានចេតនា ឬ មិនមានចេតនាក្តី គឺអាចទទួលទោសដូចគ្នា ។ ការកែប្រែច្បាប់ថ្មីនេះត្រូវបានគេមើលឃើញថា សហព័ន្ធកីឡាប្រដាល់កម្ពុជាសព្វថ្ងៃកំពុងតែប្រឹងប្រែងយ៉ាងខ្លាំង ធ្វើយ៉ាងណាឱ្យវិស័យកីឡាប្រដាល់ក្បាច់គុនបុរាណខ្មែរទទួលបានការចាប់អារម្មណ៍កាន់តែខ្លាំងឡើងពីសំណាក់មហាជន ក៏ដូចជាធ្វើឱ្យច្បាប់ប្រកួតកាន់តែមានការកែប្រែល្អប្រសើរជាងមុន ។
គេធ្លាប់បានដឹងរួចមកហើយថា កន្លងមកនេះការប្រកួតនៅលើសង្វៀនគឺមិនសូវមានការអនុវត្តច្បាប់ទម្លាប់ឱ្យបានត្រឹមត្រូវនោះឡើយ គឺចេះតែវាយតាមអំពើចិត្ត ធ្វើយ៉ាងណាឱ្យតែបានឈ្នះ គឺមិនខ្វល់ឡើយ ។ ទម្លាប់មិនល្អនេះវាអាចជះឥទ្ធិពលយ៉ាងអាក្រក់ចំពោះវិស័យកីឡាប្រដាល់ ធ្វើឱ្យវិស័យមួយនេះមិនមានការរីកចម្រើនលូតលាស់ទៅបានឡើយ ។ បុ៉ន្តែពេលនេះសហព័ន្ធកីឡាប្រដាល់កម្ពុជាបានព្យាយាមរិះរកចំណុចល្អៗ កែប្រែលក្ខន្តិកៈនៃការប្រកួតឱ្យកាន់តែមានភាពល្អប្រសើរឡើងជាបណ្តើរៗហើយ ដោយព្យាយាមប្រែក្លាយវិស័យកីឡាប្រដាល់ឱ្យក្លាយជាកីឡាដែលប្រកួតដើម្បីមិត្តភាព សុខភាពតែបុ៉ណ្ណោះ ៕
ចែករំលែកព័តមាននេះ