រាជធានីភ្នំពេញ ៖ បាល់ទាត់ជាប្រភេទកីឡាដ៏ពេញនិយមបំផុតក្នុងស្រទាប់យុវវ័យគ្រប់សម័យកាល ជាពិសេសនៅបណ្តាប្រទេសអឺរ៉ុប ទោះបីយ៉ាងណា នៅបណ្តាប្រទេសអាស៊ីក៏មានការពេញនិយមខ្លាំងណាស់ដែរ ។ ជាក់ស្តែងនៅប្រទេសកម្ពុជាទោះបីកីឡាបាល់ទាត់មិនទាន់រីកចម្រើនខ្លាំងដូចបណ្តាប្រទេសលោកខាងលិចក៏គេឃើញប្រជាពលរដ្ឋកម្ពុជា ជាពិសេសយុវវ័យចូលចិត្តលេងនិងទស្សនាការប្រកួតកីឡាបាល់ទាត់ផ្ទាល់នៅទីលានប្រកួតក៏ដូចជាតាមកញ្ចក់ទូរទស្សន៍ខ្លាំងណាស់ដែរ ។
ដោយមើលឃើញពីសក្តានុពលទាក់ទាញចំណង់ចំណូលចិត្តមនុស្សរបស់កីឡាបាល់ទាត់បែបនេះហើយ ទើបគេឃើញចំនួនមជ្ឈមណ្ឌលកីឡាបាល់ទាត់ដែលក្រាលទៅដោយស្មៅសិប្បនិម្មិត ត្រូវបានបង្កើតឡើងជាហូរហែ ជាពិសេសនៅរាជធានីភ្នំពេញតែម្តង ។ ទីលានប្រកួតបាល់ទាត់នេះត្រូវបានគេរៀបចំឡើងតាមបែបអន្តរជាតិដែលមើលទៅហាក់ដូចជាស្មៅធម្មជាតិពិតៗផ្តល់នូវភាពងាយស្រួលសម្រាប់ការហ្វឹកហាត់របស់កីឡាករអាជីព និងមិនមែនអាជីពដើម្បីសុខភាព ។ ដោយទទួលបាននូវភាពជោគជ័យនិងមើលឃើញពីតម្រូវការរបស់អតិថិជនផងនោះ មជ្ឈមណ្ឌលកីឡា3g ដែលធ្លាប់ត្រូវបានជ្រើសរើសជាទីកន្លែងប្រកួតកីឡាជាលក្ខណៈមិត្តភាពជាតិ អន្តរជាតិ និងព្រឹត្តិការណ៍ផ្សេងៗ ទាំងស្ថាប័នរដ្ឋនិងឯកជនផងនោះឥឡូវនេះមជ្ឈមណ្ឌលកីឡា 3g បានបើកសាខា ទី២របស់ខ្លួន១ទៀតស្ថិតនៅចម្ងាយប្រហែល៣០០ម៉ែត្រពីមជ្ឈមណ្ឌលកីឡា3g ទី១ដែលមានទីតាំងនៅតំបន់សំបុកចាប សង្កាត់ទន្លេបាសាក់ ខណ្ឌចំការមន ។
លោកខៀវ ភារិទ្ធ ជាម្ចាស់មជ្ឈមណ្ឌលកីឡា 3g បានមានប្រសាសន៍ថា បានជាលោកបង្កើតមជ្ឈមណ្ឌលកីឡា 3g ទី២នេះ គឺដើម្បីបំពេញតម្រូវការរបស់អតិថិជនដែលធ្លាប់គាំទ្រ និងមកលេងកីឡានៅមជ្ឈមណ្ឌលរបស់លោកជារៀងរាល់ថ្ងៃ ។ សម្រាប់ទីលានបាល់ទាត់ហ្វូតសាលក្នុងមជ្ឈមណ្ឌលកីឡា3g កសាងឡើងតាមក្បួនខ្នាតស្តង់ដាអន្តរជាតិត្រឹមត្រូវ ដែលមានកម្រាលស្មៅសិប្បនិម្មិតកម្ពស់០,៦៥ម៉ែត្រ ។ លោកបន្តថា គោលបំណងដែលលោកបង្កើតមជ្ឈមណ្ឌលកីឡា 3g គឺដើម្បីលើកកម្ពស់វិស័យកីឡាកម្ពុជាឱ្យកាន់តែរីកចម្រើនដូចបណ្តាប្រទេសជឿនលឿនលើសាកលលោក។ ការលេងកីឡានាំមកនូវសុខភាព សុជីវធម៌ សីលធម៌ ភាពសប្បាយរីករាយ មិត្តភាព រវាងមនុស្សម្នាក់ទៅមនុស្សម្នាក់ ពីស្ថាប័នរដ្ឋទៅស្ថាប័នឯកជន និងពីប្រទេសមួយទៅប្រទេសមួយទៀត ។
លោកបន្ថែមទៀតថា នៅមជ្ឈមណ្ឌលកីឡា3g ទី២ក៏មានការបញ្ចុះតម្លៃ១០% ក្នុងរយៈពេល៣ខែសម្រាប់អតិថិជនដែលបានមកកក់ទីលានបាល់ទាត់3g ទី២នេះ ។ ទន្ទឹមនឹងនោះដែរ លោកបាននិងកំពុងរៀបចំព្រឹត្តិការណ៍ប្រកួតបាល់ទាត់ហ្វូតសាលដណ្តើមពានរង្វាន់ប្រចាំឆ្នាំ២០១៤ ដើម្បីអបអរសាទរក្នុងការបើកសម្ពោធមជ្ឈមណ្ឌលកីឡា 3g ទី២នាពេលឆាប់ៗនេះ ៕
ចែករំលែកព័តមាននេះ