រាជធានីភ្នំពេញ ៖ កីឡាការិនីពិការជើងម្ចាស់មេដាយប្រាក់រត់ចម្ងាយ១០០ម៉ែត្រ និង២០០ម៉ែត្រ ក្នុងព្រឹត្តិការណ៍អាស៊ានប៉ារ៉ាហ្គេម ស្ទើរតែគ្រប់រដូវកាល ធីន សេងហុង បានបង្ហាញការពុះពោរក្នុងការហ្វឹកហាត់យ៉ាងខ្លាំងសម្រាប់ស្វាគមន៍ព្រឹត្តិការណ៍រត់ប្រណាំងនៅអន្តរជាតិនាពេលបន្តបន្ទាប់ ។
រាជធានីភ្នំពេញ ៖ កីឡាការិនីពិការជើងម្ចាស់មេដាយប្រាក់រត់ចម្ងាយ១០០ម៉ែត្រ និង២០០ម៉ែត្រ ក្នុងព្រឹត្តិការណ៍អាស៊ានប៉ារ៉ាហ្គេម ស្ទើរតែគ្រប់រដូវកាល ធីន សេងហុង បានបង្ហាញការពុះពោរក្នុងការហ្វឹកហាត់យ៉ាងខ្លាំងសម្រាប់ស្វាគមន៍ព្រឹត្តិការណ៍រត់ប្រណាំងនៅអន្តរជាតិនាពេលបន្តបន្ទាប់ ។
ជាមួយនឹងការប្រឹងប្រែងនាងហាក់ទទូចចង់បានដាច់ខាតនូវជើងសិប្បនិម្មិតប្រភេទថ្មីមួយ ដែលនាងអះអាងថា ជាក្តីសង្ឃឹម និងអាចជួយឱ្យនាងមិនពិបាកក្នុងការប្រកួតប្រជែង ។ ធីន សេងហុង និយាយថា តាមរយៈការប្រឹងប្រែងកន្លងមក នាងមិនហត់នោះទេ បើទោះជាត្រូវរត់ចម្ងាយហួសពី៤០០ម៉ែត្រ ដែលនាងធ្លាប់ដណ្តើមបានមេដាយមាសក្នុងព្រឹត្តិការណ៍អាស៊ានប៉ារ៉ាហ្គេម កាលពីឆ្នាំ២០១១ នៅប្រទេសឥណ្ឌូណេស៊ី ។ ក្នុងនោះសូម្បីតែល្បឿនដែលនាងសម្រេចបានក៏លឿនជាងមុនគួរឱ្យកត់សម្គាល់ផងដែរ ប៉ុន្តែនៅតែមិនអាចដណ្តើមបានមេដាយមាស ក្នុងរយៈចម្ងាយ១០០ម៉ែត្រ និង២០០ម៉ែត្រ សម្រាប់ព្រឹត្តិការណ៍ស៊ីហ្គេមផ្នែកជនពិការកន្លងមក ដោយសារតែនាងមិនមានជើងសិប្បនិម្មិតដែលមានស្តង់ដាដូចកីឡាការិនីប្រទេសរីកចម្រើនគេប្រើ ។
កីឡាការិនីដែលមានសភាពពិការជើងស្តាំក្នុងប្រភេទT44 រូបនេះ និយាយថា ជើងសិប្បនិម្មិតដែលនាងប្រើសម្រាប់រត់ប្រណាំងរាល់លើកមិនមែនជាជើងសិប្បនិម្មិតដែលកីឡាករ និងកីឡាការិនីពិការជើងនៅអន្តរជាតិប្រើសម្រាប់រត់ប្រណាំងនោះទេ ប៉ុន្តែមកពីនាងមិនមានលទ្ធភាពទិញជើងសិប្បនិម្មិតដែលមានស្តង់ដាបែបនេះដូចគេ ទើបត្រូវបង្ខំចិត្តប្រើជើងសិប្បនិម្មិត ដែលគេប្រើសម្រាប់តែហាត់រត់ក្នុងពេលហ្វឹកហ្វឺន ។ នេះសំណាងហើយ ដែលនាងទទួលបានជើងសិប្បនិម្មិតដែលប្រើរាល់ថ្ងៃពីសប្បុរសជនម្នាក់រស់នៅប្រទេសអូស្ត្រាលី ក្នុងពេលដែលនាងត្រូវបានអង្គការមួយធានាឱ្យទៅហ្វឹកហាត់នៅទីនោះ កុំអីពិតជាយ៉ាប់ជាងនេះ ។ នាងអះអាងថា សម្រាប់ល្បឿនក្នុងការរត់ប្រណាំងនាងមិនជឿថាអ្វីដែលនាងបានប្រឹងប្រែងមានល្បឿនចាញ់គេនោះទេ ប៉ុន្តែមកពីគេមានជើងសិប្បនិម្មិតស្តង់ដា ដែលអាចជួយទប់លំនឹង និងបង្កើនល្បឿនឱ្យរលាស់បានលឿន ទើបកម្រិតនៃល្បឿនរបស់នាងនៅតែស្ទុះមិនដល់គេ ។
ជាក់ស្តែងត្រឹមរយៈចម្ងាយ១០០និង២០០ម៉ែត្រ ដែលនាងរត់វិញ គឺមិនមានភាពនឿយហត់ទាល់តែសោះ ។ ធីន សេងហុង បង្ហាញភស្តុតាងមួយចំនួនបញ្ជាក់ថា ធៀបនឹងកម្រិតកើនឡើងចំពោះល្បឿនក្នុងការរត់ កីឡាការិនីវៀតណាមដែលជាម្ចាស់មេដាយមាសនាំមុខនាង កើនល្បឿនប្រហាក់ប្រហែលនាងប៉ុណ្ណោះ ប៉ុន្តែកត្តាដែលនាងចាញ់ប្រៀបគឺជើងសិប្បនិម្មិតដែលប្រើសម្រាប់រត់នោះខុសគ្នាតែម្តង ។ ក្នុងការដណ្តើមបានមេដាយប្រាក់ចំនួន២ពីការរត់ប្រណាំង កីឡាការិនីដែលមានស្រុកកំណើតនៅខេត្តកំពង់ចាមរូបនេះ ប្រើថិរវេលាតែ១៦,៩០វិនាទី សម្រាប់វិញ្ញាសា១០០ម៉ែត្រ និង៣៦,៦៦វិនាទី សម្រាប់វិញ្ញាសា២០០ម៉ែត្រ ក្នុងការដណ្តើមយកមេដាយប្រាក់នៅក្នុងប្រទេសមីយ៉ាន់ម៉ា ។ ធីន សេងហុង បញ្ជាក់ថា បើនាងទទួលបានជើងសិប្បនិម្មិតដែលមានស្តង់ដាសម្រាប់រត់នាងមិនជឿថាខ្លួនឯងដណ្តើមមិនបានមេដាយពីការប្រកួតស៊ីហ្គេមសម្រាប់ជនពិការនោះទេ ខណៈដែលក្នុងចំណោមកីឡាការិនីនៅតំបន់អាស៊ានទាំងអស់គឺមានតែកីឡាការិនីវៀតណាមម្នាក់គត់ប៉ុណ្ណោះ ដែលនាងប្រកួតមិនឈ្នះ ដោយសារតែល្បឿននៃការរត់ប្រណាំងរបស់គេក៏បានមកពីសន្ទុះជួយពីជើងសិប្បនិម្មិតដែលមានស្តង់ដាដែរ ។
នាងមិនរំពឹងថានឹងទទួលបានជើងសិប្បនិម្មិតដូចការចង់បាននោះទេ ដោយសារតែជើងនោះមានតម្លៃរហូតដល់ជាង២ម៉ឺនដុល្លារ និងមានតម្លៃខ្ពស់ជាងនេះ ដែលហួសពីក្តីស្រមៃរបស់ខ្លួន ។ ក្រុមអ្នកហ្វឹកហាត់ជាមួយកីឡាការិនីធីន សេងហុង ក៏បញ្ជាក់ដូចគ្នាដែរថា បើនាងពិតជាមានសម្ភារគ្រប់គ្រាន់ ពិសេសគឺជើងសិប្បនិម្មិតពេញលក្ខណៈមានន័យថា ឱកាសដណ្តើមយកមេដាយមាសគឺមិនលំបាកនោះឡើយ ក្នុងពេលដែលនាងទទួលបានមេដាយប្រាក់ស្ទើរគ្រប់ព្រឹត្តិការណ៍ប្រកួតស៊ីហ្គេមកន្លងមក ដោយចាញ់តែកីឡាការិនីពិការរបស់វៀតណាមម្នាក់ប៉ុណ្ណោះ ។
ទោះបីយ៉ាងណា កីឡាការិនីដែលតស៊ូរហូតរៀនចេះស្ទាត់ភាសាអង់គ្លេសរូបនេះ ប្រកាន់ជំហរមិនលាឈប់ពីការរត់ប្រណាំងនោះទេ បើទោះជានាងមិនទទួលបានជើងសិប្បនិម្មិតស្តង់ដាបន្ទាប់ពីចេញមុខអំពាវនាវនេះក្តី ។ ក្នុងពេលនេះនាងកំពុងប្រឹងបង្កើនសន្ទុះហ្វឹកហាត់សម្រាប់ស្វាគមន៍ការប្រកួតលើឆាកអន្តរជាតិលើកក្រោយៗទៀតផង ៕
ចែករំលែកព័តមាននេះ