ក្នុងឱកាសបុណ្យចូលឆ្នាំចិន-វៀតណាម ដែលទើបតែកន្លងផុតទៅថ្មីៗនេះ បានបង្ហាញឱ្យឃើញថា រលកនៃការធ្វើទេសចរណ៍មានការមមាញឹកគួរឱ្យកត់សម្គាល់ទាំងនៅផ្ទៃក្នុងប្រទេស ក៏ដូចជាតាមច្រកទ្វារអន្តរជាតិមួយចំនួន និងនៅតាមតំបន់ទេសចរណ៍ដ៏មានសក្តានុពលរបស់កម្ពុជា ដូចជាតំបន់អង្គរ និងប្រាសាទព្រះវិហារ លើកំពូលភ្នំដងរែក និងឆ្នេរសមុទ្រ ។
ក្នុងឱកាសបុណ្យចូលឆ្នាំចិន-វៀតណាម ដែលទើបតែកន្លងផុតទៅថ្មីៗនេះ បានបង្ហាញឱ្យឃើញថា រលកនៃការធ្វើទេសចរណ៍មានការមមាញឹកគួរឱ្យកត់សម្គាល់ទាំងនៅផ្ទៃក្នុងប្រទេស ក៏ដូចជាតាមច្រកទ្វារអន្តរជាតិមួយចំនួន និងនៅតាមតំបន់ទេសចរណ៍ដ៏មានសក្តានុពលរបស់កម្ពុជា ដូចជាតំបន់អង្គរ និងប្រាសាទព្រះវិហារ លើកំពូលភ្នំដងរែក និងឆ្នេរសមុទ្រ ។
ទេសចរនៅអង្គរកើនឡើង ខេត្តសៀមរាប ៖ បុណ្យចូលឆ្នាំប្រពៃណីចិន-វៀតណាម ក្នុងរយៈពេល៣ថ្ងៃកន្លងមក មានភ្ញៀវជាតិ និងអន្តរជាតិ មកកម្សាន្តយ៉ាងច្រើនកុះករនៅតាមរមណីយដ្ឋានបារាយណ៍ទឹកថ្លា ភ្នំគូលែន និងនៅតាមតំបន់ទន្លេសាប រីឯសន្តិសុខសណ្តាប់ធ្នាប់ មិនមានអ្វីកើតឡើងគួរឱ្យកត់សម្គាល់ទេ ។ លោក ង៉ូវ សេងកាក់ ប្រធានមន្ទីរទេសចរណ៍ខេត្ត ឱ្យដឹងថា ភ្ញៀវទេសចរជាតិ និងអន្តរជាតិ មានការកើនឡើង៤,៨០% បើប្រៀបធៀបនឹងឆ្នាំ២០១៣ គឺមាន៥៥.៤៥២នាក់ ដែលក្នុងឆ្នាំ២០១៣ មានត្រឹមតែ៥២.៩០៩នាក់ ។ ដោយឡែក ភ្ញៀវអន្តរជាតិក្នុងឆ្នាំ២០១៤នេះ មានចំនួន២៥.០៤២នាក់ កើនឡើង៥,៦២% ដែលឆ្នាំ២០១៣ មានត្រឹមតែ២៣.៧០៩នាក់ ឯភ្ញៀវក្នុងស្រុកមានចំនួន៣០.៤១០នាក់ កើនឡើង៤,១៤% ច្រើនជាងឆ្នាំ២០១៣ ដែលមានត្រឹមតែ២៩.២០០នាក់ ។ លោក ង៉ូវសេងកាក់ បន្តទៀតថា ចំពោះសណ្ឋាគារ និងផ្ទះសំណាក់ ពុំមានការដំឡើងថ្លៃទេ នៅក្នុងថ្ងៃបុណ្យចូលឆ្នាំចិន-វៀតណាមនេះ រីឯនៅតាមភោជនីយដ្ឋាន ក៏មិនមានដំឡើងថ្លៃដែរ ។
រមណីយដ្ឋានវប្បធម៌ប្រវត្តិសាស្ត្រប្រាសាទព្រះវិហារខេត្តព្រះវិហារ ៖ រមណីយដ្ឋានវប្បធម៌ប្រវត្តិសាស្ត្រប្រាសាទព្រះវិហារ បានទទួលភ្ញៀវទេសចរជាតិ និងអន្តរជាតិជាច្រើនពាន់នាក់ក្នុង១ថ្ងៃៗ នាឱកាសបុណ្យចូលឆ្នាំប្រពៃណីចិន-វៀតណាម ។ នេះបើតាមការបញ្ជាក់ឱ្យដឹងរបស់លោក ចាន់ ឆន អ្នកគ្រប់គ្រងព័ត៌មាននៃអាជ្ញាធរជាតិព្រះវិហារ ប្រចាំប្រាសាទព្រះវិហារ ។ លោក ចាន់ ឆន ឱ្យដឹងថា ក្នុង១ថ្ងៃៗ ភ្ញៀវចម្រុះជាតិសាសន៍ ពិសេសនោះកូនខ្មែរកាត់ចិនទៅទស្សនាកម្សាន្តនៅរមណីយដ្ឋានប្រវត្តិសាស្ត្រប្រាសាទព្រះវិហារ ចាប់ពី១.៥០០នាក់ ទៅ២.០០០ នាក់ ។ ភ្ញៀវទេសចរទៅកាន់ប្រាសាទព្រះវិហារ ក្នុងឱកាសបុណ្យចូលឆ្នាំប្រពៃណីចិន-វៀតណាម ឆ្នាំនេះលើសពីបណ្តាឆ្នាំមុនៗ ។ ប្រាសាទព្រះវិហារ គឺជាមរតកដ៏មហាសាល មិនអាចកាត់ថ្លៃបាន ដែលជាកេរដំណែលរបស់បុព្វបុរសខ្មែរយើង តាំងពីសម័យអង្គរដ៏រុងរឿង ដែលបានសាងសង់ឡើងនៅលើកំពូលភ្នំដងរែក ក្នុងអធិបតេយ្យរបស់កម្ពុជា ។ នៅលើរមណីយដ្ឋានប្រាសាទព្រះវិហារ បច្ចុប្បន្នអាជ្ញាធរជាតិព្រះវិហារ កំពុងថែរក្សាជាប្រចាំ ក្នុងនោះដែរក៏មានឆ្មាំប្រាសាទ និងអ្នកអនាម័យធ្វើការថែទាំក្នុងបរិវេណប្រាសាទយា៉ងយកចិត្តទុកដាក់ផងដែរ ។ ដោយឡែក បញ្ហាសភាពការណ៍នៅតាមបណ្តោយខ្សែត្រៀមជួរមុខ ក្នុងតំបន់ប្រាសាទព្រះវិហារ ក៏ដូចជាតាមបណ្តោយជួរភ្នំដងរែក ស្ថិតក្នុងឱកាសប្រទេសថៃធ្វើការបោះឆ្នោត ក៏ពុំមានសភាពការណ៍អ្វីគួរឱ្យកត់សម្គាល់ទេ គឺមានភាពស្ងប់ស្ងាត់ ។
ច្រកទ្វារអន្ដរជាតិបាវិតខេត្តស្វាយរៀង ៖ មានភ្ញៀវទេសចរចេញចូលតាមច្រកទ្វារអន្ដរជាតិបាវិត ក្នុងឱកាសបុណ្យចូលឆ្នាំចិន-វៀតណាម ឆ្នាំ២០១៤ នេះ ចំនួន២៨.៩២៣នាក់ ។ លោកវរសេនីយ៍ទោ អឹុង សុងយូ នាយប៉ុស្ដិ៍ច្រកទ្វារព្រំដែនអន្ដរជាតិបាវិត បានឱ្យដឹងថា នៅក្នុងឱកាសបុណ្យចូលឆ្នាំចិន-វៀតណាម ឆ្នាំ២០១៤ នេះបើគិតនៅមុនចូលឆ្នាំថ្ងៃទី២៨-២៩-៣០ មករា ភ្ញៀវជាជនជាតិខ្មែរចូលមកប្រទេសកម្ពុជា តាមច្រកទ្វារព្រំដែនអន្ដរជាតិបាវិត មានចំនួន៦០៩នាក់ ឯប្រជាជនខ្មែរចេញទៅលេងនៅប្រទេសវៀតណាមមានចំនួន៧៥៣នាក់ ។ ចំណែកភ្ញៀវទេសចរជនជាតិវៀតណាមចូលមកទស្សនាព្រះរាជាណាចក្រកម្ពុជាតាមច្រកទ្វារអន្ដរជាតិបាវិតគិតពីថ្ងៃទី២៨-២៩-៣០ មករា មានចំនួន១.៦០៩នាក់ និងចេញពីកម្ពុជាទៅវៀតណាមមានចំនួន២.២៨៩នាក់ ។ ចំពោះភ្ញៀវទេសចរចម្រុះជាតិសាសន៍ចូលមករយៈពេល៣ថ្ងៃ២៨-២៩-៣០ មករា មានចំនួន៣.៥៣៥នាក់ និងចេញទៅប្រទេសវៀតណាមមានចំនួន៣.៦៦៤នាក់ ។ បើគិតចាប់ពីថ្ងៃទី៣១ មករា ដល់ថ្ងៃទី១ កុម្ភៈ ២០១៤ ភ្ញៀវជនជាតិខ្មែរចូលមកតាមច្រកទ្វារអន្ដរជាតិបាវិត មានចំនួន៤៣៩នាក់ ចេញទៅលេងនៅប្រទេសវៀតណាមមានចំនួន១.០៤៤នាក់ ។ រីឯជនជាតិវៀតណាមចូលមកកម្សាន្ដនៅកម្ពុជាមានចំនួន៦.០១៣នាក់ ចេញ ទៅប្រទេសប្រទេសវៀតណាមវិញមានចំនួន៨៤៩នាក់ ។ ចំពោះភ្ញៀវជនបរទេសចម្រុះជាតិសាសន៍ចូលមកកម្ពុជាមានចំនួន៨.០០៤នាក់ ចេញទៅប្រទេសវៀតណាមមានចំនួន២.២១៥នាក់ ។
ដូច្នេះ រយៈពេលរដូវបុណ្យចូលឆ្នាំចិន-វៀតណាម គិតចាប់ពីថ្ងៃទី២៨ មករាដល់ថ្ងៃទី២ កុម្ភៈ មានភ្ញៀវទេសចរចេញ ចូលកម្ពុជា-វៀតណាម សរុបចំនួន២៨.៩២៣នាក់ ក្នុងនោះខ្មែរមាន២.៨៤៥នាក់ និងជនជាតិវៀតណាមមាន១០.៨២០នាក់ ។ នៅថ្ងៃទី៣ កុម្ភៈ ភ្ញៀវជនជាតិវៀតណាមចូលមកទស្សនាកម្ពុជាច្រើនជាងរាល់ថ្ងៃ អាចកើនដល់ប្រមាណ២.០០០នាក់ ជនបរទេសចម្រុះជាតិសាសន៍ក៏អាចកើនឡើងដែរ ។ ទោះបីជាយ៉ាងណាក៏ដោយ បើប្រៀបធៀបនឹងរដូវចូលឆ្នាំចិន-វៀតណាម ឆ្នាំ២០១៣ ភ្ញៀវចេញចូលមានការថយចុះប្រមាណ៤០ភាគរយ សម្រាប់ជនជាតិវៀតណាម ឯចំពោះភ្ញៀវទេសចរចម្រុះជាតិសាសន៍គឺចេញចូលធម្មតា ។ អ្នកទៅកម្សាន្តនៅឆ្នេរសមុទ្រកើនទ្បើងខេត្តព្រះសីហនុ ៖ លោក មូល ឧសភា មន្ត្រីការិយាល័យមគ្គុទ្ទេសក៍ ទេសចរណ៍ នៃមន្ទីរទេសចរណ៍ខេត្តព្រះសីហនុ បានឱ្យដឹងថា នៅក្នុងឱកាសបុណ្យចូលឆ្នាំថ្មីប្រពៃណីចិន-វៀតណាម រយៈពេល៣ថ្ងៃ គឺថ្ងៃទី៣១ មករា និងទី១ និងទី២ កុម្ភៈ ភ្ញៀវទេសចរជាតិនិងអន្តរជាតិ ធ្វើដំណើរមកកម្សាន្តនៅទឹកដីខេត្តព្រះសីហនុមានចំនួន៤៩.៥០០នាក់ គឺមានការកើនទ្បើង១២,៣០% បើប្រៀបធៀបទៅនឹងឆ្នាំ២០១៣ ដែលមានភ្ញៀវទេសចរមកកម្សាន្តត្រឹមតែ ៣៨.៧៨៧នាក់ប៉ុណ្ណោះ ។
លោក មូល ឧសភា បន្តថា ក្នុងចំនួនភ្ញៀវទេសចរខាងលើ ភ្ញៀវទេសចរជាតិមានចំនួន ៤៣.៣១៣នាក់ កើនទ្បើង១១,៦៧% បើប្រៀបធៀបនឹងឆ្នាំ២០១៣ ។ ដោយទ្បែក ភ្ញៀវទេសចរអន្តរជាតិមានចំនួន ៦.១៨៧នាក់ កើនទ្បើង១៦,៩៧% បើប្រៀបធៀបទៅនឹងឆ្នាំ២០១៣ ដែលមានភ្ញៀវអន្តរជាតិត្រឹមតែ ៤.០៧៦នាក់ ។
ភ្ញៀវទេសចរ ដែលបានមកកម្សាន្តនៅតំបន់ឆ្នេរអូរឈើទាលនាឱកាសនោះ បានឱ្យដឹងថា ថ្លៃម្ហូបអាហារគ្រឿងសមុទ្រមាន បង្គា ក្តាម មឹក ត្រីសមុទ្រ គ្រប់ប្រភេទនិងថ្លៃសេវាស្នាក់នៅ ផ្ទះសំណាក់ សណ្ឋាគារ ។ល។ ឡើងថ្លៃជា២ ជា៣ ដោយសារតែចំនួនភ្ញៀវទេសចរមានការកើនទ្បើង ហើយភ្ញៀវចេះតែនាំគ្នាដេញថ្លៃយកទាំងការហូបចុក ក៏ដូចជាសេវាស្នាក់នៅ ៕
ចែករំលែកព័តមាននេះ