ខេត្តពោធិ៍សាត់ ៖ អ្នករត់ម៉ូតូឌុបម្នាក់ និងក្មេងប្រុសអាយុ៨ខែម្នាក់ទៀត បានស្លាប់នៅនឹងកន្លែង ខណៈម្តាយរបស់ក្មេងប្រុសនោះរងរបួសដាច់ជើងខាងឆ្វេង និងបាក់ជើងខាងស្តាំ ព្រោះតែអ្នករត់ម៉ូតូឌុបខាងលើ បត់មិនប្រយ័ត្ន ត្រូវរថយន្តបុកយ៉ាងពេញទំហឹងប៉ើងដូចសី ។ ហេតុការណ៍គ្រោះថ្នាក់ចរាចរណ៍ដ៏រន្ធត់នេះ កើតឡើងលើកំណាត់ផ្លូវជាតិលេខ៥ ស្ថិតក្នុងភូមិតាកែវលើ ឃុំត្នោត ស្រុកក្រគរ កាលពីវេលាម៉ោង១និង១០នាទីរសៀលថ្ងៃទី០៣ កុម្ភៈ ២០១៤ ។
លោកវរសេនីយ៍ត្រី ប៊ិន វណ្ណា អធិការនគរបាលស្រុកក្រគរ បានឱ្យដឹងថា ជនរងគ្រោះទី១-ឈ្មោះ ស ឈូកមាស ភេទប្រុស អាយុ៣៥ឆ្នាំ (ស្លាប់) ជាអ្នករត់ម៉ូតូឌុប រស់នៅភូមិពាលញែក១ សង្កាត់ផ្ទះព្រៃ ក្រុងពោធិ៍សាត់ ,ទី២ក្មេងប្រុសអាយុ០៨ខែ ឈ្មោះ លី ឡេង (ស្លាប់) ។ រីឯម្តាយរបស់ក្មេងប្រុសឈ្មោះលី ល័ក្ខ អាយុ១៩ឆ្នាំ ដាច់ជើងឆ្វេង និងបាក់ភ្លៅស្តាំ របួសយ៉ាងធ្ងន់ធ្ងរ រស់នៅស្រុករុក្ខគិរី ខេត្តបាត់ដំបង ។ រថយន្តបង្កម៉ាកវីហ្គោ ស៊េរីទំនើប ពណ៌ទឹកមាស ពាក់ស្លាកលេខភ្នំពេញ 2V-9568 អ្នកបើកបរមិនស្គាល់ឈ្មោះគេចខ្លួនបាត់ ។
បើតាមការសាកសួរពីប្រជាពលរដ្ឋដែលឃើញហេតុការណ៍បានឱ្យដឹងថា មុនពេលកើតហេតុ គេឃើញមនុស្ស០៣នាក់ ជិះម៉ូតូម៉ាកឌ្រីមសេ១២៥ ពណ៌ខ្មៅ ស៊េរី២០០៨ ពាក់ស្លាកលេខ1A-6917 បើកបរពីលិចទៅកើត ។ ពេលទៅដល់ចំណុចកើតហេតុ បត់ឆ្វេងចូលផ្លូវលំសាលាក្រហម(សាលាសំណាក់) ដោយមិនបានមើលក្រោយ ស្របពេលជាមួយគ្នានោះក៏ត្រូវរថយន្តវីហ្គោ ដែលកំពុងបោះពួយយ៉ាងពេញលឿន ស្របទិសគ្នា បុកពេញទំហឹងប៉ើងដូចសី បណ្តាលឱ្យអ្នកបើកម៉ូតូ និងក្មេងប្រុសស្លាប់ភ្លាមៗនៅនឹងកន្លែងតែម្តង ៕
ចែករំលែកព័តមាននេះ