ខេត្តកំពង់ធំ ៖ នៅសាលប្រជុំខេត្តកំពង់ធំ (អគារC) កាលពីព្រឹកថ្ងៃទី០៣ កុម្ភៈ ២០១៤ មានរៀបចំកិច្ចប្រជុំជាមួយជំនាញមេព្រៃ និងអាជ្ញាធរស្រុកពាក់ព័ន្ធ ចំនួន៣ គឺស្រុកសណ្តាន់ ស្រុកប្រាសាទសំបូរ និងស្រុកសន្ទុក ដើម្បីទប់ស្កាត់ការកាប់រានដីព្រៃរបស់រដ្ឋ ក្រោមអធិបតីភាព ឯកឧត្តម អ៊ុត សំអន អភិបាល នៃគណៈអភិបាលខេត្តកំពង់ធំ ដោយបានការអញ្ជើញចូលរួមពីលោកអភិបាលស្រុកទាំង៣ លោក គឹម ចិន្ថា នាយរងអធិការដ្ឋានរដ្ឋបាលព្រៃឈើខាងជើងបឹងទន្លសាប និង លោក តិប ញាតា នាយខណ្ឌរដ្ឋបាលព្រៃឈើកំពង់ធំ។
លោក តិប ញាតា បានឡើងរាយការណ៍ធ្វើបទបង្ហាញទៅលើផែនទីភូមិសាស្ត្រដីព្រៃឈើ ដែលមានប្រជាពលរដ្ឋចំណាកស្រុកមកពីខេត្តព្រៃវែង ខេត្តកំពង់ចាម កំពុងតែលបលួចចូលកាប់ព្រៃនៅក្នុងតំបន់ហាមឃាត់នៅព្រៃឡង់ និងព្រៃអង់តែន ព្រមទាំងមានសំណូមពរសូមឲ្យឯកឧត្តមប្រធានគណៈបញ្ជាការឯកភាពខេត្ត ជួយមានវិធានការទប់ស្កាត់ការកាប់រានទន្ទ្រានព្រៃយកដីរដ្ឋ ដែលមានឈ្មួញមួយចំនួនតូច រួមទាំងអ្នកមានអំណាចនៅពីក្រោយខ្នង បានយកប្រជាពលរដ្ឋធ្វើជាឈ្នាន់ ឲ្យចូលទៅកាប់ព្រៃ ចំណែកខ្លួនជាមេក្លោងរង់ចាំប្រមូលទិញនៅពេលកាប់រួច។
នៅស្រុកសណ្តាន់ និងស្រុកប្រាសាទសំបូរ បច្ចុប្បន្ននេះ មានគ្រឿងចក្រកំពុងធ្វើសកម្មភាពឈូសឆាយដីព្រៃ អាជ្ញាធរឃាត់សូមឲ្យផ្អាក ឲ្យម្ចាស់មកជួបជាមួយអាជ្ញាធរសួរនាំ តើមានច្បាប់អនុញ្ញាតិដែរឬទេ? តែពួកគេមិនព្រមឈប់ធ្វើសកម្មភាពឈូសឆាយទេ។ បើសំអាងតែខាងជំនាញរដ្ឋបាលព្រៃឈើ គឺពុំអាចទប់ស្កាត់បានទាំងស្រុងនោះទេ ទាល់តែមានការសហការគ្នារវាងអាជ្ញាធរ មន្ទីររៀបចំដែនដី និងនគរូបនីយកម្ម និងរដ្ឋបាលព្រៃឈើ រួមជាមួយកម្លាំងប្រដាប់អាវុធទាំង៣ ផងដែរ ទើបមានប្រសិទ្ធភាព។
ឯកឧត្តម អ៊ុត សំអន មានប្រសាសន៍ថា នៅក្នុងទឹកដីខេត្តកំពង់ធំ សកម្មភាពនៃការកាប់ទន្ទ្រានដីព្រៃរបស់រដ្ឋនៅក្នុងតំបន់ហាមឃាត់ពិតជាមានមែន ជាពិសេស គឺប្រជាពលរដ្ឋចំណាកស្រុក ដែលមកពីខេត្តព្រៃវែង និងខេត្តកំពង់ចាម។ មួយចំនួនតូចលោកទទួលស្គាល់ថា ពួកគាត់ពិតជាគ្មានដីសម្រាប់រស់នៅ និងអាស្រ័យផលពិតមែន ក៏ប៉ុន្តែ មួយចំនួនធំដែលជាអ្នកចំណាកស្រុកនេះ គឺពួកគាត់ដើរកាប់ព្រៃ ដើម្បីធ្វើអាជីវកម្មតែម្តង។
នៅពេលណាដែលពួកគាត់កាប់ទន្ទ្រានដីព្រៃរបស់រដ្ឋបានហើយនោះ គាត់លក់ឲ្យទៅឈ្មួញ និងអ្នកមានអំណាចនៅពីក្រោយខ្នងរង់ចាំទទួលទិញពីគាត់ រួចរាល់ហើយគាត់នាំគ្នាទៅកាប់រានយកដីព្រៃនៅកន្លែងផ្សេងៗទៀត ដើម្បីលក់ជាបន្តទៀត។ ចំណែកប្រជាពលរដ្ឋនៅក្នុងខេត្តមានដែរ តែមានតិចតួច ព្រោះពួកគាត់បានទទួលដីសម្បទានសេដ្ឋកិច្ចរបស់រដ្ឋ។ ចំពោះអ្នកដែលគ្មានដីពិតប្រាកដ ចាប់ពីពេលនេះតទៅ លោកសង្ឃឹមយ៉ាងមុតមាំថា ផ្នែកជំនាញ នឹងសហការជាមួយអាជ្ញាធរ មន្ទីររៀបចំដែនដី ព្រមទាំងកងកម្លាំងប្រដាប់ទាំង៣ អនុវត្តមានប្រសិទ្ធភាពចំពោះបញ្ហាខាងលើនេះ។
ជាចុងក្រោយ ឯកឧត្តមសូមសំណូមពរដល់អង្គប្រជុំថា ចាប់ពីពេលនេះតទៅ គឺយើងត្រូវតែធ្វើកុំឲ្យដូចពាក្យថា តោកៗ សឹកតែត្រដោក ឆ្អែតតែពោះក្របី គ្នាច្រើនអន្សមខ្លោច គ្នាដូចស្រមោចអន្សមឆៅ មកប្រជុំពេលណា ខាតតែពេលវេលាទៅវិញ ហើយនៅដដែលមិននាំគ្នាធ្វើសោះ៕
ចែករំលែកព័តមាននេះ