រាជធានីភ្នំពេញ ៖ ការប្រកួតបាល់ទាត់ Metfone Cambodian League កាលពីថ្ងៃអាទិត្យ ទី២ កុម្ភៈ នៅពហុកីឡដ្ឋានជាតិអូឡាំពិក ដែលមាន២ប្រកួតស្មើនឹង៤ក្រុមនោះក្រុមទាំងអស់រកបានតែ១ពិន្ទុដូចគ្នា គឺគ្មានក្រុមណាយកឈ្នះក្រុមណាឡើយ ។
រាជធានីភ្នំពេញ ៖ ការប្រកួតបាល់ទាត់ Metfone Cambodian League កាលពីថ្ងៃអាទិត្យ ទី២ កុម្ភៈ នៅពហុកីឡដ្ឋានជាតិអូឡាំពិក ដែលមាន២ប្រកួតស្មើនឹង៤ក្រុមនោះក្រុមទាំងអស់រកបានតែ១ពិន្ទុដូចគ្នា គឺគ្មានក្រុមណាយកឈ្នះក្រុមណាឡើយ ។ ក្រុមភ្នំពេញក្រោនលេងស្មើ១-១ ជាមួយក្រុមក្រសួងការពារជាតិ ចំណែកក្រុមបៀលប្រាយយូណាយធីត ក៏លេងស្មើ១-១ ជាមួយក្រុមអគ្គស្នងការដ្ឋាននគរបាលជាតិដែរ ។
សម្រាប់គូទី១ នៅតង់ទី១ ក្រុមទាំងពីរមានការលេងសម្រុកដាក់គ្នាទៅវិញទៅមក តែឱកាសស៊ុតបាល់បញ្ចូលទីស្ទើរតែគ្មានសោះឡើយ ។ លុះដល់នាទីទី៤៥ ជិតចប់តង់ទី១ ទៅហើយទើបកីឡាករធៀរី ចាន់ថាប៊ីន ពាក់អាវលេខ៩ របស់ក្រុមភ្នំពេញក្រោនរកបាន១គ្រាប់ឱ្យក្រុមរបស់ខ្លួន ។ នៅតង់ទី២ ក្រុមក្រសួងការពារជាតិបើកការលេងសម្រុកយ៉ាងខ្លាំង ខណៈក្រុមភ្នំពេញក្រោនលេងក្នុងលក្ខណៈការពារច្រើនជាង ។ ការលេងសម្រុករបស់ក្រុមក្រសួងការពារជាតិ ពិតជាទទួលបានផលមែន ព្រោះនៅនាទីទី៥២ កីឡាករអ៊ុព កាមុ៉ល ពាក់អាវលេខ១៨ របស់ក្រុមនេះមានឱកាសទាត់បាល់បញ្ចូលទីក្រុមភ្នំពេញក្រោនបាន១គ្រាប់សងវិញ ធ្វើឱ្យអ្នកគាំទ្ររបស់គេស្រែកហ៊ោអបអរយ៉ាងកងរំពង ។ ទោះបីយ៉ាងណា លទ្ធផល១ស្មើនេះបានរក្សារហូតដល់ចប់ការប្រកួត៩០នាទីតែម្តង ដោយគ្មានក្រុមណាមានឱកាសទាត់បាល់បញ្ចូលទីគូប្រកួតរបស់ខ្លួនទៀតឡើយ ។
ក្រុមក្រសួងការពារជាតិលេងបាន២ប្រកួត ចាញ់១ ស្មើ១ មាន១ពិន្ទុ ចំណែកក្រុមភ្នំពេញក្រោនលេងបាន២ប្រកួតដូចគ្នា ឈ្នះ១ ស្មើ១ មាន៤ពិន្ទុ ។ សម្រាប់គូទី២នៅតង់ទី១ ទោះបីក្រុមទាំង២ (បៀលប្រាយយូណាធីត និងអគ្គស្នងការដ្ឋាននគរបាលជាតិ) លេងសម្រុកដាក់គ្នាយ៉ាងណាក៏ដោយ ក៏គ្មានក្រុមណាអាចបំបែកលទ្ធផលពងមាន់បានដែរ ដោយសារក្រុមទាំង២លេងមានការប្រយ័ត្នប្រយែងខ្លាំងណាស់ ។ លុះចូលដល់តង់ទី២ នៅនាទីទី៦៤ កីឡាករចាន់ ឆាយ៉ា ពាក់អាវលេខ៧ របស់ក្រុមបៀលប្រាយយូណាយធីតរកបាន១គ្រាប់ឱ្យក្រុមរបស់ខ្លួន ធ្វើឱ្យស្ថានការណ៍ប្រកួតកាន់តែតឹងតែងជាងមុន ។ បន្ទាប់ពីគូប្រកួតរកបានគ្រាប់បាល់នាំមុខក្រុមរបស់ខ្លួន ធ្វើឱ្យក្រុមអគ្គស្នងការដ្ឋាននគរបាលជាតិបើកការលេងសម្រុកខ្លាំងៗតែម្តងរហូតរកបាន១គ្រាប់តាមស្មើវិញនៅនាទីទី៧៧ ដោយកីឡាករទិត្យ ឌីណា ពាក់អាវលេខ១១ ។ លទ្ធផល១ស្មើនេះបានរក្សារហូតដល់ចប់ការប្រកួត៩០នាទីដោយគ្មានក្រុមណាមានឱកាសរកបានគ្រាប់បាល់បន្ថែមទៀតទេ ។
គិតត្រឹមថ្ងៃនេះ ក្រុមអគ្គស្នងការដ្ឋាននគរបាលជាតិលេងបាន២ប្រកួត ឈ្នះ១ ស្មើ១ មាន៤ពិន្ទុ ចំណែកក្រុមបៀលប្រាយយូណាយធីតលេងបាន២ប្រកួតដូចគ្នា ស្មើទាំង២ប្រកួតមាន២ពិន្ទុ ៕
ចែករំលែកព័តមាននេះ