រាជធានីភ្នំពេញ ៖ ថ្លែងទៅកាន់អ្នកសារព័ត៌មានក្រោយពេលត្រឡប់មកពីបំពេញបេសកកម្មការពាររបាយការណ៍សិទ្ធិមនុស្ស (UPR) នៅទីក្រុងហ្សឺណែវកាលពីថ្ងៃទី១ កុម្ភៈ នៅអាកាសយានដ្ឋានអន្តរជាតិភ្នំពេញ លោកម៉ក់ សម្បត្តិ អនុប្រធានគណៈកម្មាធិការសិទ្ធិមនុស្សកម្ពុជាបានថ្លែងថា បណ្តាប្រទេសលើពិភពលោកប្រមាណ១៩៣ប្រទេសបានសម្តែងនូវការអបអរសាទរ
រាជធានីភ្នំពេញ ៖ ថ្លែងទៅកាន់អ្នកសារព័ត៌មានក្រោយពេលត្រឡប់មកពីបំពេញបេសកកម្មការពាររបាយការណ៍សិទ្ធិមនុស្ស (UPR) នៅទីក្រុងហ្សឺណែវកាលពីថ្ងៃទី១ កុម្ភៈ នៅអាកាសយានដ្ឋានអន្តរជាតិភ្នំពេញ លោកម៉ក់ សម្បត្តិ អនុប្រធានគណៈកម្មាធិការសិទ្ធិមនុស្សកម្ពុជាបានថ្លែងថា បណ្តាប្រទេសលើពិភពលោកប្រមាណ១៩៣ប្រទេសបានសម្តែងនូវការអបអរសាទរ និងកោតសរសើរយ៉ាងខ្លាំងចំពោះការអនុវត្តសិទ្ធិមនុស្សនៅកម្ពុជា បន្ទាប់ពីពួកគេបានពិនិត្យយ៉ាងហ្មត់ចត់នូវរបាយការណ៍ស្តីពីសិទ្ធិមនុស្សនៅកម្ពុជា ។
គូសបញ្ជាក់ថា គណៈប្រតិភូកម្ពុជាដឹកនាំដោយលោកម៉ក់ សម្បត្តិ អនុប្រធានគណៈកម្មាធិការសិទ្ធិមនុស្សកម្ពុជា បានចេញទៅទីក្រុងហ្សឺណែវចាប់ពីថ្ងៃទី២៨ ដល់៣១ មករា ដើម្បីការពាររបាយការណ៍ជាតិស្តីពីសិទ្ធិមនុស្សនៅកម្ពុជាUPR ។ លោកម៉ក់ សម្បត្តិ មានប្រសាសន៍ថា កម្ពុជាទទួលបានជោគជ័យយ៉ាងខ្លាំងទាក់ទងរបាយការណ៍ជាតិស្តីពីសិទ្ធិមនុស្ស UPR ដែលបានដាក់ទៅអង្គការសហប្រជាជាតិ ព្រោះប្រទេសចំនួន១៩៣ទូទាំងពិភពលោកបានបង្ហាញនូវការគាំទ្រនិងកោតសរសើរ ។
លោកអះអាងថា អ្វីដែលធ្វើឱ្យបណ្តាប្រទេសលើពិភពលោកអបអរនិងកោតសរសើរនោះ ព្រោះថារបាយការណ៍ស្តីពីសិទ្ឋិមនុស្សរបស់កម្ពុជា បានបង្ហាញនូវកំណែទម្រង់ប្រព័ន្ធយុត្តិធម៌ ។ ទន្ទឹមនេះរបាយការណ៍យើងក៏បានរំលេចឱ្យឃើញនូវការពិភាក្សាយ៉ាងល្អិតល្អន់រវាងស្ថាប័នរាជរដ្ឋាភិបាល អាជ្ញាធរមូលដ្ឋានរួមទាំងអង្គការសង្គមស៊ីវិលពាក់ព័ន្ធ ។
តាមប្រសាសន៍របស់លោកម៉ក់ សម្បត្តិ របាយការណ៍លើកនេះគឺបញ្ចប់បាននូវការមន្ទិល ឬភ័ន្តច្រឡំទាំងឡាយកន្លងមក ដែលធ្វើឱ្យរាជរដ្ឋាភិបាលមានកង្វល់លើបញ្ហាសិទ្ធិមនុស្ស ។ លោកថ្លែងថា ឆ្លងកាត់របាយការណ៍ទាក់ទងសិទ្ធិមនុស្សលើកនេះបានធ្វើឱ្យអន្តរជាតិបានយល់កាន់តែច្បាស់អំពីការងារទាំងឡាយ ដែលរាជរដ្ឋាភិបាលបាននិងកំពុងយកចិត្តទុកដាក់ខ្ពស់ លើបញ្ហាកំណែទម្រង់សំខាន់ កំណែទម្រង់លើបញ្ហាសិទ្ធិមនុស្ស ប្រព័ន្ធការបោះឆ្នោតនិងប្រព័ន្ធយុត្តិធម៌ ។ ទាក់ទងការបង្កើតស្ថាប័នសិទ្ធិមនុស្សជាតិលោកម៉ក់ សម្បត្តិ បានលើកឡើងថាមានប្រទេសជាច្រើនបានផ្តល់អនុសាសន៍ឱ្យយើងរៀបចំពង្រាងច្បាប់មួយស្របតាមកិច្ចព្រមព្រៀងទីក្រុងបា៉រីសស្តីពីសិទ្ធិមនុស្ស រួមទាំងពិភាក្សាជាមួយអង្គការសង្គមស៊ីវិលឱ្យបានទូលំទូលាយជាងមុន សំខាន់ការរៀបចំសិក្ខាសាលាមួយ ដើម្បីផ្លាស់ប្តូរយោបល់និងការផ្តល់បទពិសោធន៍ឱ្យគ្នាទៅវិញទៅមក សំដៅឱ្យច្បាប់នេះកាន់តែមានប្រសិទ្ធិភាពខ្ពស់ក្នុងការអនុវត្ត ។
យ៉ាងណាក៏ដោយលោកម៉ក់ សម្បត្តិ បញ្ជាក់ថា នៅលើវេទិកាខាងលើនេះគឺមានបណ្តាប្រទេសចំនួន៧៦បានលើកសំណួរសម្រាប់ឱ្យភាគីយើងស្រាយបំភ្លឺ ប៉ុន្តែសំណួរទាំងនោះភាគច្រើនទាក់ទងកំណែទម្រង់ស៊ីជម្រៅនៃប្រព័ន្ធការបោះឆ្នោត ប្រព័ន្ធយុត្តិធម៌និងការបង្កើតស្ថាប័នសិទ្ឋិមនុស្សជាតិ ហើយសំណួរទាំងនោះត្រូវបានភាគីកម្ពុជាយើងឆ្លើយបំភ្លឺយ៉ាងល្អិតល្អន់ និងធ្វើឱ្យម្ចាស់សំណួរមានការអបអរសាទរពេញចិត្តយ៉ាងខ្លាំង ៕
ចែករំលែកព័តមាននេះ