រាជធានីភ្នំពេញ ៖ គណបក្សសង្គ្រោះជាតិនៅថ្ងៃទី១ កុម្ភៈ បានចេញលិខិតមួយបដិសេធពាក្យចចាមអារ៉ាមមួយចំនួនដែលផ្សព្វផ្សាយថា លោក សម រង្ស៊ី បានដាក់ពាក្យបណ្តឹងទៅកាន់តុលាការព្រហ្មទណ្ឌអន្តរជាតិ(ICC) កាលពីថ្ងៃទី៣១ មករា កន្លងមក ។
រាជធានីភ្នំពេញ ៖ គណបក្សសង្គ្រោះជាតិនៅថ្ងៃទី១ កុម្ភៈ បានចេញលិខិតមួយបដិសេធពាក្យចចាមអារ៉ាមមួយចំនួនដែលផ្សព្វផ្សាយថា លោក សម រង្ស៊ី បានដាក់ពាក្យបណ្តឹងទៅកាន់តុលាការព្រហ្មទណ្ឌអន្តរជាតិ(ICC) កាលពីថ្ងៃទី៣១ មករា កន្លងមក ។ គណបក្សនេះបានអះអាងថា លោក សម រង្ស៊ី ប្រធានគណបក្សសង្គ្រោះជាតិមិនទាន់បានដាក់ពាក្យបណ្តឹងទៅកាន់តុលាការនេះនៅឡើយទេ ។
នៅក្នុងលិខិតបដិសេធរបស់ខ្លួនចុះថ្ងៃទី១ កុម្ភៈ គណបក្សសង្គ្រោះជាតិបានចាត់ទុកព័ត៌មានមួយចំនួនដែលផ្សព្វផ្សាយនៅលើទំព័រហ្វេសបុ៊ក កាលពីថ្ងៃទី៣១ មករា អំពីករណីលោក សម រង្ស៊ី ប្តឹងសម្តេចតេជោនាយករដ្ឋមន្ត្រីហ៊ុន សែន ទៅតុលាការព្រហ្មទណ្ឌអន្តរជាតិ(ICC) នោះថាមិនមែនជាការពិតសោះឡើយ ។ លិខិតបានបញ្ជាក់ថា លោក សម រង្ស៊ី ក៏ដូចជាគណបក្សសង្គ្រោះជាតិដែរ មកទល់ពេលនេះ នៅមិនទាន់ដាក់ពាក្យបណ្តឹងទៅតុលាការICC នៅឡើយទេ ហើយករណីនេះក្រុមមេធាវីរបស់គណបក្សសង្គ្រោះជាតិកំពុងធ្វើការស្រាវជ្រាវរកភស្តុតាងបន្ថែមទៀត ។ គួរបញ្ជាក់ថា ការចេញលិខិតបដិសេធរបស់គណបក្សសង្គ្រោះជាតិ ដោយសារតែកាលពីថ្ងៃទី៣១ មករា កន្លងមកនៅតាមបណ្តាញផ្សព្វផ្សាយព័ត៌មាន និងបណ្តាញសង្គមហ្វេសបុ៊កមួយចំនួនបានផ្សព្វផ្សាយថា លោក សម រង្ស៊ី ប្រធានគណបក្សសង្គ្រោះជាតិបានដាក់ពាក្យបណ្តឹងពីឧក្រិដ្ឋកម្មមនុស្សជាតិប្រឆាំងសម្តេចតេជោ ហ៊ុន សែន នាយករដ្ឋមន្រ្តីបច្ចុប្បន្នទៅកាន់តុលាការព្រហ្មទណ្ឌអន្តរជាតិ(ICC) ។
អ្នកវិភាគបាននិយាយថា បណ្ដាញសង្គមហ្វេសប៊ុកជាបណ្ដាញចែករំលែកព័ត៌មានមួយលឿនរហ័សដូចផ្លេកបន្ទោរ តែគួរឱ្យសោកស្ដាយដែលប្រភពព័ត៌មានទាំងឡាយនោះមួយចំនួនត្រូវបានគេតាក់តែងបំភ្លៃដោយសារតែការផ្សាយទាំនោះមិនមានការទទួលខុសត្រូវច្បាស់លាស់ ។
គេតែងកត់សម្គាល់ថា កន្លងមកមានអ្នកឆ្កួតនឹងនយោបាយផ្កាប់មុខមួយចំនួន បានបន្លំផ្សព្វផ្សាយព័ត៌មានដើម្បីទម្លាក់កំហុសដាក់គ្នាទៅវិញទៅមក ។ ព័ត៌មានដែលមានការទទួលខុសត្រូវ នៅតែស្ថិតក្នុងគេហទំព័រមានអាសយដ្ឋានច្បាស់លាស់និងសារព័ត៌មានដដែល ទោះបីមិនទាន់ហេតុការណ៍ភ្លាមៗក្ដី៕
ចែករំលែកព័តមាននេះ