ខេត្តព្រះវិហារ ៖ សពបុរសម្នាក់ ត្រូវបានគេប្រទះឃើញនៅក្នុងព្រៃចំណុចទួលត្រពាំងកូនង៉ា ក្នុងភូមិគុណភាព ឃុំឆែបពីរ ស្រុកឆែប ។ តាមមន្ត្រីនគរបាលស្រុកឆែបឱ្យដឹងថា សពដែលប្រទះឃើញនោះមានសភាពស្អុយរលួយទៅហើយ តែត្រូវបានគេស្គាល់អត្តសញ្ញាណគឺឈ្មោះបុយ គី អាយុុ៣២ឆ្នាំ រស់នៅភូមិថ្នល់បំបែក ស្រុកកំពង់ស្វាយ ខេត្តកំពង់ធំ ត្រូវបានប្រជាពលរដ្ឋជាអ្នកដើរព្រៃប្រទះឃើញនៅក្នុងព្រៃកាលពីថ្ងៃទី៣១ មករា ។
សមត្ថកិច្ចបានធ្វើកោសល្យវិច័យសព និងបង្ហាញថា បុរសនេះបានស្លាប់ប្រមាណ១សប្តាហ៍មកហើយ ដោយសារតែសពមានសភាពរលួយស្អុយ ។ បន្ទាប់ពីប្រទះឃើញសព សមត្ថកិច្ចក៏បានស្វែងរកក្រុមគ្រួសារតាមរយៈអាសយដ្ឋាននៅជាប់នឹងខ្លួនសព ហើយក្រុមគ្រួសារក៏ទៅទទួលយកសពទៅធ្វើបុណ្យតាមប្រពៃណី ។ តាមក្រុមគ្រួសារសពនិយាយថា បុរសឈ្មោះបុយ គី មានមុខរបរជាអ្នករត់តាក់ស៊ី កំពង់ធំ -សៀមរាប ។ កាលពីថ្ងៃទី២៤ មករា កន្លងទៅ ជនរងគ្រោះបានចេញពីផ្ទះដោយបើករថយន្តម៉ាកកាមរីបានឡែន ពណ៌ស្ករ ពាក់ស្លាកលេខភ្នំពេញ២Q-៣០៥៥ និងប្រាប់ក្រុមគ្រួសារថា មានគេជួលរថយន្តទៅខេត្តសៀមរាប ។ លុះនៅថ្ងៃទី៣១ មករា កន្លងទៅនេះ ក៏បានដំណឹងពីនគរបាលថា ត្រូវគេសម្លាប់និងឃើញសពនៅក្នុងព្រៃ ត្រង់ចំណុចខាងលើ ។ បន្ទាប់មក ក្រុមគ្រួសារក៏ធ្វើដំណើរទៅដល់កន្លែងកើតហេតុ ឃើញសព និងបញ្ជាក់ថា ពិតជាសាច់ញាតិដែលបានស្លាប់ប្រាកដមែនតែដោយសារស្លាប់យូរថ្ងៃរលួយស្អុយទៅហើយ ក៏សម្រេចបូជាសពនៅនឹងកន្លែងកើតហេតុ យកតែធាតុទៅធ្វើបុណ្យតាមប្រពៃណីនៅឯស្រុកកំណើត ។
ជុំវិញករណីស្លាប់បុរសអ្នករត់តាក់ស៊ីខាងលើនេះ សមត្ថកិច្ចនគរបាលស្រុកឆែបបញ្ជាក់ថា នេះជាករណីប្លន់សម្លាប់យករថយន្ត ហើយយកសពទៅប្លុងចោល ដែលពេលនេះសមត្ថកិច្ចកំពុងធ្វើការស្រាវជ្រាវរកមុខសញ្ញាជនឧក្រិដ្ឋមកផ្តន្ទាទោសចំពោះមុខច្បាប់ ៕
ចែករំលែកព័តមាននេះ