រាជធានីភ្នំពេញ ៖ យុវជនស្ទាវហិតកាវមួយក្រុមបានធ្វើសកម្មភាពវាយសម្លា.ប់គ្នានឹងដំបងឈើជ្រុងបណ្តាលឱ្យស្លា.ប់បាត់បង់ជីវិតម្នាក់ បន្ទាប់មកឃាតករបានប្រមូលសំរាម និងកម្ទេចកម្ទីក្បែរកន្លែងកើតហេតុដាក់គរនៅលើសពរួចដុតចោលនៅនឹងកន្លែង ។
រាជធានីភ្នំពេញ ៖ យុវជនស្ទាវហិតកាវមួយក្រុមបានធ្វើសកម្មភាពវាយសម្លាប់គ្នានឹងដំបងឈើជ្រុងបណ្តាលឱ្យស្លាប់បាត់បង់ជីវិតម្នាក់ បន្ទាប់មកឃាតករបានប្រមូលសំរាម និងកម្ទេចកម្ទីក្បែរកន្លែងកើតហេតុដាក់គរនៅលើសពរួចដុតចោលនៅនឹងកន្លែង ។ បុ៉ន្តែសពមិនត្រូវបានភ្លើងឆេះអស់ទាំងស្រុងនោះឡើយ គឺគ្រាន់តែឆេះខ្លោចបុ៉ណ្ណោះ ហើយត្រូវបានប្រជាពលរដ្ឋប្រទះឃើញ ក៏បានរាយការណ៍ប្រាប់ប៉ូលិសឱ្យចុះទៅពិនិត្យមើល និងស្រាវជ្រាវតាមជំនាញ ទើបឈានដល់ការចាប់ខ្លួនជនជាឃាតករបាន២នាក់ភ្លាមៗដែរ ។
សពខាងលើត្រូវបានគេប្រទះឃើញកាលពីវេលាម៉ោង១២និង៣០នាទីថ្ងៃត្រង់ថ្ងៃទី១ កុម្ភៈ នៅក្នុងដីឡូត៍មួយកន្លែងស្ថិតនៅតាមបណ្តោយផ្លូវចោមចៅ ហៅផ្លូវវ៉េងស្រេង ក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ ។ យុវជនរងគ្រោះត្រូវបានគេស្គាល់ឈ្មោះង៉ោល អាយុ១៨ឆ្នាំ មិនមានមុខរបរ និងទីលំនៅពិតប្រាកដនោះទេ ស្នាក់នៅក្នុងដីឡូត៍កើតហេតុខាងលើ ចំណែកឯជនជាឃាតករមានគ្នា២នាក់ម្នាក់ឈ្មោះ ប៊ុន វ៉ែន អាយុ១៩ឆ្នាំ និងម្នាក់ទៀតឈ្មោះ ចាន់ ចំរើន អាយុ១៥ឆ្នាំ ពួកគេជាជនស្ទាវដូចគ្នា និងស្នាក់នៅជាមួយគ្នាដែរ ហើយបានប្រើដំបងឈើជ្រុងវាយសម្លាប់គ្នាយ៉ាងសាហាវព្រៃផ្សៃបំផុត ។ តាមប្រភពព័ត៌មានពីមន្ត្រីប៉ូលិសបានឱ្យដឹងថា មុនពេលហេតុការណ៍ភ្ញាក់ផ្អើល មានប្រជាពលរដ្ឋធ្វើដំណើរឆ្លងកាត់ទីនោះប្រទះឃើញសពជនរងគ្រោះត្រូវគេដុតឆេះខ្លោច និងមានដង្កូវចោះ ហើយមានសភាពស្អុយរលួយ ។ ពេលនោះក៏បានរាយការណ៍ប្រាប់ដល់ប៉ូលិសមូលដ្ឋានឱ្យចុះពិនិត្យមើលជាក់ស្តែង បន្ទាប់មកប៉ូលិសបុ៉ស្តិ៍ចោមចៅបានចុះទៅមើលភ្លាមៗ ហើយបានឃើញដូចប្រជាពលរដ្ឋរាយការណ៍មែន ទើបសុំឱ្យកម្លាំងប៉ូលិសជំនាញព្រហ្មទណ្ឌខណ្ឌពោធិ៍សែនជ័យចុះទៅជួយស្រាវជ្រាវ និងបានផ្តល់ព័ត៌មានដល់ប៉ូលិសបច្ចេកទេសនៃស្នងការនគរបាលរាជធានីភ្នំពេញ ព្រមទាំងមន្ត្រីពេទ្យ និងតុលាការ ចុះទៅពិនិត្យកោសល្យវិច័យយ៉ាងត្រឹមត្រូវ ។
ជាលទ្ធផលឱ្យដឹងថា ជនរងគ្រោះត្រូវបានគេវាយសម្លាប់ ទើបមានការស្រាវជ្រាវដឹងមុខសញ្ញាជនជាឃាតករទាំង២នាក់ខាងលើដល់សង្កាត់ស្រះចក ខណ្ឌដូនពេញ និងដកហូតបានដំបងឈើជ្រុងមួយកំណាត់ពីជននោះផងដែរ ។ ក្រោយពេលចាប់ខ្លួនជនជាឃាតករម្នាក់ឈ្មោះ ប៊ុន វ៉ែន បានសារភាពប្រាប់បូ៉លិសថា ខ្លួន និងបក្សពួកពិតជាបានធ្វើសកម្មភាពវាយសម្លាប់ជនរងគ្រោះពិតមែន ដោយសារតែខឹងនឹងជនរងគ្រោះជំពាក់លុយចំនួន៥ម៉ឺនរៀល និងស្បែកជើងមួយគូរយៈពេលមួយអាទិត្យហើយមិនព្រមសង ពេលគេទៅទារក៏មិនបានទៀត ទើបរូបគេមានការក្តៅក្រហាយ ក៏សម្លាប់ចោលតែម្តង ។ ជនដៃដល់បានរៀបរាប់ពីសកម្មភាពរបស់ខ្លួនថា កាលពីវេលាម៉ោង៨និង៤០នាទីយប់ថ្ងៃទី២៨ មករា រូបគេនិងបក្សពួកឈ្មោះ ចាន់ ចំរើន បានបបួលជនរងគ្រោះចេញពីម្តុំរោងភាពយន្តក្នុងផ្សារកាណាស៊ីធីទៅកាន់កន្លែងស្នាក់នៅក្នុងរបងដីឡូត៍ចំណុចកើតហេតុនោះ ហើយពេលទៅដល់រូបគេនិងបក្សពួកអត់មានកាវហិតនោះទេ ។ ចំណែកឯជនរងគ្រោះមានកាវកាន់ក្នុងដៃហិតពេលនោះខ្លួនច្រណែន និងបានសុំកាវហិតដែរ ព្រមទាំងកញ្ឆក់យកកាវពីដៃជនរងគ្រោះ បុ៉ន្តែពេលយកមិនទាន់បានហិតផង ត្រូវជនរងគ្រោះកញ្ឆក់យកទៅវិញ ។ ម្យ៉ាងទៀតរឿងជំពាក់លុយ និងស្បែកជើងអត់ព្រមសងទៀតនោះ ទើបពួកគេមានការខឹងសម្បា ក៏យកដំបងឈើជ្រុងមួយកំណាត់វាយសំពងទៅលើជនរងគ្រោះដែលកំពុងអង្គុយហិតកាវដោយមិនដឹងខ្លួន បណ្តាលឱ្យជនរងគ្រោះស្លាប់បាត់បង់ជីវិតភ្លាមៗតែម្តង។
ជនជាឃាតករបានបន្តថា បន្ទាប់ពីបានវាយសម្លាប់ជនរងគ្រោះហើយ ពួកគេបាននាំគ្នាយកសំរាមទៅដាក់គរពីលើសពជនរងគ្រោះរួចរាល់ហើយទើបដុតកម្ទេចចោលក្នុងបំណងបំបិទភស្តុតាង រួចហើយទើបនាំគ្នាគេចខ្លួន បុ៉ន្តែមិននឹកស្មានថា ត្រូវបែកការណ៍ដោយសារតែដុតសពឆេះមិនអស់បែបនេះឡើយ ។ ពេលនេះប៉ូលិសបាននាំជននោះទៅសាកសួរ និងឃុំខ្លួនបណ្តោះអាសន្ននៅផ្នែកព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យ ដើម្បីកសាងសំណុំរឿងបញ្ជូនទៅតុលាការ ៕
ចែករំលែកព័តមាននេះ