រាជធានីភ្នំពេញ ៖ កាលពីថ្ងៃសោរ៍ទី១ កុម្ភៈ កីឡាករជើងខ្លាំង ឡៅ ផានាថ មកពីក្លិបរស្មីកុមារកំព្រា មិនត្រឹមតែមិនអាចសងសឹកបានប៉ុណ្ណោះទេ គឺថែមទាំងត្រូវសន្លប់យ៉ាងអាម៉ាស់ទៀតផង ខណៈដែលកីឡាករឯម សាវឿន មកពីក្លិបឫទ្ធិពោធិ៍សែនជ័យ នៅរក្សាក្រេឌីតដដែល ដោយបានវាយឲ្យដៃគូរបស់គេសន្លប់ហួសការគ្រោងទុក កាលពីថ្ងៃសុក្រទី៣១ មករា នៅរេញដដែល ។ លទ្ធ
រាជធានីភ្នំពេញ ៖ កាលពីថ្ងៃសោរ៍ទី១ កុម្ភៈ កីឡាករជើងខ្លាំង ឡៅ ផានាថ មកពីក្លិបរស្មីកុមារកំព្រា មិនត្រឹមតែមិនអាចសងសឹកបានប៉ុណ្ណោះទេ គឺថែមទាំងត្រូវសន្លប់យ៉ាងអាម៉ាស់ទៀតផង ខណៈដែលកីឡាករឯម សាវឿន មកពីក្លិបឫទ្ធិពោធិ៍សែនជ័យ នៅរក្សាក្រេឌីតដដែល ដោយបានវាយឲ្យដៃគូរបស់គេសន្លប់ហួសការគ្រោងទុក កាលពីថ្ងៃសុក្រទី៣១ មករា នៅរេញដដែល ។ លទ្ធផលនេះ ត្រូវគេមើលឃើញថាបញ្ច្រាសទិសគ្នា បើទោះជាមុនប្រកួតពួកគេទាំងពីរហាក់មានជំនឿចិត្តឈ្នះដូចគ្នាក្តី ។
ជំនួបលើកទី៣នៅសង្វៀនស្ទឹងមានជ័យ កីឡាករឡៅ ផានាថ ទទួលរងការអាម៉ាស់យ៉ាងខ្លាំងក្រោមដៃរបស់កីឡាករ ផាន់ សុវណ្ណ មកពីក្លិបមិត្តប៉ូលិស ។ កីឡាករឡៅ ផានាថ នៅតែមានកណ្ដាប់ដៃល្អ និងបច្ចេកទេសខ្ពស់ ប៉ុន្តែគួរឱ្យស្ដាយការប្រឹងប្រែងរបស់គេ មិនអាចសម្រេចគោលដៅបានឡើយ ដោយសារតែក្នុងទឹកទី២បានក្លាយជារឿងភ្លាត់ស្នៀត ហើយនាំឲ្យគេសន្លប់តែម្ដងរហូតឈានដល់ដំណាក់កាលត្រូវគេរាប់ដល់១០ដោយគ្មានការតវ៉ា ។ ប្រសិនជា ឡៅ ផានាថ ផ្ដើមការវាយលុកដោយប្រុងប្រយ័ត្នហើយមិនឆេវឆាវ ប្រហែលជាគេមិនជួបវាសនាបែបហ្នឹងឡើយក្នុងការប្រកួតសងសឹកនេះ ។ ការប្រកួតលើកនេះ ឡៅ ផានាថ ហាក់មានយីអ៊ុនទាបជាងមុន ព្រោះតែត្រូវសន្លប់ដោយស្មានមិនដល់ ដោយសូម្បីតែមុនឡើងរេញ គេបានដាក់ជំហរយ៉ាងច្បាស់ គឺមិនអាចចាញ់កីឡាករបង្គោលខៀវ ផាន់ សុវណ្ណ បានទេ ទោះជាស្ថិតក្នុងស្ថានការណ៍បែបណាក្តី ។ ការបរាជ័យនេះ បានធ្វើឲ្យអ្នកទស្សនាភាគច្រើនខកចិត្ត ប៉ុន្តែក៏បានធ្វើឲ្យអ្នកចាក់ខ្សែដែលចង់ឲ្យកីឡាករផាន់ សុវណ្ណ នៅតែឈ្នះដូចមុនអស់ចិត្តដូចគ្នា ព្រោះតែពួកគេចង់ឃើញកីឡាកររូបនេះ នៅតែមានក្រេឌីតខ្ពស់ និងបន្តឈ្នះកីឡាករ ឡៅ ផានាថ មិនខុសពីពេលមុន ។ ទោះបីយ៉ាងណា មុនឈានដល់សន្លប់បង្គោលក្រហម ឡៅ ផានាថ ក៏បានធ្វើឲ្យកីឡាករបង្គោលខៀវ ផាន់ សុវណ្ណ ប៊ិះនឹងបាក់ជំហរម្ដងៗផងដែរ ដោយក្រុមអ្នកទស្សនាសុទ្ធតែមើលឃើញថា បើទឹកទី២មិនមានករណីភ្លាត់ស្នៀតនោះឡៅ ផានាថ នឹងមានសំណាងក៏អាចថាបាន ។ គាប់ជួនជានៅអំឡុងទឹកទី១ កីឡាករទាំងពីរ ធ្វើឲ្យអ្នកទស្សនាស្រែកហ៊ោកញ្ជ្រៀវយ៉ាងកងរំពង ព្រោះតែម្នាក់ៗមានសន្ទុះក្នុងការវាយលុកបានល្អប្រហាក់ប្រហែលគ្នា ដែលមិនអាចដឹងថា អ្នកណាមានប្រៀបជាងអ្នកណា ទើបរឹតតែធ្វើឲ្យមានការជឿជាក់ថា ឡៅ ផានាថ អាចសងសឹកបានហាក់មិនមានការផ្លាស់ប្តូរជំហរនៅអំឡុងចប់ទឹកទី១ ។ ការកំណត់ឲ្យបង្គោលក្រហមឡៅ ផានាថ ចាញ់នៅទឹកទី២ ព្រោះតែងើបលែងរួច គ្មាននរណាមិនភ្លាត់មាត់ភ្ញាក់ផ្អើល និងដកកចំហមាត់មើល ទេ ព្រោះតែនោះជារឿងចៃដន្យនិងលឿនពេក ។
នៅសង្វៀនដដែល កីឡាករ ផាន់ គ្រាន់ មកពីក្លិបព្រះខ័នរាជ បានក្លាយជាអ្នកចាញ់ម្ដងទៀត ក្រោមដៃកីឡាករសុខ សុវណ្ណ មកពីក្លិបកងពលតូចលេខ៣១ ។ នេះជាប្រវត្តិបរាជ័យលើកទី២ បន្ទាប់ពីពួកគេប៉ះគ្នាចំនួន៣ដង ដោយលើកដំបូង ផាន់ គ្រាន់បានឈ្នះតែម្ដងក្នុងភាពប្រផិតប្រផើយ ។ ការបរាជ័យរបស់ផាន់ គ្រាន់ បានធ្វើឲ្យអ្នកទស្សនាច្រើនជាងពាក់កណ្ដាលខកបំណង ។ ក្នុងនោះកីឡាករម៉ន ចាន់ដារ៉ា មកពីក្លិបព្រែកឯងកីឡា បានវាយឈ្នះកីឡាករ ឆាយ ម៉េត មកពីក្លិបសំរោងកោងខេត្តបាត់ដំបង ដោយពិន្ទុ និង កីឡាករ ឯម ចំណាប់ មកពីក្លិបឫទ្ធិពោធិ៍សែនជ័យ វាយឈ្នះកីឡាករ វុត្ថា រាជនី មកពីក្លិបអង្គរធំគុនខ្មែរដោយពិន្ទុ ។
ចំពោះការប្រកួតកាលពីថ្ងៃសុក្រទី៣១ មករា នៅសង្វៀនស្ទឹងមានជ័យដដែលឯណោះវិញកីឡាករ ឯម សាវឿន បានក្លាយជាអ្នកស្រវាបាននូវមោទនភាពគួរឱ្យស្ងើចសរសើរ បន្ទាប់ពីផ្ដួលកីឡាករជ័យ វណ្ណៈ មកពីក្លិបឃ្លាំងមឿងកីឡាខេត្តពោធិ៍សាត់ ឲ្យសន្លប់ក្នុងទឹកទី៤តាមការចង់បាន ។ មុនការប្រកួតមានការយល់ឃើញជាច្រើនថា ឯម សាវឿន នឹងឈ្នះជាថ្មីម្ដងទៀត បន្ទាប់ពីធ្លាប់ផ្ដួលកីឡាករ ជ័យ វណ្ណៈ រួចមកហើយកាលពីលើកមុន ។ ប៉ុន្តែការព្យាករណ៍បានត្រឹមតែសន្និដ្ឋានថា គេនឹងឈ្នះកីឡាករបង្គោលក្រហមជ័យ វណ្ណៈ ដោយពិន្ទុ ឬបែបប្រផិតប្រផើយប៉ុណ្ណោះ ។ អីុចឹងហើយ ទើបសូម្បីតែអ្នកទស្សនានៅតាមកញ្ចក់ទូរទស្សន៍ក៏លាន់មាត់នៅពេលដែលឃើញកីឡាករបង្គោលខៀវ ឯម សាវឿន ស្រាប់តែអាចបំបាក់ដៃគូដែលប៉ងសងសឹកឲ្យដួលភីងងើបលែងរួចក្នុងទឹកទី៤ ហួសពីការទាយទុក ។ លទ្ធផលនេះបានធ្វើឲ្យឯម សាវឿន ទទួលបានក្រេឌីតឈានឡើងមួយកម្រិត ហើយជាលទ្ធផលដែលធ្វើឲ្យគ្រប់គ្នាឃើញថា បញ្ច្រាសទិសគ្នាជាមួយនឹងលទ្ធផលរបស់កីឡាករឡៅ ផានាថ ផងដែរ ។ រវាងឯម សាវឿន និងឡៅ ផានាថ សុទ្ធតែជាបុគ្គលដែលមានមនុស្សច្រើនជាងពាក់កណ្ដាល ក្នុងរង្វង់អ្នកគាំទ្ររំពឹងថាឈ្នះដូចគ្នា ។ ប៉ុន្តែគួរឲ្យស្ដាយរវាងពួកគេបែរជាឡៅ ផានាថ ដែលពោរពេញដោយជំហរសងសឹកឲ្យខាងតែបានត្រូវសន្លប់ក្នុងទឹកទី២រីឯ ឯម សាវឿន ដែលពោរពេញដោយការចង់ទប់កុំឲ្យជ័យ វណ្ណៈ សងសឹកបាន បែរជាអាចផ្ដួលជ័យ វណ្ណៈ ឲ្យសន្លប់ក្នុងទឹកទី៤ ។ នេះមានន័យថា ក្នុងចំណោមអ្នកទាំងពីរ ដែលមានអ្នកគាំទ្រជឿជាក់ខ្លាំង គឺមានតែម្នាក់ប៉ុណ្ណោះជោគជ័យ ខណៈដែលម្នាក់ទៀតបានក្លាយជាបុគ្គលខាតដើមខាតចុងដោយនឹកស្មានមិនដល់ ។ នៅសង្វៀននេះ កីឡាករ សូយ យក្សតឿ មកពីក្លិបពោធិ៍ជ័យកីឡា ផ្តួលកីឡាករផង់ សុភាព ឲ្យសន្លប់ក្នុងទឹកទី៤តាមលំនាំតែមួយ ។ ក្នុងនោះ កីឡាករថន វាសនា មកពីក្លិបនាគមានជ័យ ផ្តួល កីឡាករ អាន សុផល មកពីក្លិបអង្គរធំគុនខ្មែរ ឲ្យសន្លប់ក្នុងទឹកទី២ និងកីឡាករ ផង់ សុភ័ស្ស មកពីក្លិបតាឡីដំរីមានឫទ្ធិ ផ្ដួលកីឡាករយុគ យក្សខួច មកពីក្លិបអប់រំកាយកីឡាឲ្យសន្លប់ក្នុងទឹកទី១ ៕
ចែករំលែកព័តមាននេះ