រាជធានីភ្នំពេញ ៖ កាលពីថ្ងៃទី២៤ មករា កន្លងមកនេះ លោកគូម៉ាម៉ារូ យូជិ ឯកអគ្គរាជទូតវិសាមញ្ញនិងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា បានផ្ញើសារជាចំហមួយឆ្ពោះទៅការរៀបចំមហោស្រពគីហ្សូណាជប៉ុន-កម្ពុជា ដែលនឹងប្រព្រឹត្ដទៅចាប់ពីថ្ងៃទី២០ដល់២៤ កុម្ភៈ ២០១៤ខាងមុខ ។ សាររបស់លោកត្រូវបានបកប្រែជាផ្លូវការដែលកោះសន្ដិភាពទទួលបានខ្លឹមសារ
រាជធានីភ្នំពេញ ៖ កាលពីថ្ងៃទី២៤ មករា កន្លងមកនេះ លោកគូម៉ាម៉ារូ យូជិ ឯកអគ្គរាជទូតវិសាមញ្ញនិងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា បានផ្ញើសារជាចំហមួយឆ្ពោះទៅការរៀបចំមហោស្រពគីហ្សូណាជប៉ុន-កម្ពុជា ដែលនឹងប្រព្រឹត្ដទៅចាប់ពីថ្ងៃទី២០ដល់២៤ កុម្ភៈ ២០១៤ខាងមុខ ។ សាររបស់លោកត្រូវបានបកប្រែជាផ្លូវការដែលកោះសន្ដិភាពទទួលបានខ្លឹមសារដូចខាងក្រោម៖
ទូលបង្គំជាខ្ញុំ ខ្ញុំគូម៉ាម៉ារូ យូជិ ជាឯកអគ្គរាជទូតវិសាមញ្ញនិងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា សូមគោរពថ្វាយព្រះពរនិងជូនពរឆ្នាំថ្មីជូនសម្ដេច ព្រះ អង្គម្ចាស់ ព្រះអង្គម្ចាស់ក្សត្រី ឯកឧត្ដម លោកជំទាវ លោក លោកស្រី និងប្រជាជនកម្ពុជា នាឱកាសឆ្នាំថ្មី ឆ្នាំ២០១៤នេះ ។ ខ្ញុំសូមក្រាបបង្គំថ្វាយនិងជម្រាបផ្ញើជូននូវសារលិខិតស្វាគមន៍នាឱកាសឆ្នាំថ្មីនេះផងដែរ ។
ឆ្នាំ២០១៣ គឺជាឆ្នាំដែលសក្ដិសមក្នុងការរំលឹកខួបអនុស្សាវរីយ៍លើកទី៦០ នៃទំនាក់ទំនងការទូតរវាងប្រទេសជប៉ុននិងកម្ពុជា ។ បើយើងរំលឹកមើលទៅលើរយៈពេលពេញមួយឆ្នាំមុននេះ ខ្ញុំគិតថា គឺជាឆ្នាំដែលសក្ដិសមទៅនឹងតម្លៃនៃខួបអនុស្សាវរីយ៍ ដោយសារតែមានការប្រារព្ធនូវព្រឹត្ដិការណ៍បម្លាស់ប្ដូរជាច្រើនសណ្ឋាន ។ ជាលទ្ធផលក្នុងរយៈពេលតែមួយឆ្នាំ យើងបានប្រារព្ធកម្មវិធីសរុបមានចំនួនជាង១២០កម្មវិធី ។ ក្នុងនោះកាលពីខែកុម្ភៈ កន្លងទៅនេះ មានអ្នកចូលរួមប្រមាណជាង៧.០០០នាក់ ក្នុងមហោស្រពគីហ្សូណាជប៉ុន-កម្ពុជា ដែលបានប្រារព្ធឡើងនៅមជ្ឈមណ្ឌលសហប្រតិបត្ដិការកម្ពុជា-ជប៉ុន ។ ជាងនេះទៅទៀត មានការបង្ហាញជូននូវព្រឹត្ដិការណ៍ផ្សេងៗនៃវប្បធម៌ ប្រពៃណី និងទំនើបរបស់ជប៉ុន កម្មវិធីប្រគំតន្ដ្រី និងកម្មវិធីបម្លាស់ប្ដូរសិល្បៈជាច្រើន ក្នុងរយៈពេលមួយឆ្នាំនោះផងដែរ ។ ខ្ញុំសូមថ្លែងអំណរគុណយ៉ាងអស់ពីដួងចិត្ដចំពោះប្រជាជនកម្ពុជាក៏ដូចជាស្ថាប័នពាក់ព័ន្ធទាំងអស់ ដែលបានអញ្ជើញចូលរួម និងអបអរសាទរខួបអនុស្សាវរីយ៍មួយនេះឱ្យមានលក្ខណៈអធិកអធម និងប្រកបដោយផ្លែផ្កា ។
នាខែកុម្ភៈ ចាប់ពីថ្ងៃទី២០ដល់ថ្ងៃទី២៤ ឆ្នាំនេះ យើងនឹងមានរៀបចំមហោស្រពគីហ្សូណាជប៉ុន-កម្ពុជា លើកទី៣ ។ នៅក្នុងលិខិតមួយនេះ ខ្ញុំបានភ្ជាប់ជូននូវប័ណ្ណប្រកាសរបស់កម្មវិធីផងដែរ ។ ខ្ញុំពិតជាមានសេចក្ដីរីករាយយ៉ាងក្រៃលែង ប្រសិនបើសម្ដេច ព្រះអង្គម្ចាស់ ព្រះអង្គម្ចាស់ក្សត្រី ឯកឧត្ដម លោកជំទាវ លោក លោកស្រី អញ្ជើញចូលរួមជាកិត្ដិយសនៅក្នុងឱកាសដ៏រីករាយ និងមានអត្ថន័យនេះ ។
ជាងនេះទៅទៀត អ្វីដែលជាការកត់សម្គាល់ដ៏ពិសេសនៃខួបអនុស្សាវរីយ៍លើកទី៦០នោះ គឺជាបម្លាស់ប្ដូរនៃដំណើរទស្សនកិច្ចផ្លូវការរវាងនាយករដ្ឋមន្ដ្រីនៃប្រទេសទាំងពីរ ។ កាលពីខែវិច្ឆិកា ឆ្នាំកន្លងទៅនេះ ឯកឧត្ដម ស៊ីនហ្សូ អាបេ នាយករដ្ឋមន្ដ្រីជប៉ុន បានធ្វើដំណើរទស្សនកិច្ចមកកាន់ប្រទេសកម្ពុជា ដែលជាដំណើរទស្សនកិច្ចផ្លូវការជាថ្មីម្ដងទៀត ក្នុងរយៈពេល១៣ឆ្នាំ នៃដំណើរទស្សនកិច្ចរបស់នាយករដ្ឋមន្ដ្រីជប៉ុនមកកាន់ប្រទេសកម្ពុជា ។
បន្ទាប់ពីនោះផងដែរ សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ក៏បានធ្វើដំណើរទស្សនកិច្ចទៅកាន់ប្រទេសជប៉ុន កាលពីខែធ្នូកន្លងទៅនេះ ។ នៅក្នុងកិច្ចប្រជុំកំពូលទ្វេភាគីដែលត្រូវបានប្រារព្ធធ្វើឡើងនាពេលនោះ នាយករដ្ឋមន្ដ្រីនៃប្រទេសទាំងពីរបានសម្រេចពង្រីកទំនាក់ទំនងរវាងប្រទេសទាំងពីរ តាមរយៈការដំឡើងឋានៈទំនាក់ទំនងប្រទេសទាំងពីរ «ភាពជាដៃគូថ្មីថ្មោង» ទៅជា «ភាពជាដៃគូយុទ្ធសាស្រ្ដ» ដែលប្រទេសទាំងពីរនឹងចូលរួមសហប្រតិបត្ដិការយ៉ាងជិតស្និទ្ធជាងមុន ក្នុងដំណោះស្រាយបញ្ហាប្រឈមទាំងក្នុងតំបន់និងអន្ដរជាតិ ។ ប្រទេសជប៉ុន នឹងបន្ដគាំទ្រនូវការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងកំណែទម្រង់នានា និងការរឹតបន្ដឹងលទ្ធិប្រជាធិបតេយ្យ និងនីតិរដ្ឋជាដើម ។
បើយើងក្រឡេកមើលទៅលើវិស័យសេដ្ឋកិច្ចវិញក៏មានសកម្មភាពគួរឱ្យកត់សម្គាល់ផងដែរ ។ នៅក្នុងខែកុម្ភៈ ឆ្នាំមុន គណៈប្រតិភូដ៏ធំមួយនៃសហព័ន្ធពាណិជ្ជកម្មជប៉ុនដែលហៅកាត់ថា KEIDANREN បានមកធ្វើទស្សនកិច្ចនៅកម្ពុជា ។ ចំនួនក្រុមហ៊ុនជប៉ុននៅប្រទេសកម្ពុជាក៏មានការកើនឡើងជាបន្ដបន្ទាប់ ហើយបច្ចុប្បន្ននេះ មានក្រុមហ៊ុនចំនួន១១៨ បានចុះបញ្ជីសមាជិកអចិន្ដ្រៃយ៍នៃសមាគមពាណិជ្ជកម្មជប៉ុននៅកម្ពុជាដែលហៅកាត់ថា JBAC ។ ដើម្បីធ្វើឱ្យមានភាពប្រសើរឡើងនៃបរិយាកាសវិនិយោគនៅក្នុងប្រទេសកម្ពុជា ប្រទេសទាំងពីរនឹងបន្ដសហប្រតិបត្ដិការគ្នាក្នុងការអភិវឌ្ឍបរិយាកាសវិនិយោគ តាមរយៈកិច្ចប្រជុំស្ដីពីវិស័យឯកជន និងសាធារណៈជប៉ុន-កម្ពុជា ។
ចំពោះកិច្ចសហប្រតិបត្ដិការសេដ្ឋកិច្ចវិញ ប្រទេសជប៉ុនបាននិងកំពុងជួយប្រទេសកម្ពុជាក្នុងឋានៈជាប្រទេសផ្ដល់ជំនួយធំជាងគេបំផុតចាប់តាំងពីឆ្នាំ១៩៩២ ។ ជំនួយអភិវឌ្ឍន៍ផ្លូវការរបស់ប្រទេសជប៉ុន មិនត្រឹមតែមានទំហំថវិកាយ៉ាងច្រើននោះទេ តែវាក៏មានលក្ខណៈទូលំទូលាយផងដែរ ។
ជំនួយអភិវឌ្ឍន៍ផ្លូវការរបស់ប្រទេសជប៉ុន បានជួយឧបត្ថម្ភប្រទេសកម្ពុជា យ៉ាងច្រើនតាមរយៈគម្រោងសាងសង់ហេដ្ឋារចនាសម្ព័ន្ធនានា ដូចជាស្ពានអ្នកលឿង ការជួសជុលផ្លូវជាតិលេខ១ និងលេខ៥ ដែលជាផ្នែកនៃច្រករបៀងសេដ្ឋកិច្ចខាងត្បូង តាមរយៈជំនួយបច្ចេកទេស រួមទាំងការអភិវឌ្ឍសង្គមនិងអភិបាលកិច្ចល្អ និងតាមរយៈគម្រោងជំនួយខ្នាតតូចរបស់អង្គការក្រៅរដ្ឋាភិបាល ។ ប្រទេសជប៉ុនមានបំណងបន្ដផ្ដល់ជំនួយរបស់ខ្លួនសម្រាប់ការអភិវឌ្ឍរបស់ប្រទេស និងប្រជាជនកម្ពុជា ដោយរួមបញ្ចូលទាំងកម្លាំងរបស់វិស័យឯកជនផងដែរ។ ដោយផ្អែកទៅលើសមិទ្ធផលវិជ្ជមាននាឆ្នាំ២០១៣កន្លងទៅនេះ ឆ្នាំនេះ យើងមានបំណងបន្ដពង្រីកបម្លាស់ប្ដូរប្រជាជននៃប្រទេសទាំងពីរឱ្យមានលក្ខណៈទូលំទូលាយថែមទៀត ។
នាយករដ្ឋមន្ដ្រីជប៉ុន អាបេ បានប្រកាសអំពីគម្រោងដើម្បីជំរុញបម្លាស់ប្ដូរយុវជនជប៉ុននិងកម្ពុជា ក្នុងកម្មវិធីដែលមានឈ្មោះថា «JENESY2.0» ។ យុវជនជាង៣.០០០នាក់ នឹងត្រូវអញ្ជើញឱ្យចូលរួមក្នុងកម្មវិធីនេះក្នុងរយៈពេល៥ឆ្នាំខាងមុខ ។ ខ្ញុំនឹងខិតខំប្រឹងប្រែងជំរុញនូវទំនាក់ទំនងមិត្ដភាពរវាងប្រទេសទាំងពីរ ក្រោមកិច្ចសហប្រតិបត្ដិការពីសំណាក់អតីតនិស្សិតកម្ពុជាដែលទទួលបានអាហារូបករណ៍ជប៉ុន ដែលមានចំនួនជាង៨០០នាក់ ក៏ដូចជាយុវជនដែលចូលរួមក្នុងកម្មវិធីយុវជននាវាអាស៊ីអាគ្នេយ៍ និងកម្មវិធីបម្លាស់ប្ដូរផ្សេងៗទៀត ។ ខ្ញុំពិតជាមានសេចក្ដីជឿជាក់យ៉ាងមុតមាំចំពោះការចូលរួមគាំទ្រពីសំណាក់ សម្ដេច ព្រះអង្គម្ចាស់ ព្រះអង្គម្ចាស់ក្សត្រី ឯកឧត្ដម លោកជំទាវ លោក លោកស្រី នៅក្នុងកិច្ចខិតខំប្រឹងប្រែងក្នុងការអភិវឌ្ឍទាំងនេះ ៕
ចែករំលែកព័តមាននេះ