ខណៈដែលក្រុមហ៊ុនហុងដាកំពុងធ្វើឱ្យទីផ្សាររថយន្តអេឡិចត្រូនិកនៅទ្វីបអឺរ៉ុបមានការរីកចម្រើនតាមរយៈការផលិតរថយន្តអគ្គិសនីថ្មីរបស់ខ្លួនដែលហៅថា «E» ប្រជាជនអាមេរិកនៅតែចូលចិត្តប្រើប្រាស់រថយន្តសាំងដដែល។ តែនៅថ្ងៃណាមួយនាពេលអនាគត ពួកគេអាចនឹងងាកមករករថយន្តអគ្គិសនីជំនួសឱ្យរថយន្តសាំងហើយ។ ជាពិសេសទៅទៀតនោះ ក្រុមហ៊ុនហុងដាក៏មានរថយន្តមិនប្រើប្រាស់សាំងប្រចាំត្រកូលរបស់ខ្លួនដែរ។
រថយន្តម៉ូដែលថ្មីនេះ គឺជាពត៌មានដ៏ធំមួយ ព្រោះវាបានធ្វើឱ្យគោលដៅរបស់ហុងដាកាន់តែខិតមកជិតក្រុមហ៊ុនផលិតរថយន្តផ្សេងៗទៀតរបស់អឺរ៉ុប។ បើទោះបីជាក្រុមហ៊ុនរថយន្តអគ្គិសនីរបស់អឺរ៉ុបបានដើរទៅមុខមុនមួយជំហាន ក្រុមហ៊ុនជប៉ុនហុងដាមានជំនឿទុកចិត្តគ្រប់គ្រាន់ក្នុងការត្រៀមធ្វើជាគូប្រជែងជាមួយនឹង Tesla។
អតិថិជនដែលជាអ្នកគាំទ្រផលិតផលរបស់ក្រុមហ៊ុនហុងដា ត្រូវរងចាំពីរបីឆ្នាំទៀតទម្រាំតែរថយន្តនេះមានលក់នៅលើទីផ្សារ ដោយសារតែគេនឹងដាក់លក់នៅខ្ទង់ឆ្នាំ២០២៥។ ការផលិតរថយន្តនេះឡើង នឹងធ្វើឱ្យក្រុមហ៊ុនមានការចំណេញច្រើន ព្រោះតែគេអាចប្រើប្រាស់បច្ចេកវិទ្យានេះទៅលើរថយន្តផ្សេងៗទៀត ហើយថែមទាំងអាចផលិតចេញជារថយន្តច្រើនជម្រើសសម្រាប់អ្នកដែលចង់បានប៉ុង១ ឬក៏ ប៉ុង២។
លោក Ayumu Matsuo មន្ត្រីគ្រប់គ្រងក្រុមហ៊ុន Honda ទទួលបន្ទុកផ្នែកអភិវឌ្ឍន៍ថាមពលបាននិយាយថា៖ «ស្ថាបត្យកម្មថ្មីនេះ ត្រូវបានរចនាឡើង ដើម្បីធ្វើឱ្យការបើកបររលូននិងការប្រើប្រាស់ថាមពលដែលមានការសន្សំសំចៃខ្ពស់។ យើងជឿថា វានឹងបំពេញតាមតម្រូវការរបស់អតិថិជនដែលចូលចិត្តម៉ូដែល C-segment និង D-segment របស់យើង»។
រថយន្តថ្មីនេះ នឹងមានអាគុយផ្ទុកថាមពលនៅពីក្រោមរថយន្ត ដែលអាចធ្វើឱ្យការចែករំលែកទម្ងន់រថយន្តទាំងមូលស្មើរគ្នាទាំងមុខទាំងក្រោយ ៥០-៥០។ វាធ្វើឱ្យការបើកបរកាន់តែមានភាពងាយស្រួលក្នុងការបញ្ជា។ ក្រៅពីនេះ វាក៏ជារថយន្តដែលវិលកង់ក្រោយ និង មិនមានលក្ខណៈវេរខ្លាំងពេលបត់នៅផ្លូវកោង។ សម្រាប់អាគុយវិញ គឺគេគ្រាន់តែដឹងថា នឹងអាចធ្វើឱ្យរថយន្តបើកបរបានឆ្ងាយគួរសម ៕
ប្រភព ៖ carbuzz , កែសម្រួលដោយ ៖ សំណាង
ចែករំលែកព័តមាននេះ