ខេត្តព្រះវិហារ ៖ ទីបំផុត យុវជនម្នាក់ដែលតាមព័ត៌មានថា បានចាប់គំរាមសង្សាររបស់ខ្លួននាំទៅបាត់ដោយការបាញ់គំរាមផងកាលពីយប់ថ្ងៃទី២៧ មេសា នោះ ត្រូវប៉ូលិសឃាត់ខ្លួនបានហើយនៅរសៀលថ្ងៃទី២៨ មករា។
ខេត្តព្រះវិហារ ៖ ទីបំផុត យុវជនម្នាក់ដែលតាមព័ត៌មានថា បានចាប់គំរាមសង្សាររបស់ខ្លួននាំទៅបាត់ដោយការបាញ់គំរាមផងកាលពីយប់ថ្ងៃទី២៧ មេសា នោះ ត្រូវប៉ូលិសឃាត់ខ្លួនបានហើយនៅរសៀលថ្ងៃទី២៨ មករា។
យុវជនដែលត្រូវឃាត់ខ្លួននេះឈ្មោះ ហុីង លីដា ហៅ លីយូ អាយុ២២ឆ្នាំ ជាកូនរបស់នាយទាហានមួយរូប មានទីលំនៅភូមិសែនជ័យ ឃុំស្រឯម ស្រុកជាំក្សាន្ត ត្រូវសមត្ថកិច្ចឃាត់ខ្លួនពីបទប្រើប្រាស់អាវុធខុសច្បាប់ និងចាប់ពង្រត់ ។ តាមមន្ត្រីប៉ូលិសបានឱ្យដឹងថា ករណីនេះស្នងការដ្ឋានខេត្តព្រះវិហារ បានសហការជាមួយស្នងការដ្ឋានខេត្តសៀមរាប ធ្វើការឃាត់ខ្លួនគូសង្សារដែលបានពង្រត់គ្នា នៅរសៀលថ្ងៃទី២៨ មករា នៅចំណុចផ្សារដំដែក ស្រុកសូទ្រនិគម ខេត្តសៀមរាប ។ យុវជនដែលត្រូវចាប់ខ្លួននេះ កាលពីវេលាម៉ោង៧និង៤៥នាទីយប់ ថ្ងៃទី ២៧ មករា បានដកកាំភ្លើងបាញ់ចំនួន២គ្រាប់នៅកណ្តាលក្រុងព្រះវិហារ មុខធនាគារអេស៊ីលីដា បង្កឱ្យមានការភ្ញាក់ផ្អើលដល់ប្រជាពលរដ្ឋ ។ ការបាញ់គំរាមនោះ គឺខណៈយុវជនទំនើងនេះជិះម៉ូតូតែម្នាក់ឯងតាមនារីជាសង្សារឈ្មោះ ចៅ ចាន់រ៉ានី អាយុ១៧ឆ្នាំ ដែលជាកូនរបស់អាជីវករលាងរថយន្ត មានទីលំនៅភូមិឡឥដ្ឋ សង្កាត់កំពង់ប្រណាក ក្រុងព្រះវិហារ ដែលជិះម៉ូតូមួយគ្រឿងមានគ្នា៣នាក់ ។
លុះដល់ចំណុចខាងលើ យុវជនម្នាក់នេះក៏ហៅនារីជាសង្សារឱ្យជិះម៉ូតូជាមួយខ្លួន តែនារីសង្សារបដិសេធមិនជិះជាមួយ ឯយុវជននេះនៅតែព្យាយាមបបួលនាងជាសង្សារដដែលៗ តែដោយនាងនៅតែមិនជិះជាមួយទៀត ក៏ដកកាំភ្លើងប្រភេទកា៥៩ បាញ់ឡើងលើ២គ្រាប់គំរាមនាងឱ្យជិះម៉ូតូជាមួយខ្លួនទាល់តែបាន រួចក៏នាំនាងទៅបាត់ ។ លុះមកដល់រសៀលថ្ងៃទី២៨ មករា សមត្ថកិច្ចបានកំណត់មុខសញ្ញាច្បាស់លាស់ ក៏ធ្វើការឃាត់ខ្លួនតែម្តង ។ តាមមិត្តភក្តិនារីជាសង្សារយុវជនរូបនេះនិយាយថា ឈ្មោះ ហុីង លីដា ហៅលីយូ ពិតជាបានដកកាំភ្លើងបាញ់គំរាមទៅលើមិត្តភក្តិរបស់នាងជាសង្សារគេប្រាកដមែន ។ មន្ត្រីនគរបាលខេត្តបានឱ្យដឹងថា គូសង្សារមួយគូនេះស្រឡាញ់គ្នាជាយូរមកហើយ ដោយកាលពី៥ខែមុនធ្លាប់បានពង្រត់គ្នាម្តងដែរ បុ៉ន្តែដោយក្រុមគ្រួសារទាំងសងខាងសម្របសម្រួលគ្នា ក៏នាំគូសង្សារនេះមកចុះកិច្ចសន្យាឈប់ទាក់ទងគ្នានៅស្នងការដ្ឋានខេត្ត ស្រាប់តែពេលនេះកើតមានករណីនេះម្តងទៀត ។
មកដល់ពេលនេះ យុវជនទំនើងត្រូវបានបញ្ជូនមកស្នងការដ្ឋានខេត្ត ដើម្បីកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធី ៕
ចែករំលែកព័តមាននេះ