រាជធានីភ្នំពេញ ៖ យោងតាមស្ថិតិរបាយការណ៍របស់ក្រសួងទេសចរណ៍កម្ពុជាបានឲ្យដឹងថា គិតត្រឹមដំណាច់ខែឧសភាឆ្នាំ ២០១៩ កម្ពុជាមានសណ្ឋាគារលំដាប់ផ្កាយពីផ្កាយ១ដល់ផ្កាយ៥ ចំនួនសរុប ១៥២ សណ្ឋាគារ ឬស្មើនឹងចំនួន…
រាជធានីភ្នំពេញ ៖ យោងតាមស្ថិតិរបាយការណ៍របស់ក្រសួងទេសចរណ៍កម្ពុជាបានឲ្យដឹងថា គិតត្រឹមដំណាច់ខែឧសភាឆ្នាំ ២០១៩ កម្ពុជាមានសណ្ឋាគារលំដាប់ផ្កាយពីផ្កាយ១ដល់ផ្កាយ៥ ចំនួនសរុប ១៥២ សណ្ឋាគារ ឬស្មើនឹងចំនួន ១៧.៤៥០បន្ទប់ ក្នុងខេត្តចំនួន ១៣ទូទាំងប្រទេស ។
របាយការណ៍នេះបានបង្ហាញថា សណ្ឋាគារលំដាប់ផ្កាយ១ មានចំនួន ២១សណ្ឋាគារ គិតជាបន្ទប់ ១.០០៦បន្ទប់, សណ្ឋាការផ្កាយ២ មាន១៩សណ្ឋាគារ មាន១០១០បន្ទប់, ផ្កាយ៣ចំនួន៣៣សណ្ឋាគារ មាន២.៥២៦បន្ទប់, ផ្កាយ៤មាន៤១សណ្ឋាការ មាន៤.៨៦៦បន្ទប់ និងផ្កាយ៥មានចំនួន ៣៦សណ្ឋាគារ និងមានបន្ទប់ចំនួន ៨.០៤២បន្ទប់ ។ ប្រភពដដែលបានបញ្ជាក់ថា ខេត្តសៀមរាបជាខេត្តដែលមានសណ្ឋាគារលំដាប់ផ្កាយច្រើនជាងគេ សរុបទាំងអស់៦០សណ្ឋាគារ មានបន្ទប់៨.១៤៣បន្ទប់ បន្ទាប់មកគឺនៅរាជធានីភ្នំពេញមានសណ្ឋាគារសរុប៤០សណ្ឋាគារ មានបណ្ទប់៥.១៩៣សណ្ឋាគារ។
បើតាមលោក តុប សុភ័ក អនុរដ្ឋលេខាធិការនិងជាអ្នកនាំពាក្យក្រសួងទេសចរណ៍កម្ពុជាបានមានប្រសាសន៍ថា បច្ចុប្បន្ននេះ សណ្ឋាគារនៅក្នុងប្រទេសកម្ពុជា មានច្រើនតាមកន្លែង ឬតំបន់ ហើយតំបន់ខ្លះរកបន្ទប់ស្នាក់នៅមិនបានទេ នៅរដូវកាលបុណ្យទានធំៗ ឬគេហៅថា រដូវកាល High Season ។ ដូច្នេះវិនិយោគិនគួរតែសាងសង់នៅតំបន់ណាដែលមិនទាន់មានសណ្ឋាគារគ្រប់គ្រាន់ ។ លោកបានបន្តថា «មានតំបន់មួយចំនួន ដែលនៅតែខ្វះបន្ទប់សម្រាប់នៅស្នាក់នៅសម្រាប់ភ្ញៀវទេសចរអន្តរជាតិ ដូចជានៅភូមិភាគឦសាន និងតំបន់ឆ្នេរនៃព្រះរាជាណាចក្រកម្ពុជាជាដើម ។ តំបន់ទាំងនេះ ពេលមានបុណ្យទានធំៗម្ដងៗ គឺមិនមានបន្ទប់សម្រាប់ស្នាក់នៅនោះទេ និងត្រូវស្នាក់នៅគ្នាច្រើនក្នុងបន្ទប់តែមួយ ដែលជាហេតុធ្វើអោយម្ចាស់សណ្ឋគារត្រូវបង្ខំចិត្តដំឡើងថ្លៃបន្ទប់ ដើម្បីទប់ទប់នឹងការចំណាយរបស់ខ្លួនផងដែរ » ។
លោកបានបន្តថា ថ្វីត្បិតតែសណ្ឋាគារនៅក្នុងប្រទេសកម្ពុជាមានច្រើនមែន តែសណ្ឋា
គារស្ដង់ដារ និងលំដាប់ផ្កាយនៅមិនទាន់ឆ្លើយតបនឹងតម្រូវការភ្ញៀវនៅឡើយទេ ហើយបើតាមការព្យាករណ៍របស់ក្រសួងទេសចរណ៍ ភ្ញៀវទេសចរអន្តរជាតិនឹងមកលេងស្រុកខ្មែរ នៅពេលអនាគតនឹងកើនឡើងជាបន្តបន្ទាប់ ជាក់ស្ដែង ក្រសួងបានព្យាករណ៍ថា ឆ្នាំ ២០២០ នឹងទទួលបានភ្ញៀវទេសចរអន្តរជាតិចំនួន៧លាននាក់ ឆ្នាំ ២០២៥ នឹងទទួលបាន១១លាននាក់ ណោងឆ្នាំ ២០១៣០ ព្យាករណ៍ថានឹងទទួលបាន១៥លាននាក់ ដូច្នេះបន្ទប់សណ្ឋាគារទូទាំងប្រទេសមិនទាន់អាចឆ្លើយតបបាននោះទេ ។
លោកស្រី Clais Chenda ប្រធានសមាគមសណ្ឋាគារកម្ពុជា បានមានប្រសាសន៍ផងដែរថា សណ្ឋាគារដែលសាងសង់ថ្មីៗគួរតែជាសណ្ឋាគារដែលប្លែកនិងទាន់សម័យ និយាយរួមគឺស្របទៅតាមស្ដង់ដារអន្តរជាតិ និងមានលក្ខណៈប្លែកពីសណ្ឋាគារដែលមានស្រាប់នៅពេលនេះ ពីព្រោះភ្ញៀវបរទេសត្រូវការស្នាក់នៅសណ្ឋាគារណាដែលទំនើបនិងប្លែកៗ ។ លោកស្រីបន្តថា នៅមានខេត្តជាច្រើនទៀតដែលអ្នកមានទុនក្នុងការអភិវឌ្ឍសណ្ឋាគារគួរតែសម្លឹងមើលពីសក្ដានុពល ព្រោះពេលនេះ មានតែខេត្តពាក់កណ្ដាលប៉ុណ្ណោះ ដែលមានសណ្ឋាគារ ដូច្នេះនៅពាក់កណ្ដាលទៀតដែលមិនទាន់មានសណ្ឋាគារលក្ខណៈលំដាប់ផ្កាយសម្រាប់ទទួលភ្ញៀវ តែការសាងសង់ក៏គួរតែគិតគូរអោយបានច្បាស់លាស់ផងដែរ ។
តាមស្ថិតិរបាយការណ៍ក្រសួងទេសចរណ៍ មានតែខេត្តចំនួន១៣ប៉ុណ្ណោះ ដែលមានសណ្ឋាគារលំដាប់ផ្កាយ ក្នុងនោះដែរ សណ្ឋាគារលំដាប់ផ្កាយ៥មានតែខេត្តចំនួន៥ប៉ុណ្ណោះ រួមមានខេត្តសៀមរាប ចំនួន២២សណ្ឋាគារ ខេត្តព្រះសីហនុចំនួន ៤សណ្ឋាគារ ខេត្តកំពតមាន១សណ្ឋាគារ ខេត្តកែបមាន២សណ្ឋាគារ និងរាជធានីភ្នំពេញ៧សណ្ឋាគារ ៕ កែសម្រួលដោយ ៖ សុឃាក់
ចែករំលែកព័តមាននេះ