ប្រទេសហ្វ៊ីលីពីន ៖ ប្រធានាធិបតីហ្វ៊ីលីពីនលោកRODRIGO DUTERTE កាលពីថ្ងៃទី២២កក្កដា បានទទួចដល់សភាឲ្យស្ដារទោសប្រហារជីវិតឡើងវិញក្នុងក្របខណ្ឌនៃការតស៊ូប្រឆាំងគ្រឿងញៀន ដែលរងការរិះគន់របស់ពិភពលោក ដោយក្នុងយុទ្ធនាការនោះប៉ូលិសបានសម្លាប់មនុស្សច្រើនពាន់នាក់រួចហើយ។
ដោយមានប្រជាប្រិយភាពខ្ពស់បំផុតនិងទទួលការគាំទ្ររបស់សភា ដែលត្រួតត្រាដោយបណ្ដាសម្ព័ន្ធមិត្តរបស់លោក ប្រធានាធិបតីហ្វ៊ីលីពីន បានឆ្លៀតពេលថ្លែងសុន្ទរកថាប្រចាំឆ្នាំស្ដីពីស្ថានភាពប្រជាជាតិ ដើម្បីស្នើឲ្យមានសកម្មភាពលើសមាសភាពគន្លឹះមួយនេះនៃកម្មវិធីប្រឆាំងឧក្រិដ្ឋកម្មរបស់លោក។
ដោយនិយាយយោងដល់អំពើពុករលួយដែលកំពុងរីកសាយក្នុងប្រទេស លោកDUTERTEថ្លែងថា ខ្ញុំស្នើដល់សភាឲ្យស្ដារឡើងវិញទោសប្រហារជីវិត ចំពោះបណ្ដាអំពើឧក្រិដ្ឋទាក់ទិននឹងគ្រឿងញៀនព្រមទាំងការប្លន់។
ទោះបីរូបលោករងការសើុបអង្កេតបឋមរបស់តុលាការព្រហ្មទណ្ឌអន្តរជាតិ ដោយសារយុទ្ធនាការប្រឆាំងគ្រឿងញៀនរបស់លោក ដែលអ.ស.បក៏មិនយល់ស្របតាមដែរក្ដី ក៏លោកDUTERTE ហាក់មិនខ្វល់ឡើយ។
អង្គការលើកលែងទោសអន្តរជាតិAMNESTY INTERNATIONAL និយាយថាមានការភ័យខ្លាចចំពោះបណ្ដាផលវិបាកនៃការផ្ដួចផ្ដើមគំនិតនោះ ក្នុងប្រទេសមួយដែលប៉ូលិសនិយាយថា បានសម្លាប់ពួកអ្នករត់ពន្ធនិងសេពគ្រឿងញៀនអស់់ជាង៥.៣០០នាក់រួចហើយ។ តុល្យការពិតប្រាកដពួកអ្នកត្រូវសម្លាប់អាចមានខ្ពស់ជាងនេះដល់យ៉ាងតិច៤ដងឯណោះ។
ព្រឹទ្ធសភាហ្វ៊ីលីពីនជាប្រពៃណីចាត់ទុកជាអ្នកមានឯករាជ្យប្រឈមមុខនឹងអំណាចនីតិប្រតិបត្តិជាងសភា។ ចាប់តាំងពី៣ឆ្នាំមកហើយព្រឹទ្ធសភាដើរតួនាទីសំខាន់មួយ ក្នុងការរាំងខ្ទប់ការផ្ដួចផ្ដើមគំនិតដ៏ចម្រូងចម្រាស់មួយចំនួនរបស់ប្រធានាធិបតី។ តែជោគជ័យរបស់ពួកអ្នកគាំទ្រលោកDUTERTE ក្នុងការបោះឆ្នោតព្រឹទ្ធសភាពាក់កណ្ដាលអាណត្តិកាលពីខែឧសភានាំឲ្យប្រធានាធិបតី អាចអនុវត្តគម្រោងចម្រូងចម្រាស់ទាំងឡាយរបស់លោក ក្នុងនោះមានការស្ដារទោសប្រហារជីវិត និងការកែទម្រង់រដ្ឋធម្មនុញ្ញ៕ (កែសម្រួលដោយ ៖ បុប្ផា)
ចែករំលែកព័តមាននេះ