ខេត្តព្រះសីហនុ ៖ មកដល់រសៀលថ្ងៃទី២២ កក្កដា យោងតាមប្រភពព័ត៌មានពីមន្ត្រីនគរបាលខេត្ត បានឲ្យដឹងថា ជនសង្ស័យពីបទបង្ខាំងមនុស្សខុសច្បាប់ ដែលប្រព្រឹត្តនៅក្នុងសណ្ឋាគារ និងកាស៊ីណូឃ្វីនកូ កំពុងត្រូវបានសមត្ថកិច្ចសាកសួរទៅតាមនីតិវិធី ។ ប៉ុន្តែចំពោះអត្តសញ្ញាណជនសង្ស័យទាំង៨នាក់ និងជនរងគ្រោះ២នាក់ សមត្ថកិច្ចពុំទាន់ឲ្យដឹងនៅឡើយទេ គ្រាន់តែបង្ហើបថា សុទ្ធតែជាជនជាតិចិនដូចគ្នា ហើយត្រូវ
រង់ចាំពេលវេលាសាកសួរឲ្យបានច្បាស់លាស់ជាមុនសិន ។
ប្រភពពីសមត្ថកិច្ចដដែលឲ្យដឹងទៀតថា ករណីនេះបើយោងតាមការពិនិត្យជំហានដំបូង គឺជនសង្ស័យទាំង៨នាក់បានឃាត់ខ្លួនជនរងគ្រោះ២នាក់ យកមកបង្ខាំងទុកនៅក្នុងកាស៊ីណូនិងសណ្ឋាគារឃ្វីនកូ ដែលមានទីតាំងស្ថិតនៅភូមិ៣ សង្កាត់លេខ៣ ក្រុងព្រះសីហនុ ដោយតម្រូវឲ្យជនរងគ្រោះទាំង២នាក់ ប្រគល់ប្រាក់ឲ្យពួកគេជាថ្នូរនឹងការមានសេរីភាព ប៉ុន្តែគេនៅពុំទាន់ដឹងថា ទឹកប្រាក់ដែលជនសង្ស័យទាំង៨នាក់នោះទាមទារមានចំនួនប៉ុន្មានទេ ។
គួររំឭកថា កាលពីវេលាម៉ោងប្រមាណ៨កន្លះយប់ថ្ងៃ២១ ខែកក្កដា សមត្ថកិច្ចចម្រុះមាននគរបាលនិងកងរាជអាវុធហត្ថខេត្ត បានធ្វើការបង្ក្រាបករណីជនជាតិចិនចាប់ជំរិតជនជាតិចិដូចគ្នា នៅសណ្ឋាគារនិងកាសុីណូឃ្វីនកូ បន្ទប់លេខ៦ ជាន់ទី៥ ក្នុងសង្កាត់លេខ៣ក្រុងព្រះសីហនុ ។
ជនរងគ្រោះមាន២នាក់ ចំណែកជនសង្ស័យមានបក្ខពួកចំនួន៨នាក់ ។ នៅក្នុងការបង្ក្រាបនេះ វត្ថុតាងដែលត្រូវបានរឹបអូសមាន រថយន្តឡិចសុីស៥៧០មួយគ្រឿង ទូរស័ព្ទ១០គ្រឿង កាតធនាគារ១៣ លិខិតឆ្លងដែន៣ក្បាល អត្តសញ្ញណប័ណ្ណចិន៤សន្លឹក កាបូបស្ពាយ១ និងខ្សែរឹត១ដុំ ។ (សម្រួលដោយ៖ ស្រីណា)
ចែករំលែកព័តមាននេះ