រាជធានីភ្នំពេញ ៖ ក្នុងពេលជំងឺប៉េស្តជ្រូកអាហ្វ្រិកបានផ្ទុះឡើងនៅតាមបណ្ដាខេត្តមួយចំនួននៅក្នុងប្រទេសកម្ពុជា ដែលបានបណ្តាលឲ្យមានជ្រូកជិត ៣០០០ ក្បាលងាប់ និងបំផ្លាញចោលជិត ៨០០ ក្បាលផ្សេងទៀតនោះ វាក៏បានជះឥទ្ធិពលដល់ការលក់ដូរសាច់ជ្រូកផងដែរ ដោយសារតែប្រជាពលរដ្ឋជាច្រើន ផ្អាកទទួលទានសាច់ជ្រូក ដោយការភ័យខ្លាចជំងឺប៉េស្តជ្រូកអាហ្វ្រិក ។
កត្តានេះកំពុងធ្វើអោយទីផ្សារសាច់ជ្រូកនៅតាមផ្សារមួយចំនួននៅក្រុងភ្នំពេញបានបាត់បង់អតិថិជនអស់ជាច្រើន ដោយពលរដ្ឋងាកទៅរកសាច់ផ្សេងៗមកទទួលទានវិញ ដូចជាសាច់គោ សាច់ត្រីជាដើម ។ អាជីវករមួយចំនួននៅតាមផ្សារបានបោះបង់របរលក់សាច់ជ្រូកបន្តិចម្ដងៗ ពីព្រោះតែតម្លៃជ្រូក ទិញចូលនៅមានតម្លៃខ្ពស់ដដែល តែសាច់ជ្រូកគ្មានអ្នកទិញទៅបរិភោគ ។
ជាក់ស្តែង លោក ចន្ធី អាជីវករនៅផ្សារអូរឬស្សី បានប្រាប់អោយដឹងថា រយៈពេលប្រមាណជិត ១០ថ្ងៃមកនេះ ការលក់សាច់ជ្រូកលែងសូវដាច់ដូចមុនហើយ ដោយពលរដ្ឋអត់ទិញសាច់ជ្រូកទៅធ្វើម្ហូបដូចមុនទៀតទេ ពួកគាត់ងាកទៅរកទិញសាច់ផ្សេងជំនួសវិញ ។ លោកបានបន្តថា «ខ្ញុំមិនដឹងថាពួកគាត់បានព័ត៌មានមកពីណាទេ ថាសាច់ជ្រូកស្រុកខ្មែរទាំងអស់កើតជំងឺប៉េសហ្នឹង តែតាមពិតជំងឺនេះ បើកើតកន្លែងណាគេបំផ្លាញទាំងអស់ មិនអោយមកលក់នៅលើទីផ្សារឡើយ ។ ដោយឡែកសាច់ជ្រូកដែលអាជីវករយើងមុននឹងយកមកលក់នេះដែរ ក៏មានការត្រួតពិនិត្យត្រឹមត្រូវពីមន្ត្រីជំនាញដោយមិនចេះតែលក់តាមចិត្តនោះទេ» ។
ប្រភពដដែលបានបន្ថែមថា កាលពីមុនក្នុងមួយថ្ងៃ លោកអាចលក់សាច់ជ្រូកអស់ប្រមាណ ២ក្បាលទៅ៣ក្បាល តែពេលនេះវិញ ត្រឹមតែមួយចំហៀងក៏លក់មិនអស់ដែរ និងត្រូវយកទៅផ្ទះក្លាស្សេទុក និងត្រូវលក់ក្រោមតម្លៃទីផ្សារដើម្បីបានប្រាក់កាសមកវិញខ្លះ គ្រាន់បើជាងខូចចោលទទេ ដូច្នេះហើយ របរនេះហាក់ដូចជាពិបាកណាស់ពេលនេះ ។លោកបានថា៖« គេគ្រប់គ្នាខ្លាចមិនហ៊ានហូបសាច់ជ្រូក តែសម្រាប់ខ្ញុំវិញហូបរាល់ថ្ងៃ មិនឃើញកើតអីផង ដូច្នេះហើយសូមពលរដ្ឋខ្មែរ គួរតែគាំទ្រ និងបរិភោគសាច់ជ្រូកវិញទៅ ព្រោះមន្ត្រីជំនាញគេបានចេញសេចក្តីប្រកាសហើយថា ជំងឺនេះ មិនឆ្លងមកមនុស្សទេ » ។
អ្នកស្រីអាជីវករលក់សាច់ជ្រូកម្នាក់ទៀតនៅក្នុងផ្សារអូរឬស្សី នេះដែរ បានអោយដឹងថា សាច់ជ្រូកនៅលើទីផ្សារនៅតែមានតម្លៃខ្ពស់ដដែល តែអ្នកទិញស្ងាត់ណាស់ គឺស្ងាត់រហូតដល់ចង់បិទតូបចោលតែម្ដង ព្រោះមិនមានពលរដ្ឋណាមករកទិញសាច់ជ្រូកសោះតែម្ដង គឺមានតិចតួចបំផុត ។ អ្នកស្រីបាននិយាយថា « របរលក់សាច់ជ្រូកនៅពេលនេះ ប្រៀបដូចជាមនុស្សអាយុ៨០អញ្ចឹង មានន័យថាកាន់តែដុនដាបមែនទែនហើយ ហើយបើសិនជាមួយសប្ដាហ៍ទៀត នៅតែមានស្ថានភាពបែបនេះ មិនយូរទេខ្ញុំនឹងបិទតូបដូចគេឯងហើយនិងរករបរថ្មីជំនួសវិញហើយ » ។
អាជីវករក្នុងផ្សារនានាបានអំពាវនាវអោយអាជ្ញាធរមានចំណាត់ការណាមួយ លើបញ្ហាទីផ្សារជ្រូកនេះ ព្រោះថាតម្លៃនៅតែខ្ពស់ តែគ្មានអ្នកមកទិញយកទៅបរិភោគ ឬត្រូវបង្កើនការផ្សព្វផ្សាយអោយពលរដ្ឋយល់ដឹងបន្ថែម និងឱ្យពួកគាត់នៅតែទិញសាច់ជ្រូកទៅបរិភោគ ។ មិនមែនតែអាជីករក្នុងផ្សារដែលលក់សាច់ជ្រូកប៉ុណ្ណោះទេពិបាកនោះ សូម្បីតែម្ចាស់ភោជនីយដ្ឋានមួយចំនួនក៏មានបញ្ហាជាមួយនឹងម្ហូបទាក់ទងនឹងសាច់ជ្រូកនេះដែរ ជាក់ស្ដែងម្ចាស់ភោជនីយដ្ឋាយីហោសុខហុកនៅម្ដុំកំបូលក៏បានអោយដឹងថា ពាក់ព័ន្ធនឹងម្ហូបដែលទាក់ទងនឹងសាច់ជ្រូក ភ្ញៀវមិនសូវកុម្មង់ទេ ពួកគាត់កុម្មង់ម្ហូបជាសាច់គោ សាច់មាន់ ឬសាច់ត្រីវិញ ។
បើតាមលោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានអោយដឹងថាទោះបីជាជ្រូកខ្មែរ កើតជំងឺប៉េស្តជ្រូកអាហ្វ្រិកក៏ដោយ ក៏តម្លៃនៅតែខ្ពស់ដដែល ពីព្រោះជ្រូកដែលកើតជំងឺនេះ នៅតំបន់ណាត្រូវកំទេចចោលទាំងអស់ ដូច្នេះជ្រូកដែលលក់នៅលើទីផ្សារនេះ ជាជ្រូកនាំចូលពីប្រទេសថៃ ហើយថៃគេគ្មានកើតជំងឺនេះទេ អញ្ចឹងហើយទើបតម្លៃជ្រូកនៅតែខ្ពស់ ។ ម្យ៉ាងទៀតជ្រូកខ្មែរដែលផ្គត់ផ្គង់នៅតាមផ្សារនោះ ក៏ជាជ្រូករបស់ក្រុមហ៊ុនធំៗដែរ ដូចជាជ្រូករបស់ក្រុមហ៊ុន CP និងជ្រូករបស់ក្រុមហ៊ុន M’s Pig របស់ឧកញ៉ាម៉ុងឬទ្ធីជាដើម ។ ខណៈបញ្ហាសម្រាប់សាច់ជ្រូកនោះ ធ្វើអោយសាច់ផ្សេងមានហាងឆេងនិងទីផ្សារខ្ពស់ទៅវិញ ជាក់ស្ដែង អ្នកស្រីសុខ ស្រីម៉ៅ អាជីករលក់សាច់គោបានអោយដឹងថា ប៉ុន្មានថ្ងៃមកនេះ សាច់គោហាងមានហាងឆេងខ្ពស់ណាស់ ។ ពីមុនក្នុងមួយថ្ងៃ អ្នកស្រីលក់បោះដុំទៅម៉ូយតែប្រមាណជាង១០០គីឡូក្រាមប៉ុណ្ណោះ តែប៉ុន្មានថ្ងៃនេះ លក់បានដល់ជាង១តោនឯណោះ ។អ្នកស្រីនិយាយថា «ទោះបីជាតម្រូវការសាច់គោកើនឡើងខ្ពស់បែបនេះក្ដី តែតម្លៃមិនឡើងថ្លៃនោះទេ គឺនៅរក្សាតម្លៃដដែល ដូចពីមុនគ្រាន់តែអាជីកររីករាយជាមួយនឹងការលក់បានច្រើនជាងមុន ។
គួរបញ្ជាក់ថាទីផ្សារជ្រូកកម្ពុជា ទើបតែឆ្លងផុតនូវវិបត្តិមួយដែលធ្វើអោយតម្លៃជ្រូកក្នុងស្រុកធ្លាក់ដល់កម្រិត រហូតដល់ពលរដ្ឋបានបោះបង់ចោលការចិញ្ចឹមម្ដងរួចមកហើយ និងទើបតែងើបឡើងវិញបន្តិច ស្រាប់តែពេលនេះ ក៏ជួបនូវជំងឺប៉េសជ្រូកអាហ្វ្រិកនេះ ដែលជំងឺត្រូវបានសន្និដ្ឋានថាឆ្លងមកពីប្រទេសវៀតណាម តាមរយៈដឹកតាមម៉ូតូរឺពលរដ្ឋវៀតណាមដឹកម្ហូបលក់តាមរទេះ មកកាន់ទឹកដីខ្មែរ ទើបជំងឺនេះផ្ទុះឡើងតែម្ដង ដែលកាលដំបូងគឺកើតឡើងនៅខេត្តរតនគីរី និងបន្តបន្ទាប់រហូតដល់ពេលនេះ នៅជាយៗរាជធានីភ្នំពេញក៏មានជំងឺនេះដែរ ៕ កែសម្រួលដោយ ៖ សុឃាក់
ចែករំលែកព័តមាននេះ