រាជធានីភ្នំពេញ ៖ លោកឧត្តមសេនីយ៍ត្រីអេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសថ្លែងថា
គណៈកម្មការជាតិទប់ស្កាត់ និងបង្ក្រាបបទល្មើសធនធានធម្មជាតិ ចាប់បញ្ជូនជនល្មើសទៅតុលាការដោយមិនគិតថាជាអ្នកមានបុណ្យស័ក្តិ ឬអ្នកក្រីក្រនោះទេ ។ ការបង្ហាញពីវិធានការថ្មីនេះ បានធ្វើឡើងយ៉ាងក្តៅ
គគុកនៅភូមិភាគឦសាន ខណៈបានស្រាវជ្រាវរកឃើញថា មានក្រុមហ៊ុនចំនួន៥ព្រមទាំងជនជាប់ចោទ៤នាក់ជាប់ពាក់ព័ន្ធនឹងបទល្មើសព្រៃឈើនេះ ត្រូវចាប់បញ្ជូនទៅតុលាការ និងឃុំខ្លួន ឯជនសង្ស័យ៩នាក់ទៀតកំពុងគេចខ្លួន ។
លោកឧត្តមសេនីយ៍ត្រី អេង ហុី បានថ្លែងបែបនេះក្នុងសន្និសីទសារព័ត៌មានមួយនៅទីស្តីការគណៈរដ្ឋមន្ត្រី នាព្រឹកថ្ងៃ១៨ ខែកក្កដា ។ លោកក៏បានប្រកាសពីការបើកកិច្ចសហប្រតិបត្តិការជាមួយប្រទេសជិតខាង ដើម្បីបង្ក្រាបឧក្រិដ្ឋកម្មព្រៃឈើកម្ពុជា និងជាការចូលរួមការពារព្រៃឈើដែលនៅសេសសល់នៅប្រទេសកម្ពុជា ។ លោក អេង ហុី បានអះអាងថា សកម្មភាពបទល្មើសព្រៃឈើធំៗបានបង្ក្រាបអស់ហើយដោយសព្វថ្ងៃនៅសល់ករណីតូចៗដឹកតាមម៉ូតូតែប៉ុណ្ណោះ ។ គណៈកម្មការថ្នាក់ជាតិ បានចាប់ផ្តើមបង្ក្រាបការកាប់ឈើនៅភូមិភាគឦសាននាដើមឆ្នាំ២០១៦ ហើយនៅចុងឆ្នាំ២០១៦ការបង្ក្រាបធ្វើឡើងនៅទូទាំងប្រទេស ។
លោកបន្តថា នៅឆ្នាំ២០១៦ លើកទី១-បង្ក្រាបបានឈើជាង៧ម៉ឺនម៉ែត្រគូប ដាក់ឲ្យដេញថ្លៃជាសាធារណៈយកប្រាក់មកបម្រើក្នុងវិស័យអប់រំ លើកទី២-បង្ក្រាបបានជាង៣ម៉ឺនម៉ែត្រគូប និងដាក់ដេញថ្លៃដូចគ្នាដែរ និងលើកទី៣-បង្ក្រាបបានជាង៤ពាន់ម៉ែត្រគូបប៉ុណ្ណោះ ។ លោកឧត្តមសេនីយ៍ត្រីបន្តថា ក្នុងឆ្នាំ២០១៨បានឃាត់ខ្លួនមនុស្ស១៦៣នាក់ និងបញ្ជូនទៅតុលាការ៦៣នាក់ មានពិន័យអន្តរការណ៍ មានអប់រំ ព្រោះយោងតាមច្បាប់ និងរឹបអូសយកមធ្យោបាយមួយចំនួន និងគណៈកម្មការដាក់វិធាន ការចំពោះពលរដ្ឋខ្លះដឹកឈើតាមម៉ូតូ រទេះគោដោយបទល្មើសពីធំមកតូចវិញ ។
ក្នុងសន្និសីទសារព័ត៌មាននេះដែរ លោកស្រ៊ុន ដារិទ្ធ រដ្ឋលេខាធិការក្រសួងបរិស្ថានបានឲ្យដឹងដែរថា គណៈកម្មការថ្នាក់ជាតិទប់ស្កាត់និងបង្ក្រាបបទល្មើសធនធានធម្មជាតិបានសហការជាមួយអាជ្ញាធរនៃប្រទេសជិតខាងដូចជា វៀតណាម ឡាវ ថៃ ជាដើម ដើម្បីផ្តល់ព័ត៌មាននិងសហការតាមចាប់ខ្លួនជនល្មើសដែលរត់គេចខ្លួនឆ្លងដែន ។ អនុប្រធាននាយកដ្ឋាននីតិកម្មនិងពង្រឹងច្បាប់ព្រៃឈើនៃក្រសួងកសិកម្ម រុក្ខាប្រមាញ់ និងនេសាទ លោក សួន សុវណ្ណ បានថ្លែងថា ការបង្ក្រាបបទល្មើសព្រៃឈើរយៈពេល៥ឆ្នាំកន្លង
មកនេះ ជាលទ្ធផលចាប់បានជាង៨.៦០០ករណី ក្នុងនោះមានការពិន័យ៨៤ករណី និងបញ្ជូនទៅតុលាការជាង៥.០០០ករណី ជាមួយនឹងវត្ថុតាងឈើមូល១០.៧០០ម៉ែត្រគូប ឈើអារ២៤.៣១៤ម៉ែត្រគូប គ្រញូង៣៦២ម៉ែត្រគូបនិងវត្ថុតាងមួយចំនួនទៀត ។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា នៅក្នុងសន្និសីទសារព័ត៌មាននេះបានលើកឡើងថា ការរៀបចំឲ្យមានមន្ត្រីជំនាញមកបំភ្លឺនេះ គឺដើម្បីឆ្លើយតបទៅនឹងកង្វល់របស់ប្រជាពលរដ្ឋ ដែលកំពុងផ្តោតទៅលើការយកចិត្តទុកដាក់លើវិធានការទប់ស្កាត់បទល្មើសព្រៃឈើ ដោយអនុវត្តច្បាប់តឹងរុឹងបំផុត។
លោកឧត្តមសេនីយ៍ត្រី អេង ហ៊ី បានបញ្ជាក់ថា ទាក់ទិននឹងក្រុមហ៊ុនទាំង៥ «បើក្រុមហ៊ុននោះស៊ើបអង្កេតរកឃើញថាល្មើសច្បាប់ យើងនឹងដកអាជ្ញាប័ណ្ណ តែរង់ចាំការស៊ើបអង្កេតសិន បើយើងទៅបិទមិនទាន់ចប់ការស៊ើបអង្កេតនោះ មិនអាចផ្តល់ភាពយុត្តិធម៌បានទេ» ។
មន្ត្រីជំនាញមកពីក្រសួងបរិស្ថាន ក៏បានលើកឡើងថា ខណៈក្រុមការងារជំនាញរបស់គណៈកម្មការចុះទៅស្រាវជ្រាវនោះ មានក្រុមហ៊ុនចំនួន៥ដែលបង្ហាញពីតម្រុយនៃការជាប់ពាក់ព័ន្ធនឹងបទល្មើសព្រៃឈើ ខណៈក្រុមហ៊ុនមួយទៀតរកឃើញថាមិនជាប់ពាក់ព័ន្ធនោះទេ ។ បើតាមលោកឧត្តមសេនីយ៍ត្រី អេង ហ៊ី ក្រុមហ៊ុនទាំង៥នោះរួមមាន ១-ក្រុមហ៊ុនម៉ាស្ទ័រខេសិន ២-ក្រុមហ៊ុនយ៉ាន់ចាវ ៣-ក្រុមហ៊ុនថាច់វូដ ៤-ក្រុមហ៊ុន វិជ្ជរី និង៥-ក្រុមហ៊ុនណេងណា ។
សូមបញ្ជាក់ថា រហូតមកដល់ពេលនេះសមត្ថកិច្ចកំពុងតាមស្វែងរកជនសង្ស័យពាក់ព័ន្ធចំនួន៩នាក់ទៀត ខណៈដែលឈើខុសច្បាប់ចំនួន១.៧០០ម៉ែត្រគូបត្រូវបង្ក្រាបបាន ហើយរថយន្តល្មើសជាង៤០គ្រឿងដែលពាក់ព័ន្ធនឹងការដឹកឈើទាំងនោះត្រូវបានដកហូត ក្នុងនោះមានរថយន្តចំនួន២៩គ្រឿងត្រូវបានដុតបំផ្លាញចោលផងដែរ ។ (សម្រួលដោយ៖ ស្រីណា)
អត្ថបទសរសេរ ដោយ
អត្ថបទសរសេរ ដោយ
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ