ស្រុកព្រៃនប់ ៖ បើតាមសមត្ថកិច្ចនគរបាលស្រុកព្រៃនប់បានបង្ហើបឱ្យដឹង នៅរសៀលថ្ងៃទី១៨ កក្កដា នេះថា ពលរដ្ឋទាំ៤នាក់ដែលត្រូវបានសមត្ថិច្ចឃាត់ខ្លួននោះ បានបញ្ជូនបន្តទៅកាន់ខេត្តព្រះសីហនុ ដើម្បីធ្វើការសាកសួរបន្ថែម ។ ក្រោយសមត្ថកិច្ចឃាត់ខ្លួនពលរដ្ឋទាំង៤នាក់ ក៏មានពលរដ្ឋប្រមាណជាពី១០ ទៅ២០
នាក់នាំគ្នាមកកាន់អធិការនគរបាលស្រុកផងដែរ ប៉ុន្តែចំណាត់ការយ៉ាងណានោះ នៅមិនទាន់ដឹងនោះទេ ដោយទំនាក់ទំនងទៅលោកហួ យ៉ៃ អធិការនគរបាលស្រុកដែរ តែខលចូលមិនមានអ្នកទទួល ។
សូមបញ្ជាក់ទៀថា ពលរដ្ឋចំនួន៤នាក់ ដែលត្រូវបានកម្លាំងសមត្ថកិច្ចចម្រុះស្រុកព្រៃនប់ឃាត់ខ្លួន ក្នុងចំណោមពលរដ្ឋជាច្រើននាក់ បាននាំគ្នាផ្ទុះការតវ៉ារហូតប្រើហិង្សារុះ រើរបាំង និងរោងកុងត្រូល ដែលត្រូវបានក្រុមពលរដ្ឋទាំងនោះអះអាងថា ខាងក្រុមហ៊ុនយិះ ជៀ ដែលត្រូវបានគេ ស្គាល់ថាជាក្រុមហ៊ុនរបស់ចិនបានដាក់បិទនៅតាមផ្លូវចូលទៅកាន់ឆ្នេរកោះសំពោច ស្ថិតក្នុងឃុំរាមស្រុកព្រៃនប់ ដែលជាទីកន្លែងដែលក្រុមហ៊ុនចិននោះ ទទួលសិទ្ធិវិនិយោគនៅតំបន់នោះ ។
ហេតុការណ៍នេះ បានកើតឡើងកាលពីរសៀលថ្ងៃទី១៧ កក្កដា ដែលក្នុងហេតុការណ៍នោះ បើយោងតាម សេចក្តីរាយការណ៍ភ្លាមៗពីកន្លែងកើតហេតុថា មានបុរសជនជាតិចិនម្នាក់បានរងរបួសមធ្យម លើផ្ទៃមុខ ហើយជាមួយគ្នានោះ មានពលរដ្ឋមួយចំនួន៤នាក់ ត្រូវបានសមត្ថកិច្ចឃាត់ខ្លួនជាបណ្តោះអាសន្ន ដើម្បី សាកសួរ ក្រោយពេលដែលអជ្ញាធរនិងសមត្ថកិច្ចចម្រុះចុះអន្តរាគមន៍ និងទប់ស្កាត់ការពារមិនឱ្យមានអំពើ ហិង្សាកើតឡើងបន្តបន្ថែមទៀត ក្រែងមានសភាពធ្ងន់ធ្ងរ ប៉ះពាល់ដល់ផ្លូវច្បាប់ ហើយបានបន្តការ ដោះស្រាយតាមនិតិវិធី ។
ប្រភពពីឃុំរាមស្រុកព្រៃនប់បានអោយដឹង តែសុំមិនអោយបញ្ចេញឈ្មោះថា ករណីពលរដ្ឋផ្ទុះការតវ៉ា ឈានដល់ការរុះរើរបាំងកុងត្រូលនេះ ដោយសារពលរដ្ឋមានកំហឹងជាមួយខាងក្រុមហ៊ុនចិនយិះជៀ ដែល ដាក់របាំងកុងត្រូល បង្ករផលពិបាកដល់ពលរដ្ឋដែលមានលំនៅឋាន ប៉ែកខាងក្នុងនោះ ពេលចេញ-ចូលផ្ទះម្តងៗ និងថា កន្លងមកប្រជាពលរដ្ឋបានស្នើសុំឱ្យក្រុមហ៊ុនបើកផ្លូវឱ្យពួកគាត់ងាយស្រួល ធ្វើដំណើរតាមសម្រួលដែរ ប៉ុន្តែគ្មានដំណោះស្រាយ ។
ពលរដ្ឋពាក់ពន្ធ័ចំនួន៤រូបដែល សមត្ថកិច្ចឃាត់ខ្លួនបណ្តោះអាសន្នក្រោយផ្ទុះហឹង្សានេះរួមមាន ៖ ១-ឈ្មោះ រឿង វិស័យ ភេទប្រុស អាយុ៤៤ឆ្នាំមុខរបរកម្មករសំណង់ មានទីលំនៅភូមិកណ្តាលទួល ឃុំដើមចារ ស្រុកកំពង់ត្រាច ខេត្តកំពត ២-ឈ្មោះ ហ៊ុយ យ៉េត ភេទប្រុស អាយុ២៥ឆ្នាំ មុខរបរជាងភ្លើង មានទីលំនៅភូមិថ្មធំ ឃុំរាម ស្រុកព្រៃនប់ ខេត្តព្រះសីហនុ ៣-ឈ្មោះ កែវ សឹង ភេទប្រុស អាយុ៦៣ឆ្នាំ មុខរបរធ្វើស្រែ មានទំនៅភូមិថ្មធំ ឃុំរាម ស្រុកព្រៃនប់ ខេត្តព្រះសីហនុ និង៤-ឈ្មោះ ឈឹម គឹមយូន ភេទប្រុស អាយុ៣០ឆ្នាំមុខរបរលក់ដូរ មានទីលំនៅភូមិស្មាច់ដែង ឃុំរាម ស្រុកព្រៃនប់ ស្រុកព្រៃនប់ ខេត្តព្រះសីហនុ ។
នៅមិនទាន់មានរបាយការណ៍បញ្ជាក់ផ្លូវការបន្ថែម ពីអាជ្ញាធរលើបញ្ហានេះនៅឡើយ គិតត្រឹមម៉ោង៥ល្ងាច ថ្ងៃដដែលនេះ ។ ពាក់ព័ន្ធនិងករណីនេះ មិនមានប្រភពណាមួយពីខាងក្រុមហ៊ុនយិះជៀនោះទេ ចំណែក ពល រដ្ឋដែលត្រូបានឃាត់ខ្លួននៅបើតាមលោក សរ កក្កដា អភិបាស្រុកបានប្របណ្តាញព័ត៌មានក្នុងខេត្តថា កំពុងត្រូវបានសមត្ថកិច្ចសួនាំតាមនីតិវិធី ។ (សម្រួលដោយ៖ ស្រីណា)
ចែករំលែកព័តមាននេះ