រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា ក្រសួងសុខាភិបាលបានប្រកាសអំពីស្ថានភាពជំងឺប៉េស្តជ្រូកអាហ្វ្រិកមិនអាចឆ្លងដល់មនុស្សឡើយ ដូច្នេះសូមប្រជាពលរដ្ឋកុំមានការព្រួយបារម្ភ។
អ្នកនាំពាក្យក្រសួងសុខាភិបាលបានអះអាងថា ទោះបីជំងឺប៉េស្តជ្រូកអាហ្រិកមិនទាន់មានវាក់សាំងចាក់ការពារទប់ស្តាត់ការរាតត្បាតជំងឺនេះក៏ដោយ ប៉ុន្តែស្ថានភាពជំងឺនេះពុំបានបណ្តាលឲ្យឆ្លងដល់មនុស្សឡើយ ពោលគឺវាឆ្លងតែសត្វជ្រូកគ្នាវាប៉ុណ្ណោះ ។
លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាលបានមានប្រសាសន៍ថា ជំងឺប៉េស្តជ្រូកអាហ្វ្រិក បង្កឡើងដោយវីរុសដែលមិនទាន់មានចាក់វ៉ាក់សាំងការពារនៅឡើយទេ ប៉ុន្តែជំងឺនេះមិនបង្កឲ្យមានការប៉ះពាល់ដល់មនុស្សឡើយ ព្រោះថាសាច់ជ្រូកដែលមុននឹងយកមកលក់តាមទីផ្សារ គឺមានការពិនិត្យពីសំណាក់មន្ត្រីជំនាញ ដើម្បីធានាថាសាច់ជ្រូកពិតជាមានសុវត្ថិភាព។
លោកបានបញ្ជាក់ថា ទោះបីជាមេរោគជម្ងឺប៉េស្តជ្រូកនេះចូលក្នុងខ្លួនមនុស្សយើងក៏ដោយ ក៏មេរោគមួយនេះអាចងាប់នៅក្នុងខ្លួនមនុស្សយើង ឬបញ្ចេញចោលតាមរយៈលាមក មិនបង្កបញ្ហាអ្វីឡើយ ។
មន្ត្រីជាន់ខ្ពស់ក្រសួងសុខាភិបាលបានបង្ហាញដូច្នេះ ខណៈដែលជម្ងឺប៉េស្តជ្រូកអាហ្រិ្វកកំពុងរាតត្បាតនៅតាមបណ្តាខេត្តមួយចំនួនក្នុងប្រទេសកម្ពុជាហើយបានធ្វើឲ្យសត្វជ្រូកងាប់ជាច្រើនក្បាល ដែលបង្កភ័យខ្លាចដល់មនុស្សមិនហ៊ានបរិភោគ ។ លោកបញ្ជាក់ថា ក្រសួងមានវិធានការតឹងរឹងក្នុងការនាំចូលសាច់ជ្រូកមុននឹងដឹកមកលក់លើទីផ្សារ ដោយបានសហការពីជំនាញបសុពេទ្យនិងម្ចាស់កសិដ្ឋាននានាដើម្បីកុំឲ្យប្រជាពលរដ្ឋមានការព្រួយបារម្ភ ។
សូមបញ្ជាក់ថា បច្ចុប្បន្ននេះជំងឺប៉េស្តជ្រូកអាហ្វ្រិកបាននឹងកំពុងផ្ទុះឡើងនៅខេត្តត្បូងឃ្មុំ ខេត្តស្វាយរៀង ខេត្តតាកែវ និងខេត្តកណ្តាល ដែលកន្លងមកជំងឺនេះក៏ធ្លាប់ផ្ទុះនឹងខេត្តរតនៈគិរី ផងដែរ ។
តាមតួលេខរបស់នាយកដ្ឋានសុខភាពសត្វនិងសុខភាពសាធារណៈបសុព្យាបាលបានបង្ហាញថា ជំងឺប៉េស្ដជ្រូកអាហ្វ្រិកបានធ្វើឱ្យជ្រូកចំនួន២៥០០ក្បាលងាប់ ដែលក្នុងនោះប្រហែល៧០០ ក្បាលត្រូវបានសម្លាប់ចោល ៕ (កែសម្រួលដោយ ៖ ធីតា)
ចែករំលែកព័តមាននេះ