រាជធានីភ្នំពេញ ៖ កម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានធ្វើការបង្ក្រាបករណីលួចរថយន្ដមួយគ្រឿង ដែលចោរលួចយកទៅបាត់នៅសង្កាត់ក្បាលកោះ ខណ្ឌច្បារអំពៅ កាលពីវេលារំលងអធ្រាត្រ ឈានចូលថ្ងៃទី៨ ខែកក្កដាកន្លងទៅ ។…
រាជធានីភ្នំពេញ ៖ កម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានធ្វើការបង្ក្រាបករណីលួចរថយន្ដមួយគ្រឿង ដែលចោរលួចយកទៅបាត់នៅសង្កាត់ក្បាលកោះ ខណ្ឌច្បារអំពៅ កាលពីវេលារំលងអធ្រាត្រ ឈានចូលថ្ងៃទី៨ ខែកក្កដាកន្លងទៅ ។
ប្រតិបត្តិការនេះ ធ្វើឡើងក្រោមការបញ្ជាពីលោកនាយឧត្តមសេនីយ៍ នេត សាវឿន អគ្គ ស្នងការនគរបាលជាតិ និងលោកឧត្តមសេនីយ៍ឯក អុិន បូរ៉ា អគ្គស្នងការរងទទួលផែនកណ្ដាលនគរបាលយុត្តិធម៌ និងដឹកនាំបញ្ជាដោយ លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ ។
លោកវរសេនីយ៍ឯក ខេង ម៉េងឈាង នាយ ការិយាល័យនគរបាលព្រហ្មទណ្ឌកម្រិតស្រាល បានឲ្យដឹង នៅព្រឹកថ្ងៃទី១៥ ខែកក្កដាថា ក្រោយពីទទួលបានបញ្ជាភ្លាម កម្លាំងការិយាល័យរបស់លោកបានធ្វើការស្រាវជ្រាវជាបន្ដបន្ទាប់ រហូតឈានដល់កំណត់មុខសញ្ញាពាក់ព័ន្ធ និងឈានដល់ការចាប់ខ្លួនជនសង្ស័យបាននារសៀលថ្ងៃទី១៣ ខែកក្កដា ។
លោកនាយការិយាល័យបញ្ជាក់ថា ជនសង្ស័យត្រូវបង្ក្រាបបាននៅសង្កាត់ក្បាលកោះ ខណ្ឌច្បារអំពៅ និងបានបញ្ជូនទៅការិយាល័យជំនាញដើម្បីសាកសួរ និងឈានទៅដកហូតរថយន្ដដែលបានលួចយកទៅលាក់ទុកនៅផ្ទះអ្នកស្រុកក្នុងឃុំព្រែកទន្លាប់ ស្រុកលើកដែក ខេត្តកណ្ដាល ។ ក្រោយពីការដកហូតបានរថយន្ដដែលជនសង្ស័យលួច សមត្ថកិច្ចក៏ដកហូតបានកាំភ្លើងខ្លី១ដើមម៉ាកកា៥៤ បង់១ និងមានគ្រាប់៧គ្រាប់។
ជនសង្ស័យដែលត្រូវបានឃាត់ខ្លួនឈ្មោះ តី សុភ័ក្ត្រ អាយុ៣០ឆ្នាំ សារភាពថា ខ្លួនពិតជាបានលួចរថយន្ដខាងលើនិងប្រើប្រាស់អាវុធដោយខុសច្បាប់ប្រាកដមែន ។ ជនសង្ស័យត្រូវបានបញ្ជូនទៅសាលាដំបូងនៅថ្ងៃទី១៥ ខែកក្កដា ហើយរថយន្ដប្រគល់ជូនម្ចាស់ដើមវិញ ៕ (សម្រួលដោយ៖ ស្រីណា)
ចែករំលែកព័តមាននេះ