ខេត្តបាត់ដំបង៖ ផលិតផលថ្នាំជក់នៅតែជាបញ្ហាមួយដែលមានផលប៉ះពាល់ដល់ការអភិវឌ្ឍសេដ្ឋកិច្ច សង្គម និងការរស់នៅរបស់ប្រជាពលរដ្ឋកម្ពុជា ។ នេះជាការលើកឡើងរបស់លោក ហោ សារុន អនុរដ្ឋលេខាធិការក្រសួងទេសចរណ៍ នាឱកាសបើកសិក្ខសាលាស្តីពី«បរិស្ថានគ្មានផ្សែងបារីក្នុងវិស័យទេសចរណ៍» នៅខេត្តបាត់ដំបងកាលពីពេលថ្មីៗនេះ ។
តាមការសិក្សារបស់លេខាធិការដ្ឋានក្របខ័ណ្ឌ អនុសញ្ញាស្តីពីការត្រួតពិនិត្យថ្នាំជក់ នៃអង្គការសុខភាពពិភពលោក បានឲ្យដឹងថា អត្រាស្លាប់របស់ប្រជាពលរដ្ឋកម្ពុជាមានប្រមាណ ១៥.០០០នាក់ជារៀងរាល់ឆ្នាំ ដោយសារជំងឺនានាទាក់ទងនឹងថ្នាំជក់ ដែលក្នុងនោះ៣៣% ស្ថិតនៅក្នុងចំណោមអ្នកដែល មានប្រាក់ចំណូលទាប។ ជាក់ស្តែងឆ្នាំ២០១៦ ការប្រើប្រាស់ថ្នាំជក់បណ្តាលឲ្យមានការខាតបង់ផលិតភាពសេដ្ឋកិច្ច ដែលគិតជាប្រាក់ចំណូលរហូតដល់២,៧ទ្រីលានរៀល ប្រមាណជា៣% នៃផលទុនសរុបក្នុងស្រុក (GDP)។ ប្រទេសកម្ពុជាគិតត្រឹមចុងឆ្នាំ២០១៨ គឺមានអ្នកជក់ថ្នាំបារីចំនួន១.៦៨លាននាក់ និងចំណាយថវិកាក្នុង១ឆ្នាំអស់ប្រមាណជា២០១លានដុល្លាអាមេរិកឆ្លើបតបនឹងបញ្ហាដ៏គ្រោះថ្នាក់នេះកម្ពុជាបានដាក់សារប្រមានសុខភាពបាន៧៧ភាគរយក្នុងឆ្នាំ២០១៧ ហើយឆ្នាំ២០១៨ នេះកម្ពុជាបានដាក់សារព្រមានចំនួនបីមានៈការជក់បារីនាំឲ្យកើតជំងឺបេះដូង មហារីកខួរក្បាល និងរោគស្បែក ។
លោក ជា បូផល ដែលធ្លាប់ជក់បារីជាច្រើនឆ្នាំបានលើកឡើងថា ការពិសារបារីនិងថ្នាំជក់បានធ្វើឲ្យលោកមានបញ្ហាសុខភាព ជាពិសេសគឺថវិកាចំណាយលើបារីតែម្តង ។
«ជាបទពិសោធន៍មិនល្អមួយគឺខ្ញុំធ្លាប់ជក់ថ្នាំជក់រាប់ឆ្នាំ ហើយចំណាយយ៉ាងតិចអស់ ៦ ០០០ រៀលក្នុងមួយថ្ងៃសម្រាប់ថ្នាំជក់និងបារី។ លទ្ធផលចុងក្រោយ ខ្ញុំមានបញ្ហាសួត ដែលខ្ញុំត្រូវចំណាយលុយព្យាបាលជាច្រើន ធ្វើឲ្យប៉ះពាល់ដល់សេដ្ឋកិច្ចគ្រួសារពិតមែន» ។ នេះជាការលើកឡើងរបស់លោក ជា បូផល ដែលជាអ្នករត់ម៉ូតូរឺម៉ក់ខ្មែរ មកពីខេត្តកំពង់ចាម ។ លោកបានបន្តថា រត់ម៉ូតូមួយថ្ងៃបានប្រមាណជាង ៣ ម៉ឺនរៀលក្នុងមួយថ្ងៃ តែចំណាយលើបារីនិងថ្នាំជក់គឺអស់ជាង ៦០០០ រៀលក្នុងមួយថ្ងៃ ដែលធ្វើឲ្យលោកចាត់ទុកជាបទពិសោធន៍អាក្រក់និងផ្តាំមិត្តភ័ក្ត្រឲ្យឈប់ជក់ដូចលោក ។
យ៉ាងណាមិញ ថ្នាក់ដឹកនាំប្រទេសបាននឹងកំពុងបំផុសចលនាក្នុងការកាត់បន្ថយថ្នាំជក់ដែលធ្វើឲ្យប៉ះពាល់សុខភាពប្រជាជននិងកុមារតូចៗជាដើម។ ជាក់ស្តែង ដើម្បីចូលរួមអនុវត្តគោលនយោបាយកាត់បន្ថយភាពក្រីក្រ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលកម្ពុជា ក៏ដូចជាការចូលរួមលើកកម្ពស់ ក្នុងការទប់ស្កាត់នូវផលប៉ះពាល់ដល់សុខភាព និងបរិស្ថាន ដែលកើតឡើងពីផលិតផលថ្នាំជក់ ដែលបច្ចុប្បន្នបរិស្ថានគ្មានផ្សែងបារី «Smoke-Free Environment» ជាបរិបទមួយដែលពិភពលោក ក៏ដូចជាតំបន់បាន និងកំពុងយកចិត្តទុកដាក់ខ្ពស់ ក្នុងការត្រួតពិនិត្យផលិតផលថ្នាំជក់ ដែលអាចធ្វើឲ្យប៉ះពាល់ដល់បរិស្ថាន និងការរស់នៅរបស់ប្រជាពលរដ្ឋ ទូទាំងពិភពលោក។
ការរៀបចំសិក្ខាសាលានេះឡើង ដើម្បីជំរុញផ្សព្វផ្សាយការអនុវត្តច្បាប់ ស្តីពីការត្រួតពិនិត្យផលិតផលថ្នាំជក់ និងលិខិតបទដ្ឋានគតិយុត្តិនានា ពិសេសសេចក្តីណែនាំ ស្តីពីបរិស្ថានគ្មានផ្សែងបារី ដល់ម្ចាស់មូលដ្ឋានអាជីវកម្ម សេវាកម្មទេសចរណ៍ ទូទាំងព្រះរាជាណាចក្រកម្ពុជា ក្នុងគោលបំណងការពារសុខមាលភាពរបស់ប្រជាជន ការពារ និងទប់ស្កាត់ការរងផ្សែង ផលិតផលថ្នាំជក់ ដែលបង្កឲ្យមានហានិភ័យសុខភាព ដល់អ្នកនៅជុំវិញនឹងបរិស្ថាន និងកាត់បន្ថយផលប៉ះពាល់ ដល់សុខភាពសេដ្ឋកិច្ចសង្គម និងបរិស្ថាន ដែលបណ្តាលមកពីផលិតផលថ្នាំជក់។
វិធានការចម្បងទី២ ដែលគណៈកម្មការបរិស្ថាន គ្មានផ្សែងបារីប្រកាន់យកគឺ៖ វិធានការអប់រំ និងវិធានការរដ្ឋបាល។ បច្ចុប្បន្នយើងបាននិងកំពុងអនុវត្តនូវវិធានការទី១ គឺ វិធានការអប់រំ ដោយបានរៀបចំជាសិក្ខាសាលា បណ្តុះបណ្តាល ប្រជុំ ផ្សព្វផ្សាយ ប៉ាណូ និងរៀបចំបោះសំភារៈផ្សព្វផ្សាយ និងណែនាំឲ្យម្ចាស់មូលដ្ឋានអាជីវកម្ម សេវាកម្មទេសចរណ៍ទាំងអស់ យកចិត្តទុកដាក់គោរពអនុវត្តតាមច្បាប់ស្តីពី ការគ្រប់គ្រងផលិតផលថ្នាំជក់ ដែលបានដាក់ឲ្យប្រើប្រាស់ តាំងពីថ្ងៃទី១៨ ខែឧសភា ឆ្នាំ២០១៥ មកម្ល៉េះ។
វិធានការទី២ ដែលនឹងត្រូវអនុវត្តបន្ត ជាវិធានការរដ្ឋបាល គឺការផាកពិន័យចំពោះបុគ្គល អ្នកជក់នៅទីកន្លែងហាមឃាត់ ម្ចាស់អាជីវកម្ម ដែលអនុញ្ញាតឲ្យគេជក់នៅទីតាំងរបស់ខ្លួន ការតាំងលក់ផលិតផលថ្នាំជក់ខុសពីការកំណត់ និងផាកពិន័យរហូតដល់ក្រុមហ៊ុនបារី ដែលនាំនិងលក់ផលិតផលថ្នាំជក់ គ្មានសារព្រមានជារូបភាព ផ្សាយពាណិជ្ជកម្មបារីខុសច្បាប់….។ ការផាកពិន័យអន្តរការណ៍ នឹងធ្វើតាមប្រកាសអន្តរក្រសួង រវាងក្រសួងសុខាភិបាល និងក្រសួងសេដ្ឋកិច្ចនិងហិរញ្ញវត្ថុ ដោយក្រុមអធិការកិច្ចក្រសួងសុខាភិបាលផងដែរ៕ កែសម្រួលដោយ ៖ សុឃាក់
ចែករំលែកព័តមាននេះ