ក្រុមហ៊ុន Huawei នឹងរៀបចំសន្និសីទអភិវឌ្ឍន៍សកល (Global Developers Conference) ដ៏ធំបំផុតរបស់ខ្លួននៅប្រទេសចិននាថ្ងៃទី៩ សីហា ខាងមុខនេះ ហើយវាហាក់ដូចជាក្រុមហ៊ុននឹងប្រើប្រាស់វេទិកានេះដើម្បីប្រកាសប្រព័ន្ធប្រតិបត្តិការថ្មីរបស់ខ្លួន HongMeng ។ ព័ត៌មាននេះបានមកពីគេហទំព័រ ifeng.com របស់ប្រទេសចិនដែលវាហាក់ដូចជាប្រាកដថាប្រព័ន្ធប្រតិបត្តិការថ្មីនេះនឹងបានឃើញនៅក្នុងព្រឹត្តិការណ៍នេះផងដែរ ។
ព័ត៌មាននេះមិនមែនជាការភ្ញាក់ផ្អើលនោះទេនៅពេលដែលប្រធានផ្នែកអាជីវកម្មអ្នកប្រើប្រាស់របស់ក្រុមហ៊ុនលោក Richard Yu បានលើកឡើងនៅលើ CNBC កាលពីខែឧសភាកន្លងមកនេះថា ប្រព័ន្ធប្រតិបត្តិការថ្មីអាចត្រៀមខ្លួនរួចជាស្រេចដោយដាក់ចុះនៅក្នុងប្រទេសចិននៅឆ្នាំនេះ ។
សន្និសីទអ្នកអភិវឌ្ឍន៍សកលរបស់ក្រុមហ៊ុន Huawei គឺជាព្រឹត្តិការណ៍ដ៏សំខាន់មួយសម្រាប់ក្រុមហ៊ុនយក្សទូរស័ព្ទទំនើបរបស់ចិនជាពិសេសនៅឆ្នាំនេះ ដោយមានដៃគូជាង ១៥០០ និងអ្នកអភិវឌ្ឍន៍ពិភពលោកចំនួន ៥០០០ នាក់ត្រូវបានគេរំពឹងថានឹងចូលរួមព្រឹត្តិការណ៍នេះ ។
ខណៈពេលដែលព្រឹត្តិការណ៍នេះត្រូវបានប្រារព្ធឡើងជារៀងរាល់ឆ្នាំពេលនេះវាពិសេសដោយសារតែទំហំរបស់វាក៏ដូចជាការបង្កើនការយកចិត្តទុកដាក់ពីប្រព័ន្ធផ្សព្វផ្សាយទូទាំងពិភពលោកលើក្រុមហ៊ុន Huawei ។
ប្រព័ន្ធប្រតិបត្តិការថ្មីរបស់ក្រុមហ៊ុន Huawei មិនត្រឹមតែបង្កើតឡើងដើម្បីដំណើរការលើស្មាតហ្វូនប៉ុណ្ណោះទេ ។ យោងតាមលោក Richard Yu ឱ្យដឹងថាប្រព័ន្ធប្រតិបត្តិការនេះគឺបើកចំហសម្រាប់ទូរស័ព្ទចល័ត, ថេប្លេត កុំព្យូទ័រ, TVs, រថយន្ដ និងឧបករណ៍ពាក់ឆ្លាតវៃ ហើយវានឹងអាចប្រើបានជាមួយនឹងកម្មវិធី និងគេហទំព័រទាំងអស់របស់ Android ។
សូមបញ្ជាក់ផងដែរថា សន្និសីទអ្នកអភិវឌ្ឍន៍សកលរបស់ក្រុមហ៊ុន Huawei នឹងត្រូវប្រារព្ធធ្វើឡើងនៅ Songshan Lake ខេត្ត Dongguan ចាប់ពីថ្ងៃទី ៩ ដល់ ១១ ខែសីហា ឆ្នាំ ២០១៩ ៕
ប្រភព៖ gizmochina , កែសម្រួលដោយ ៖ សំណាង
ចែករំលែកព័តមាននេះ