រាជធានីភ្នំពេញ ៖ កាលពីរសៀលថ្ងៃទី១១ កក្កដា កម្លាំងសមត្តកិច្ចនគរបាលនាយកដ្ឋានអន្តោប្រវេសន៍ក្រសួងមហាផ្ទៃ បានបញ្ជូនជនជាតិចិន៣នាក់ ទៅកាន់សាលាដំបូងរាជធានីភ្នំពេញ ពាក់ព័ន្ធករណីនាំប្រាក់ដុល្លារអាមេរិកចូលមកកម្ពុជាដោយខុសច្បាប់ ។
គួរបញ្ជាក់ថា នគរបាលអន្ដោប្រវេសន៍ប៉ុស្ដិ៍ច្រកទ្វារប្រលានយន្តហោះអន្ដរជាតិភ្នំពេញ កាលពីល្ងាចថ្ងៃទី៩ ខែកក្កដា បានឃាត់ខ្លួនជនជាតិចិននាក់ ក្រោយពីពួកគេបាននាំលុយចូលមកប្រទេសកម្ពុជានូវទឹកប្រាក់៩០ ម៉ឺនដុល្លារអាមេរិក ដោយគ្មានប្រភពច្បាស់លាស់ ។ ជនជាតិចិន៣ នាក់នោះ១-ឈ្មោះ Huang Canming ភេទប្រុស អាយុ២៧ ឆ្នាំ ២-ឈ្មោះ Yang Yongwei ភេទប្រុស អាយុ២៦ ឆ្នាំ ពួកគេធ្វើដំណើរចេញពីទីក្រុងហុងកុង ប្រទេសចិន មកអាកាសយានដ្ឋានអន្ដរជាតិភ្នំពេញ តាមជើងយន្ដហោះលេខ LQ 971 និង ៣-ឈ្មោះ Zizheng Zheng ភេទប្រុស អាយុ៣២ ឆ្នាំ (ជាអ្នកចាំទទួលនៅព្រលានយន្តហោះអន្តរជាតិភ្នំពេញ) ។
សមត្ថកិច្ចបន្តថា ក្រោយធ្វើការត្រួតពិនិត្យ និងបានរកឃើញក្រដាសប្រាក់ដែលជនសង្ស័យដាក់ក្នុងកាបូបយួរដៃចំនួន៣ ដែលមានទឹកប្រាក់សរុប៩០ម៉ឺនដុល្លារអាមេរិក ដែលអ្នកដំណើរមិនបានប្រកាស ឬបំពេញឯកសារជូនដំណឹងដល់មន្ដ្រីគយ និងរដ្ឋាករ លើនោះទេ ។ ការនាំចូលក្រដាសប្រាក់ទាំងនេះ មានចំនួនច្រើន មិនមានប្រភពច្បាស់លាស់ និងមិនបង្ហាញពីគោលដៅច្បាស់លាស់របស់ប្រាក់ ទើបការិយាល័យត្រួតពិនិត្យគយអាកាសយានដ្ឋានអន្ដរជាតិភ្នំពេញ សម្រេចឃាត់ខ្លួនមនុស្ស និងប្រាក់ដុល្លារនោះតែម្ដងទៅ ។
រយៈពេល៣ថ្ងៃនេះ មន្ត្រីគយ និងរដ្ឋាករ បានបង្ក្រាបបទល្មើសនាំលុយដុល្លារល្មើស ច្បាប់ ចូលបាន២ ករណីហើយ គឺនៅថ្ងៃទី៧ ខែកក្កដា ឆ្នាំ២០១៩ បង្ក្រាបនៅព្រលានយន្តហោះអន្តរជាតិខេត្តសៀមរាប ចាប់ខ្លួនជនជាតិកូរ៉េខាងត្បូង២នាក់ និង រឹបអូសយកប្រាក់ដុល្លារ បានជាង២ លានដុល្លារ ហើយនៅល្ងាចថ្ងៃទី១១ ខែកក្កដា ចាប់ខ្លួនជនជាតិចិននាក់ទៀត និង រឹបអូសប្រាក់៩០មុឺនដុល្លារផងដែរ ។
ជនសង្ស័យកំពុងស្ថិតនៅដំណាក់អយ្យការធ្វើការសាកសួរ ចំណែកប្រាក់ដុល្លារមិនច្បាស់លាស់នោះ និងត្រៀបនាំយកទៅដាក់ចូលធនាគារជាតិដូចសព្វដង ៕ (សម្រួលដោយ៖ ស្រីណា)
ចែករំលែកព័តមាននេះ